1 Pedro 5

Pedroba ijãabadaurã nubadaurãmaa jarad̶a

1 Machi chi ijãa nubadaurãmaa mʉʉba chi chuburia id̶iiruu, mʉ sid̶a ijãabadaurã nubariid̶eeba. Cristo ãrea biꞌiwãe b̶uad̶a mʉʉba unusii. Maud̶e Dachi Akõreba Cristo chi mechiu nii unubiiruud̶e mʉ sid̶a ichi ome b̶uai. Maud̶eeba naka chi chuburia id̶iiruu: 2 Dachi Akõreba ãbarã machi juad̶e b̶ud̶a ãrea nústuru. Maka waurã́sturu waabenarãba maka waubi panuud̶eeba. Maumaarã nu kʉ̃ria panuud̶eeba maka wáusturu. Chi nejarra kʉ̃ria panuud̶eeba nurã́sturu, maumaarã sõd̶eeba nu kʉ̃ria panuud̶eeba maka wáusturu. 3 Chi machiba nu uru panuurã, machi baita bari trajabadaurã kĩra uru panarã́sturu, maumaarã machi nibad̶eeba unubiásturu saka nibad̶ai panuu. 4 Maabae Cristo dachi Nubarii chi Mechiu neeruud̶e machi chi mechiurã babiai boro jũra ãrikau dearuu kĩra.

5 Kũudrãarã, chõrarãba jaraaduu ijã́sturu. Jomaurã chiya aid̶a nuread̶ai panuu waabena audeara chi mechiu nii kʉ̃risiad̶awẽa. Dachi Akõre bed̶ead̶e naka b̶ʉ kub̶uu:

«Chi nejuakaya nuree Dachi Akõreba ida biꞌia b̶uabikau.

Maamina chi mechiu kʉ̃risiawẽa nuree Dachi Akõreba ichi sõbiad̶eeba aid̶abarii».

6 Maud̶eeba Dachi Akõre juad̶e panásturu, chi ne joma poyaa waubarii Ichi daad̶e chi mechiu kĩra nureewãe baita. Maka chi ichiba b̶ui ewarid̶e, machi chi mechiurã b̶ui. 7 Machiba ãrea kʉ̃risia panuu Dachi Akõremaa joma jarásturu, ichiba machi nu b̶uud̶eeba.

8 Kauwa panásturu maud̶e kĩrabia panásturu. Jʉbawãe nii machi chi kĩramaabarii imama kĩra arraa niiba kai koi jʉrʉi. 9 Maamina jʉbawãe nii ijãarã́sturu. Cristod̶e ãrea ijãa panásturu, kuitaa panuud̶eeba machi ãbarã joma druacha nuree ara mau kĩra ãrea biꞌiwãe panuu. 10 Machi ewari b̶aꞌãra biꞌiwãe panaped̶aad̶akare Dachi Akõreba ne jomad̶e biꞌia b̶ui. Ichiba machi aid̶ai biꞌia ijãad̶amera, joma jãaduad̶amera maud̶e chaarea nuread̶amera. Dachi Akõreba ichi sõbiad̶eeba ne jomad̶e aid̶abarii. Ichiba machi Jesucristod̶eeba iusii ichi ome ewaricha chi mechiu nuread̶amera. 11 Biꞌia b̶uu ewaricha ne joma ichi juad̶e uru b̶uai. Biꞌia b̶uu maka b̶uai.

Pedroba nau kartad̶e aanama b̶ʉd̶a

12 Ãba Silvanoba nau karta cheke aid̶a b̶ʉsii. Mʉʉba kuitaa b̶uu ara ichiba jara b̶uu kĩra joma waubarii. Nau kartad̶eeba mʉʉba machi aid̶a kʉ̃ria b̶uu biꞌia ijãad̶amera. Maud̶e kuitaabii kʉ̃ria b̶uu biawãra Dachi Akõreba ichi sõbiad̶eeba aid̶a b̶uu. Mau ijãa panásturu.

13 Ãbarã Babiloniad̶ebenarãba jarabʉi panuu machi biꞌia panad̶ai. Machi jʉrʉ adaud̶a kĩra ãchi sid̶a Dachi Akõreba jʉrʉ adausii. Mʉ warr kĩra nii Marcos bid̶a jarabʉi b̶uu machi biꞌia panad̶ai. 14 Biawãra kʉ̃riad̶eeba chiya irsibid̶ai panásturu. Mʉʉba kʉ̃ria b̶uu joma machi, Jesucristo ome nuree jirukaraayuwãe nuread̶ai.