Dachi Akõre de mechiu joma ãrid̶ai ʉ̃rʉbena Jesusba jarad̶a
24
1 Jesús Dachi Akõre de mechiud̶ebena awara wãsii. Maud̶e ichi baara nibabadaurã ichi kaita need̶aped̶a jarasid̶au:—Ichiáse Dachi Akõre de mechiu, maud̶e de ad̶u kub̶uu sid̶a biꞌia kub̶uu.
2 Maud̶e Jesusba ãchimaa jarasii:
—Maerã, machiba unu panuu biꞌia kub̶uu. Maamina biawãra mʉʉba jaraaruu: nau mo kaped̶aad̶a joma ãrid̶ai.
3 Jesús Olivo ead̶e akʉ b̶uasiid̶e ichi baara nibabadaurã ichimaa wãd̶aped̶a ãchi du ab̶a naka id̶isid̶au:
—Daimaa jarase, Dachi Akõre de mechiu ¿mau sakaed̶e makaima? ¿Kãared̶eeba kuitaad̶aima bichi neeruu? Maud̶e ¿kãared̶eeba kuitaad̶aima nau ewari baribai?
4 Jesusba panausii:
—Kauwa nureásturu ab̶au bid̶a setaa kũruarãad̶amera. 5 Ãreaba jarad̶ai: “Mʉ Dachi Akõreba Dachi Karibabarii deai jarad̶a”. Maka ẽbẽrarã ãrea setaa kũruad̶ai.
6 Puuru ab̶a ab̶au puuru ome chĩobika nub̶uu ũriiduud̶e maud̶e makad̶ai ʉ̃rʉbena ũriiduud̶e, wapearã́sturu. Mau joma makai b̶uu. Maamina nau ewari wabid̶a neebai. 7 Drua ab̶a ab̶au drua ome chĩobika nub̶uai. Maud̶e rey ab̶a ab̶au rey ome chĩobika nub̶uai.a Druacha jarrba baraai maud̶e ioromia druacha baraai. 8 Maamina mau naed̶e b̶aꞌãra biꞌiwãe panad̶ai, wẽra warr pira chaa b̶uu kĩra.
9 »Mau ewarid̶e ẽbẽrarãba machi jidau dead̶ai, kachirua waud̶aped̶a bead̶amera. Mʉʉd̶e ijãa panuu kakua jomaurãba machi kĩramaad̶ai. 10 Maud̶eeba ãrea, mʉʉd̶e ijãad̶ai ida b̶ud̶ai. Maud̶e chiya jidaubid̶ai maud̶e chiya kĩramaad̶ai. 11 Dachi Akõre baita berreabadau chi biawãrawãe nuree need̶ai. Maarãba ẽbẽrarã ãrea setaa kũruad̶ai. 12 Kachirua ãrea baraaruud̶eeba ãreaba waabenarã kʉ̃ria panad̶a ida b̶ud̶ai. 13 Maamina chi kaad̶earebena ewarid̶aa dauchia jãadua mʉʉd̶e ijãa panuubʉrã, Dachi Akõreba mau karibai. 14 Maud̶e chi bed̶ea bia Dachi Akõreba ichid̶irã ichi juad̶e ua b̶uu ʉ̃rʉbena joma nau druad̶e jaradead̶ai puurucha ũrid̶amera. Mau maad̶akare nau ewari baribai.
