Ab̶au bid̶a ome kĩra awara waud̶aabai panuu
2
1 Ãbarã, machiba dachi bia nii Mechiu Jesucristod̶e ijãa panuud̶eeba ab̶a chi waabenarã audeara biꞌia waurã́sturu. 2 Machi araa ãbua duanuud̶e ẽbẽra ab̶aba juad̶e nee waud̶a jʉ̃ b̶uu, paru mipitaa ãrea id̶ibadau b̶uu jʉ̃ b̶uu ed̶a neeruubʉrã, maud̶e ẽbẽra chi nejarr barauwãe niiba paru sore jʉ̃ b̶uu ed̶a neeruubʉrã, ¿Kãare sãad̶aima? 3-4 Machiba chi ãrea mipitaa jʉ̃ b̶uu biꞌia unud̶aped̶a maumaa nama biꞌia b̶uumaa akʉ b̶eese aaduubʉrã, maud̶e chi nejarr barauwãe nii jamaria b̶ari nub̶eese aaduubʉrã, maebʉrã nama mʉ jʉ̃rʉ kaita jeed̶a akʉ b̶eese aaduubʉrã, ¿maarã ome ara machi tãed̶e kĩra awara wau panuuwãeka? ¿Kʉ̃risia kachiruad̶eeba maka jidea panuuwãeka?5 Ãbarã mʉa kʉ̃riakuabarii, ¡ũrísturu! ¿Dachi Akõreba nau iujãad̶e chi nejarr barauwãe nuree Jesucristod̶e ijãad̶amera karibasiiwãeka? Maka maarã barau panuu kĩra nuree. Dachi Akõreba maarã ichi juad̶e ua b̶uai. Maka biawãra jarasii, chi ichi kʉ̃ria nureerãmaa. 6 Maamina machiba chi mau chi nejarr barauwãe nii biꞌia nii ichiad̶akau. Mʉʉba id̶iiruu: ¿Kairãba machi kachirua waubadama? Chi maka waubadaurã ¿chi nejarra barau nureewãeka? ¿Maarãba machi juezrãmaa erta adoebadauwãeka? 7 Machi Jesucristod̶erãbʉ. Maamina ¿maarãba ichi trʉ̃ bia ʉ̃rʉbena kachirua jarabadauwãeka?
8 Machiba Moisesba b̶ʉd̶ad̶ebena chi mechiu b̶uu biawãra wau panuubʉrã, biꞌia wau panuu. Dachi Akõre bed̶ead̶e mau Moisesba b̶ʉd̶ad̶e naka jara b̶uu: «Waabenarã kʉ̃riáse ara bichi kʉ̃ria b̶uu kĩra». 9 Maamina machiba waabenarãmaa kĩra awara wau panuubʉrã, kachirua wau panuu. Moisesba b̶ʉd̶ad̶e jara b̶uu machi maud̶eeba nebʉra bara panuu. 10 Ab̶auba Moisesba b̶ʉd̶ad̶ebena ab̶a bid̶a wauwẽebʉrã, mau joma wauwẽa b̶uud̶eeba nebʉra bara b̶uai. 11 Nau kĩra b̶uu. Dachi Akõreba jarasii «junebena miakãid̶a ome kãi b̶eerã́se» maud̶e «mia bearã́se». Junebena wẽra ome kãi b̶eewẽa b̶umina maamina mia bearuubʉrã, Moisesba b̶ʉd̶a wauwẽa b̶uu. 12 Kauwa berreásturu maud̶e jipa wáusturu, Dachi Akõreba chi dachi enabarii leyba dachi nebʉra ichiaid̶eeba. 13 Chi waabenarã kĩra chuburiakau Dachi Akõreba ichiaruud̶e kĩra chuburiabai. Maud̶e chi waabenarã kĩra chuburiabadau biꞌia nuread̶ai.
