Cristo nibad̶a kĩra nibásturu
4
1 Cristo nau kakuad̶e ãrea biꞌiwãe b̶uasiid̶eeba machia bid̶a arab̶aud̶e kʉ̃risia uru panásturu. Chi nau kakuad̶e ãrea biꞌiwãe b̶uuba kachirua ida b̶usii. 2 Mau ẽbẽraba wabid̶a nau iujãad̶e b̶uud̶e nau kakuaba kachirua wau kʉ̃ria b̶uu wau b̶uawẽma, maumaarã Dachi Akõreba kʉ̃ria b̶uu wau b̶uai. 3 Naed̶e machiba kachirua wau nureasii Dachi Akõred̶e ijãad̶akaurãba waubadau kĩra. ¡Ara basma! ¡Waa maka waurã́sturu! Waabenarã daad̶e ãrea kĩra nejasia waubachid̶au, nau kakuaba kachirua wau kʉ̃ria b̶uu waubachid̶au, itua biu nibabachid̶au, kĩrajʉʉ ewari waubadaud̶e ãrea kachirua waubachid̶au, waabenarã baara itua ãrea dobachid̶au maud̶e Dachi Akõre kĩra nuree juaba kaped̶aad̶a kʉ̃riabachid̶au. Mau Dachi Akõreba kʉ̃riakau. 4 Jãabae machiba waa chi Dachi Akõred̶e ijãad̶akaurã ome kachirua waud̶akaud̶eeba ãchiba kuitaa kʉ̃risiad̶akau. Maud̶eeba machi ʉ̃rʉbena kachirua berreabadau. 5 Maamina Dachi Akõreba ãchi nebʉra ichiaruud̶e ãchiba wauped̶aad̶a ichimaa joma jarad̶ai. Ichiba chi chokae nuree maud̶e biud̶arã nebʉra ichiai baita b̶uu. 6 Maud̶eeba biud̶arãba chi bed̶ea bia Cristo ʉ̃rʉbena ũrisid̶au ãchi jauri chokae nuread̶amera, Dachi Akõre chokae b̶uu kĩra.a Maamina ãchi chi kakua biusid̶au, Dachi Akõreba joma biud̶ai panuu asiid̶eeba.7 Kãꞌãabariwãed̶e joma baribai. Maud̶eeba jipa kʉ̃risia panásturu maud̶e kauwa panásturu. Maka Dachi Akõremaa poyaa ʉtaa id̶id̶ai. 8 Ãrea chiya kʉ̃ria panásturu. Mau jomad̶ebena audeara bibuara b̶uu. Chi waabenarã kʉ̃ria uru b̶uuba ãchi kachirua ãrea kʉde uru b̶uad̶a ida b̶ubarii. 9 Chi machi ded̶e needuurã kachirua kʉ̃risiad̶awẽa biꞌia irsibísturu. 10 Dachi Akõreba ichi sõbiad̶eeba dachicha ichi Jauriba waubi b̶uu deasii, waabenarã aid̶ad̶amera. Dachi Akõre baita bari trajabadaurã biawãrad̶eeba ichiba machicha deasiid̶eeba waabena aid̶ásturu. 11 Ab̶auba jaradearuubʉrã, Dachi Akõre bed̶ea jaradea b̶uud̶eeba kauwa jaradeai b̶uu. Ab̶auba waabena aid̶aaruubʉrã, Dachi Akõreba dea b̶uu poyaabariid̶eeba aid̶ai b̶uu. Ne joma wáusturu jomaurãba Jesucristod̶eeba Dachi Akõre biꞌia kʉ̃riad̶amera. Ichíturu ewaricha biꞌia berread̶ai panuu. Biꞌia b̶uu ne joma ichi juad̶e uru b̶uai. Ãrea biꞌia b̶uu maka b̶uai.b
Cristod̶e ijãa b̶uu kakua biꞌiwãe b̶uu ʉ̃rʉbena
12 Ãbarã, machi ãrea biꞌiwãe panuud̶eeba ãrea kʉ̃risiarã́sturu. Maka panuu Cristod̶e biꞌia ijãad̶ai baita. Maud̶eeba maka ãrea biꞌiwãe panad̶aabai panuu kʉ̃risiarã́sturu. 13 Maumaarã Cristo biꞌiwãe b̶uasii kĩra ãrea biꞌiwãe panuud̶eeba kĩrajʉʉ panásturu. Maka Dachi Akõreba Cristo chi mechiu nii unubiiruud̶e machi ãrea kĩrajʉʉd̶ai. 14 Machi Cristod̶e ijãa panuu kakua kachirua jaraaduubʉrã, Dachi Akõre daad̶e ãrea biꞌia nuree. Dachi Akõre Jauri kĩrawãrea nii machi ome b̶uu. 15 Machi ãrea biꞌiwãe duanumina, nau kakua biꞌiwãe panad̶ai biawãe b̶uu: mia bead̶a kakua, nechiruad̶a kakua, kachirua waud̶a maebʉrã chĩara nebʉrad̶e b̶uad̶a kakua. 16 Maamina ab̶auba Cristod̶e ijãa b̶uud̶eeba ãrea biꞌiwãe b̶uaruubʉrã, peraiwãe b̶uu. Maumaarã Cristod̶eeba Dachi Akõre biꞌia kʉ̃riai b̶uu. 17 Jãabae Dachi Akõreba ichid̶irã nebʉra ichiai. Dachi Akõreba dachi naa ichiaruubʉrã, ¿chi bed̶ea bia Dachi Akõre ʉ̃rʉbena ijãawẽa nuree saka panad̶aima?
18 «Chi ẽbẽra jipa nii karibai baita chaarea b̶uubʉrã, ¿chi Dachi Akõre ida b̶uped̶a kachirua waubarii saka karibaima?»
19 Maud̶eeba chi Dachi Akõreba kʉ̃ria b̶uu kĩra ãrea biꞌiwãe nuree ichi juad̶e b̶ud̶aped̶a ne biꞌia waud̶ai panuu. Dachi Waud̶ad̶e poyaa ijãad̶ai.