1 Pedro
Nabena karta Pedroba b̶ʉd̶a
Pedroba nau karta b̶ʉsii. Jesusba ichi iusiid̶e b̶eda jidaubarii basii (Marcos 1:16-18). Maamina Jesusba jʉrʉ adaud̶ad̶ebena Pedro chi aude mechiu b̶uasii. Ichiba Jerusalend̶e Dachi Akõre de mechiud̶e judiorãmaa Jesucristo ʉ̃rʉbena biꞌia jaradeasii (Hechos 2:14-41) maud̶e judiowãerãmaa bid̶a Jesús ʉ̃rʉbena jarad̶e wãsii (Hechos 10:1-48). Año 67 romad̶ebenarãba ichi cruzd̶e boro ed̶aa jirab̶u beasid̶au.
Año 64 Roma puuru baawãsii. Waabenarãmaarã chi karr Nerón abadauba baabisii de wid̶i waukuai baita. Maamina nebʉrad̶e b̶uamaaba, Neronba jarasii chi Cristod̶e ijãabadaurãburu maka wausid̶au. Maud̶eeba romad̶ebenarãba druacha ãbarã kachirua waud̶ai baita wãraa paneesid̶au. Maud̶eeba Pedroba nau karta b̶ʉsii. Ichiba mau urubʉisii Romad̶ebena ãbarãmaa druacha, ãrea biꞌiwãe panumina Cristod̶e ijãa panad̶amera (2:18-25; 3:8-18; 4:12-19; 5:8-11).
Chi kartad̶ebena kʉ̃risia ab̶a biꞌia b̶uu 2:21 naka b̶ʉ kub̶uu: «Cristo machi kakua ãrea biꞌiwãe b̶uasiid̶eeba Dachi Akõreba machi iusii ãrea biꞌiwãe panad̶amera. Cristo ãrea biꞌiwãe b̶uasiid̶e unubisii machi biꞌiwãe paneeduud̶e saka nibad̶ai panuu».
Nau kartad̶e Pedroba b̶ʉsii Dachi Akõreba Jesucristod̶eeba dachi adausii ichi puuru bamera (1:1-11; 2:1-10). Maud̶eeba dachi ne jomad̶e jipa nibad̶ai panuu (1:1—3:7; 4:1-11; 5:1-11). Dachi druad̶ebena ley maud̶e chi karrarã ijãad̶ai panuu (2:13-17). Maamina ne joma audeara Jesucristod̶e ijãad̶ai panuu (3:13-16).