Cristod̶e biawãra ijãa b̶uuba biꞌia waubarii
14 Ãbarã, ab̶auba Jesucristod̶e biawãra ijãa b̶uu aaruubʉrã, maamina biꞌia wauwẽa b̶uubʉrã, ¿mau aid̶ai b̶uka? ¿Mau biawãra karibai b̶uka? 15 Nau kĩra b̶uu. Ãbaba maebʉrã neekauba paru jʉ̃i baita maud̶e koi baita wãꞌãe b̶uubʉrã, 16 maud̶e ab̶a machid̶ebenaba ichimaa jaraaruubʉrã, «mʉʉba kʉ̃ria b̶uu bichi biꞌia wãi, paru jʉ̃i baita uru b̶uai maud̶e ãrea ko b̶uai», maamina ne ab̶a bid̶a deawẽebʉrã, ¿mau jarad̶a aid̶aika? Aid̶akau. 17 Ara mau kĩra chi Jesucristod̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Mauba ijãa b̶uu a b̶uu, ẽbẽra biud̶a kĩra nii.
18 Maamina ab̶auba naka jaraaruu: «Bichiba Jesucristod̶e ijãa b̶uu abarii maud̶e mʉʉba biꞌia waubarii». Mʉʉba nau jaraaruu: bichiba biꞌia wauwẽa unubise, Jesucristod̶e biawãra ijãa b̶uu. Maud̶e biꞌia wau b̶uud̶eeba mʉʉba unubii Jesucristod̶e biawãra ijãa b̶uu. 19 Bichiba ijãa b̶uu Dachi Akõre ab̶aburu nii. ¡Ãrea biꞌia b̶uu! Jai kachiruarã bid̶a maka ijãa panuu, maamina Dachi Akõre wapeaba uribadau.
20 ¡Bichi kʉ̃risiaswãe nii! Chi Jesucristod̶e ijãa b̶uu a b̶uuba biꞌia wauwẽebʉrã biawãra ijãawẽa b̶uu. ¿Mʉʉba bichimaa kuitaabii b̶uka? a 21 ¿Dachi chi judiorã akõre Abrahamba waud̶a Dachi Akõreba mau jipa unuubaska? Dachi Akõreba Abrahammaa ichi warr Isaac baa deábad̶e asiid̶e Abrahamba makad̶e wãsii. ¿Dachi Akõreba ichi mau kakua jipa nii unuubaska? 22 Bichiba kuitaa b̶uu Abrahamba maka wausii, biawãra Dachi Akõred̶e ijãasiid̶eeba. Maud̶e maka wausiid̶eeba unubisii Dachi Akõred̶e biawãra ijãa b̶uu. 23 Abrahamba waud̶aba kuitaabi b̶uu Dachi Akõre bed̶ead̶e b̶ʉ kub̶uu biawãrabʉ. Naka b̶ʉ kub̶uu: «Abrahamba Dachi Akõred̶e ijãasii. Maud̶eeba Dachi Akõreba mau nebʉraswãe nii unusii». Maud̶e Abraham Dachi Akõre ome kõpaero abachid̶au.b
24 Maud̶eeba machiba kuitaa panuu Dachi Akõreba dachi jipa unukau, bari dachiba ichid̶e ijãa panuu a panuud̶eeba, maumaarã jipa unu b̶uu ichid̶e ijãaped̶aad̶a biꞌia wau panuud̶eeba.
25 Ara mau kĩra wẽra aud̶ua nii Rahaba waud̶a kakua Dachi Akõreba ichi jipa nii unusii. Josueba bʉid̶arã orrõodad̶amera ichi ded̶e biꞌia irsibisii maud̶e o ãyare waya wãbisii. 26 Biud̶a jauri wãꞌãe nii. Ara mau kĩra Dachi Akõred̶e ijãa b̶uu a b̶uuba biꞌia wauwẽebʉrã, biawãra ijãawẽa b̶uu. Ichiba ijãa b̶uu a b̶uu ẽbẽra biud̶a kĩra nii.