Mateo
Bed̶ea bia Jesús ʉ̃rʉbena Mateoba b̶ʉd̶a
Jesús baara nibabarii Mateoba nau karta b̶ʉsii. Maud̶e Mateo Leví abachid̶au. Mateoba Romad̶ebena baita chi nejarra pe b̶uabachid̶e Jesusba ichi iusii (9:9-13). Waabenarãmaarã Mateoba Marcos karta adauped̶a mau judiorã baita b̶ʉsii biꞌia aude kuitaad̶amera Jesús ãchi jaradea ua b̶uabarii mechiu maud̶e Dachi Akõreba ãchi karibabarii deai jarad̶a.
Naa Mateoba b̶ʉsii Jesucristo Abrahamd̶ebena, Davidd̶ebena imid̶a ʉ̃rʉbena (1:1-18), Jesús adaud̶a ʉ̃rʉbena (1:19—2:23), Juanba Jesús boro ead̶a ʉ̃rʉbena (3:1-17) maud̶e jʉbawãe niiba Jesús kachiruad̶e b̶aebii bad̶a ʉ̃rʉbena (4:1-11).
Mawãare b̶ʉ kub̶uu Jesusba Galilea mar kaita waud̶a ʉ̃rʉbena (4:12—14:12). Ed̶a b̶ʉ kub̶uu ichiba ead̶e jaradead̶a (5:1—7:29), ichiba chi unud̶akau waukuad̶a (8:1—9:38), ichiba jʉrʉ adaud̶arã 12 bʉikad̶a (10:1-42), maud̶e nebʉrʉ jaradead̶a (11:1—14:12).
Mawãare b̶ʉ kub̶uu Jesusba joma Galilea druad̶e kaitawẽ niid̶e jaradea b̶uad̶a ʉ̃rʉbena (14:13—17:21) maud̶e Galilead̶ebena Jerusalend̶aa wãaruud̶e jaradea b̶uad̶a ʉ̃rʉbena (17:22—20:34).
Kaad̶eare b̶ʉ kub̶uu Jesús Jerusalend̶e makad̶a ʉ̃rʉbena (21:1—28:20). Ed̶a b̶ʉ kub̶uu Jesusba saduceorã, fariseorã maud̶e waabenarã jidead̶a ʉ̃rʉbena (capítulo 21—23), Dachi Akõreba ẽbẽrarã kastikai ʉ̃rʉbena (capítulo 24—25), Jesús cruzd̶e biuped̶a chokae jiradud̶a (26:1—28:15) maud̶e ichid̶e ijãabadaurã puuru b̶eecha bʉikad̶a (28:16-20).