Marcos
Bed̶ea bia Jesús ʉ̃rʉbena Marcosba b̶ʉd̶a
Juan chi Boro Eabarii ʉ̃rʉbena
1
1-2 Nau chi bed̶ea bia Dachi Akõre Warr Jesucristo ʉ̃rʉbena b̶ʉʉruu. Naed̶e Dachi Akõre baita berreabarii Isaiasba naka b̶ʉsii:«Chi mʉ baita bed̶ea jarabarii mʉʉba bichi naa bʉii bichi o jaremera.
3 Ẽbẽra drua sirua wãꞌãe b̶uud̶e jĩwa berrea b̶uu:
“O jarésturu Dachi Mechiu biꞌia irsibid̶amera.
O ichi baita jipa wirua wáusturu”».
4 Ara mau kĩra Juan chi Boro Eabarii drua sirua wãꞌãe b̶uud̶e ẽbẽrarãmaa jaradea b̶eesii ãchi kachirua ida b̶ud̶aped̶a Dachi Akõremaa need̶amera. Ichiba jarasii maka wauduubʉrã Dachi Akõreba ãchi kachirua perdonai. Maabae boro ead̶ai panuu abachii. 5 Maud̶e ẽbẽrarã Jerusalend̶ebenarã maud̶e joma Judea druad̶ebenarã Juanmaa wãbachid̶au. Ãchiba kachirua wauped̶aad̶a ichi daad̶e jarabachid̶au. Maabae Juanba ãchi Jordán dod̶e boro eakuabachii.
6 Juanba paru camello kara waud̶a jʉ̃bachii. Kʉrrd̶e ãnimara e waud̶a jʉ̃bachii.a Sisi kobachii maud̶e moded̶ebena nidurr kũab̶ari b̶aa dobachii. 7 Maud̶e naka jaradeabachii: «Mʉare ab̶a neei chi mʉ aude mechiu nii. Maud̶eeba mʉ sinib̶arikau kob̶eeped̶a ichiba jʉ̃rʉd̶e jʉ̃barii poyaa enai b̶uuwãe. 8 Biawãra mʉʉba baniaba machi boro easii maamina ichiba Dachi Akõre Jaurid̶eeba boro eai».
Juanba Jesús boro ead̶a
9 Mau ewarid̶e Jesús Nazaret puurud̶ebena Juan b̶uumaa wãsii. Nazaret puuru Galilea druad̶e b̶uu. Jesús wãsiid̶e Juanba ichi Jordán dod̶e boro easii. 10 Jesús doed̶abena wãaruud̶e bajãa ewaaruu unusii. Maud̶e Dachi Akõre Jauri paloma kĩra ichi ʉ̃rʉ neeruu unusii. 11 Bajãad̶ebena mimi ab̶a ũrisid̶au. Naka jarasii: «Bichi mʉ Warr chi mʉʉba kʉ̃ria inii. Bichi kakua mʉ ãrea kĩrajʉʉ b̶uu».
Jʉbawãe niiba Jesús kachiruad̶e b̶aebii chaad̶a
12 Maad̶akare Dachi Akõre Jauriba Jesús drua sirua wãꞌãe b̶uud̶aa wãbisii. 13 Aria Jesús ãnimara kachirua nuree tãed̶e 40 ewari b̶uasii. Satanasba ichi kachiruad̶e b̶aebii chaa b̶uasii kachiruad̶e b̶aemera. Maud̶e angelerãba ichi aid̶abachid̶au.
Jesusba jaradea b̶eed̶a
14 Juan chi Boro Eabarii jʉ̃a b̶uasiid̶e Jesús Galilea druad̶aa wãped̶a chi bed̶ea bia Dachi Akõre ʉ̃rʉbena jaradeabachii.b 15 Naka jarabachii: «Ewari neesii. Dachi Akõreba ichid̶irã ichi juad̶e ua b̶eei. Machiba kachirua waubadau ida b̶ud̶aped̶a mau bed̶ea bia ijã́sturu».
Jesusba b̶eda jidaubadaurã iud̶a
16 Jesús Galilea mar iikaa wãaruud̶e Simón maud̶e chi ãba Andrés unusii. Mau ẽbẽrarã b̶eda jidaubadaurã basiid̶eeba, mard̶e b̶ata nibasid̶au. 17 Maka panuud̶e Jesusba ãchimaa jarasii:
—Mʉ baara wã́duru. Machiba b̶eda jidaubadau kĩra mʉʉba machimaa jaradeai ẽbẽrarã mʉʉmaa eneed̶amera.
18 Ara makʉd̶e ãchi ãtarraya ida b̶ud̶aped̶a Jesús baara wãsid̶au.
19 Mau naabe wãaruud̶e Jesusba Santiago maud̶e chi ãba Juan unusii. Maarã Zebedeo warrarã basii. Jãbad̶e chi ãtarraya kõad̶a jʉ̃ʉkamaa panasid̶au. 20 Maud̶e Jesusba ãchi iusii ichi baara wãd̶amera. Ara makʉd̶e Santiago maud̶e Juanba ãchi akõre Zebedeo maud̶e chi ichi baita trajabadaurã jãbad̶e b̶ʉid̶aped̶a, Jesús baara wãsid̶au.