15-16 »Dachi Akõre baita berreabarii Danielba kartad̶e b̶ʉsii chi kachirua Dachi Akõreba kʉ̃riakau b̶ui, Dachi Akõre de mechiud̶e de jã ed̶a chi bibuara b̶uud̶e.b (Chi karta ed̶a jara b̶uuba kãare ed̶a jara b̶uu kauwa kuitaai b̶uu). Machiba mau unuuduud̶e Judea druad̶e nuree ead̶aa miru wãd̶ai panuu. 17 Maud̶e ẽbẽra ichi de ʉ̃rʉ b̶uu ichi ded̶e ed̶a neebai b̶uu chi ne kaebea pe adooi baita. 18 Chi uu nub̶uud̶e b̶uuba chi anab̶ari jʉ̃barii adaud̶e wãabai b̶uu. 19 Mau ewarid̶e miichuburi chi wẽrarã warr bara nuree maud̶e warr ju dawa nuree. 20 Dachi Akõremaa ʉtaa id̶ísturu kui che ewarid̶e maebʉrã bari panabadau ewarid̶e miru wãrãad̶amera. 21 Mau ewarid̶e ẽbẽrarã ãrea biꞌiwãe panad̶ai. Dachi Akõreba nau iujãa wausiid̶eed̶ebena ẽbẽrarã mau kĩra ãrea biꞌiwãe panad̶aabasii maud̶e nau maad̶akare mau kĩra biꞌiwãe panad̶aabai. 22 Mau ewari ãrea b̶uai. Dachi Mechiuba chi mau ewari b̶aꞌãra b̶ud̶awãe basirã, ẽbẽra ab̶a bid̶a chokae panad̶aabai basii. Maamina ichiba mau ewari b̶aꞌãra b̶usii ichiba jʉrʉ adaud̶arã kʉ̃ria b̶uabariid̶eeba.
23 »Maud̶eeba ab̶auba machimaa jaraaruubʉrã: “Ichiásturu, Dachi Akõreba Dachi Karibabarii deai jarad̶a nama b̶uu”, mau ijãarã́sturu. Maud̶e “chawa b̶uu” aaruubʉrã mau ijãarã́sturu. 24 Mau ewarid̶e setaa jarad̶ai ãchi Dachi Akõreba Dachi Karibabarii deai jarad̶a. Maud̶e waabenarãba setad̶eeba jarad̶ai ãchi Dachi Akõre baita berreabadaurã. Maarãba ẽbẽrarãba poyaa ne waud̶akau mechiu waud̶ai ẽbẽrarã setaa kũruad̶ai baita. Dachi Akõreba jʉrʉ adaud̶arã sid̶a poyaa setaa kũruaped̶aad̶a basirã, ãchi sid̶a setaa kũruad̶ai basii. 25 Mau joma mʉʉba machimaa jarasii makai naed̶e.
26 »Maud̶eeba ab̶auba machimaa jaraaruubʉrã: “Ũrísturu, Dachi Akõreba Dachi Karibabarii deai jarad̶a drua sirua wãꞌãed̶e b̶uu”, mamaa wãrã́sturu. Waabenaba jaraaruubʉrã: “Ichiásturu, ichi nama ded̶e ed̶a b̶uu”, mau sid̶a ijãarã́sturu. 27 Chi Ẽbẽra Ba B̶uad̶a neeruu jomaurãba unud̶ai ʉmada neebariared̶ebena ʉmada b̶aebariid̶aa bajãa puri chebibarii unubadau kĩra. 28 Jomaurãba kuitaa panuu biud̶a b̶ari b̶uumare ãkoso orrobadau. Ara mau kĩra mʉ neeruud̶e jomaurãba unud̶ai.
Chi Ẽbẽra Ba B̶uad̶a neei ʉ̃rʉbena
29 »Ẽbẽrarã ãrea biꞌiwãe panaped̶aad̶akare ara makʉd̶e ʉmada pãriui. Jed̶ako sid̶a pãriui. Pusterrearã bajãad̶ebena b̶aed̶ai. Joma bajãad̶e b̶ee urid̶ai. 30 Maud̶e bajãad̶e ne unud̶ai. Mau mʉ, chi Ẽbẽra Ba B̶uad̶a neeruu ʉ̃rʉbena. Mau unuuduud̶e joma puuru nau iujãad̶ebenarã wapeaba jẽad̶ai. Mʉ jʉ̃rʉarad̶e poyaabarii baraa neeruu maud̶e kĩrawãrea ted̶echoa neeruu unud̶ai. 31 Maud̶e kachu ãrea jĩwa chaaruud̶e mʉʉba angelerã drua b̶eecha wãbiai Dachi Akõreba jʉrʉ adaud̶arã araa ãbua imibiad̶amera.
