Marcos
Bed̶ea bia Jesús ʉ̃rʉbena Marcosba b̶ʉd̶a
Nau karta Marcosba b̶ʉsii. Ichi judio Jerusalend̶ebena basii kʉ̃risia panuu. Chi naweba de Jerusalend̶e uru b̶uasii (Hechos 12:12). Marcos Bernabé ome chi niu basii (Colosenses 4:10). Pablo aid̶abachii (2 Timoteo 4:11). Pabloba maud̶e Bernabeba Jesús ʉ̃rʉbena naa jaradead̶e wãsid̶aud̶e Marcos adoesid̶au (Hechos 12:25—13:13). Hechos kartad̶e «Juan Marcos» trʉ̃ b̶ʉ kub̶uu.
1 Pedro 5:13 Pedroba Marcos «mʉ warr» asii. Maud̶eeba dachiba kʉ̃risia panuu Pedroba Jesús ʉ̃rʉbena nebʉrʉ b̶uad̶a Marcosba mau nau kartad̶e b̶ʉsii. Roma puurud̶e Pedro ome b̶uasiid̶e ãbarã judiowãerã baita griego bed̶ead̶e b̶ʉsii.
Marcosba naa b̶ʉsii Juanba Jesús boro ead̶a ʉ̃rʉbena (1:1-11) maud̶e jʉbawãe niiba Jesús kachiruad̶e b̶aebii chaad̶a ʉ̃rʉbena (1:12-13). Mawãare b̶ʉ b̶uu Jesusba Galilea druad̶e wau b̶uad̶a ʉ̃rʉbena (1:14—9:50) maud̶e Galilead̶ebena Jerusalend̶aa wãaruud̶e jaradea b̶uad̶a ʉ̃rʉbena (10:1-52). Ed̶a b̶ʉ kub̶uu Jesusba ẽbẽrarãba poyaa ne waud̶akau wau b̶uad̶a ʉ̃rʉbena maud̶e Dachi Akõreba ichid̶irã ichi juad̶e ua b̶uu ʉ̃rʉbena jaradea b̶uad̶a. Kaad̶eare b̶ʉ kub̶uu Jesús Jerusalend̶e makad̶a ʉ̃rʉbena (11:1—16:20).
Nau kartad̶e arakʉd̶e unubia b̶uu Jesús judiomina waabenarã judiowãerãba biꞌia ijãabachid̶au ichi Dachi Akõreba Dachi Karibabarii deai jarad̶a (7:24-30; 15:33-39). Jesús nau iujãad̶aa neebasii chi mechiu bai baita maumaarã ãrea biꞌiwãe b̶uai baita (8:31; 10:42-45). Dachi baita nau kʉ̃risia mechiu 8:34 b̶ʉsii: «Ab̶a mʉ baara nibai kʉ̃ria b̶uubʉrã, mauba wau kʉ̃ria b̶uu ida b̶uped̶a ãrea biꞌiwãe b̶uai baita b̶uai b̶uu. Maabae mʉ baara wãi b̶uu».