Jesusba jai kachirua duabʉid̶a
21 Maarã Capernaum puurud̶aa wãsid̶au. Maabae bari panabadau ewari bakare Jesús judiorã araa ãbua imibadau deed̶aa wãped̶a Dachi Akõre bed̶ea jaradea b̶eesii. 22 Jaradea b̶uud̶e jomaurãba kuitaa kʉ̃risiad̶aabasii. Chi Moisesba b̶ʉd̶a jaradeabadaurã kĩra jaradeaka basii. Maumaarã ãrea kuitaa b̶uud̶eeba arakʉd̶e jaradea b̶uasii. 23 Aria panuud̶e, mau judiorã araa ãbua imibadau ded̶e, jai kachirua bara b̶uu ẽbẽra naka jĩwa jarasii:
24 —¡Jesús Nazaretd̶ebena! ¡Dai ida b̶use! ¿Dai kenad̶e neeska?c Mʉʉba kuitaa b̶uu bichi kai: ¡Bichi Dachi Akõreba bʉid̶a!
25 Jesusba ichimaa naka jarasii:
—¡Chũpea b̶uase! Jãu mukĩra kakuad̶ebena awara wãse.
26 Ara makʉd̶e chi jai kachiruaba chi mukĩra wawabiped̶a, ãrea b̶iaped̶a awara wãsii. 27 Maud̶eeba jomaurãba kuitaa kʉ̃risiad̶aabasii. Ãchiba chiya id̶i kopaneesid̶au: «¿Nau kãarema? Jesusba jaradea b̶uu chi wid̶ibʉ, ãrea kuitaa arakʉd̶e jaradeabariid̶eeba. Chi jai kachiruarã bid̶a ichiba jaraaruu ũri panuu».
28 Maud̶eeba joma Galilea druad̶e kãꞌãabariwãed̶e Jesús trʉ̃ poa kob̶eesii.
Jesusba Simón Pedro pakõre aribiabid̶a
29 Maud̶e judiorã araa ãbua imibadau ded̶ebena wãd̶aped̶a Simón deed̶aa wãsid̶au Jesús, Santiago maud̶e Juan. Simón ãba Andrés sid̶a aria b̶uabachii. 30 Maud̶e Jesusmaa jarasid̶au Simón pakõre kʉamiaba kʉd̶ad̶e b̶uu. 31 Mau b̶uumaa wãped̶a, juad̶e jidauped̶a jiradubisii. Ara makʉd̶e chi kʉamia duusii. Maabae Simón pakõreba ãchimaa kobiasii.
32 Kiusiid̶e ẽbẽrarãba barikiu ẽpermo nuree maud̶e jai kachirua uru nuree Jesusmaa adoesid̶au. 33 Puurud̶ebenarã joma chi poraamare pĩchua orro nub̶eesii. 34 Maud̶e Jesusba ẽpermo nuree ãrea aribiabiasii maud̶e jai kachiruarã ãrea duabʉikuasii. Jauri kachiruarãba ichi kuitaa panad̶ad̶eeba Jesusba chũpeabiabachii.
Galilead̶e jaradea nibad̶a
35 Daped̶eed̶e Jesús jiradusii. Wabid̶a pãriu b̶uud̶e ẽbẽra wãꞌãemare Dachi Akõremaa ʉtaa id̶id̶e wãsii. 36 Maud̶eeba Simonba maud̶e ichi ome panuurãba Jesús jʉrʉ panasid̶au. 37 Unusid̶aud̶e jarasid̶au:
—Jomaurãba bichi jʉrʉ panuu.
38 Maud̶e Jesusba jarasii:
—Waabenarã puururãd̶aa wãd̶ai mʉʉba aria bid̶a jaradeai b̶uud̶eeba. Mʉ mau kakua neesii.
39 Maka joma Galilea druad̶e nibasii. Judiorã araa ãbua imibadau decha jaradeabachii. Ichi wãaruumaa jai kachirua duabʉikabachii.
Jesusba kakua chau nii aribiabid̶a
40 Maka b̶uud̶e ẽbẽra kakua chau nii Jesusmaa neesii.d Mau ẽbẽra õdarrd̶e kob̶eeped̶a naka chi chuburia id̶isii:
—Bichiba kʉ̃ria b̶uubʉrã, mʉ poyaa aribiabii.
41 Jesusba miichuburi nii unud̶ad̶eeba ichi jua ʉ̃rʉ kub̶uuruud̶e jarasii:
—Maka wau kʉ̃ria b̶uu. ¡Aribiáse!
42 Ara makʉd̶e chi kakua chau b̶uad̶a wãꞌãesii, maud̶e chi ẽbẽra anisii. 43-44 Maud̶e Jesusba ichimaa kĩrud̶eeba jarasii:
—Bichi chi kakua anid̶a ab̶aumaa bid̶a jararã́se. Maumaarã judio paaremaa wãse bichi kakua anid̶a unumera. Maabae Dachi Akõre daad̶e biꞌia b̶eei baita Moisesba jarad̶a kĩra ne kaebea dease. Maka ẽbẽrarãba kuitaad̶ai bichi chi kakua biawãra anid̶a.