32 »Higo bakuru makad̶a ʉ̃rʉbena kuitásturu. Chi bakuru jua tuku nub̶eeped̶a kiruu baraabarii. Maud̶eeba jomaurãba kuitaa panuu iu bia ewari kãꞌãabariwãed̶e neei. 33 Ara mau kĩra mʉʉba jarad̶a joma unuuduud̶e kuitásturu mʉ neei ewari ʉ̃rʉ bamaa b̶uu, poraad̶e iu b̶uu kĩra. 34 Mʉʉba machimaa biawãra jaraaruu: nau ʉ̃raud̶ebena ẽbẽrarã biud̶ai naed̶e mau joma makai. 35 Bajãa maud̶e iujãa waa b̶uabai, maamina mʉ bed̶ea biawãra ewaricha b̶uai.
36 »Maamina ab̶au bid̶a mau ewari sakaed̶e makai adua panuu. Chi angelerã bid̶a mau adua panuu. Mʉ, chi Ẽbẽra Ba B̶uad̶a bid̶a adua b̶uu.c Ab̶aburu mʉ Chacháburu mau kuitaa b̶uu. 37 Chi Ẽbẽra Ba B̶uad̶a neei, Noé ewarid̶e maka b̶uad̶a kĩra. 38 Nau iujãa joma birui naed̶e ẽbẽrarã ko duanabachid̶au, do duanabachid̶au, miakãi duanabachid̶au, chi kaurã dead̶aka duanabachid̶au miakãid̶amera. Maka duanabachid̶au ab̶a Noé jãba mechiud̶e ed̶a wãaruud̶aa. 39 Maarãba jãba neei ʉ̃rʉbena adua basii. Maamina biawãra neesiid̶e ãchi joma ãrea baniaba biusid̶au. Mau jãba maka need̶a kĩra mʉ, chi Ẽbẽra Ba B̶uad̶a neei. 40 Mau ewarid̶e ẽbẽra ome ãchi druad̶e traja panuu. Mʉ, chi Ẽbẽra Ba B̶uad̶aba ab̶a adooi maamina chi ab̶abena b̶ʉi. 41 Wẽrarã ome arab̶au kũrumad̶e ne b̶amaa panad̶ai. Ab̶a adooi maamina chi ab̶abena b̶ʉi.
42 »Maud̶eeba dau kuitaa nureásturu. Machi Mechiu sakaed̶e neei adua panuu. 43 Nau kuitásturu: de chibariba nechiru sakaed̶e neei kuitaa b̶uad̶a basirã, kãi b̶eewẽa b̶uai basii, ded̶e ed̶a wãbiamaaba. 44 Ara mau kĩra machi sid̶a dau kuitaa panásturu. Machiba mʉ, chi Ẽbẽra Ba B̶uad̶a neei, kʉ̃risiad̶awẽa panuud̶e neei.
Chi chibari baita bari trajabarii bia maud̶e kachirua ʉ̃rʉbena
45 »Chibari baita bari trajabarii kʉ̃risia kuitaa b̶uuba jipa waubarii kĩra duanásturu. Ichi chibariba chi waabenarã bari trajabadaurã ichi juad̶e b̶usii chi kod̶ai baaruud̶e kobia b̶uamera. 46 Chibari baita bari trajabariiba maka wau b̶uu ichi chibariba unud̶e neeruubʉrã, ichi ãrea kĩrajʉʉ b̶uai. 47 Mʉʉba biawãra jaraaruu: chi chibariba joma ichiba uru b̶uu mau trajabarii juad̶e b̶ui. 48 Maamina mau trajabarii kachirua niibʉrã, ichi sõd̶e “mʉ chibari isa neebai” ai. 49 Maud̶e waabenarã bari trajabadaurã sĩd̶ikai maud̶e itua dobadaurã ome b̶eeped̶a itua do b̶uai. 50 Ab̶aed̶e ichi chibari neei kʉ̃risiaswãe b̶uud̶e ara makʉd̶e neei. 51 Maabae chi chibariba ãrea kastikaped̶a chi setaa ẽbẽra bia nuree abadau ome jʉ̃a bʉikai. Aria jomaurã kĩra nomaa jẽa panad̶ai maud̶e chi puaba kid̶a kʉrrʉa ko panad̶ai.