Santiago
Karta Santiagoba b̶ʉd̶a
Jesús ãba Santiagoba nau karta b̶ʉsii. Mau Santiagoba arab̶aed̶e Jesusd̶e ijãawẽa b̶uasii (Juan 7:1-9). Maamina ichi Jesusd̶e ijãabadaurã tãed̶e chi mechiu b̶eesii. Hechos kartad̶e dachiba mau unubadau (Hechos 12:17; 15:12-21; 21:17-19). Santiago Jerusalend̶e b̶uabachii. Año 62 ichi Jesusd̶e ijãa b̶uu kakua beasid̶au.
Santiagoba nau karta Israel 12 warrarãd̶ebena neeped̶aad̶arã druacha nuree baita b̶ʉsii. Waabenarãmaarã mauba jara b̶uu ãbarã judiorã baita b̶ʉsii. Waabenarãmaarã jara b̶uu joma Jesusd̶e ijãabadaurã baita b̶ʉsii.
Santiagoba nau karta b̶ʉsii kuitaabii baita nau druad̶e saka nibad̶ai panuu. Capítulo 1:1-18 b̶ʉ kub̶uu dachiba Dachi Akõre kʉ̃risia kuitaa maud̶e joma dauchia jãadua b̶uai ʉtaa id̶i panuu. Mawãare Dachi Akõre biawãra ijãa b̶uai ʉ̃rʉbena b̶ʉ kub̶uu (1:19—2:26). Mawãare b̶ʉ kub̶uu dachi kẽrame ome kauwad̶ai ʉ̃rʉbena maud̶e nau drua kʉ̃riad̶aabai panuu ʉ̃rʉbena (3:1—5:6). Kaad̶eare b̶ʉ kub̶uu dachiba joma dauchia jãadua panuud̶e waabenarã biꞌia aid̶ad̶ai ʉ̃rʉbena (5:7-20).
Chi kʉ̃risia mechiu b̶uu 2:8 naka b̶ʉ kub̶uu: «Machiba Moisesba b̶ʉd̶ad̶ebena chi mechiu b̶uu biawãra wau panuubʉrã, biꞌia wau panuu. Dachi Akõre bed̶ead̶e mau Moisesba b̶ʉd̶ad̶e naka jara b̶uu: “Ab̶au kʉ̃riáse ara bichi kʉ̃ria b̶uu kĩra”».