Santiago
Karta Santiagoba b̶ʉd̶a
Nebʉra barau b̶uud̶e dauchia jãadua b̶uai ʉ̃rʉbena
1
1 Mʉ Santiagobʉ, Dachi Akõre baita bari trajabarii maud̶e Dachi Mechiu Jesucristo baita bari trajabarii. Nau karta b̶ʉʉruu Israel 12 warrarãd̶ebena neeped̶aad̶arãa druacha nuree baita. Mʉʉba kʉ̃ria b̶uu machi biꞌia panad̶ayu.2 Ãbarã, barikia ãrea biꞌiwãe panuud̶e kĩrajʉʉ panásturu. 3 Machiba kuitaa panuu maka ãrea biꞌiwãe panuud̶e Dachi Akõred̶e ijãa paneeduubʉrã, biꞌia dauchia jãaduad̶ai kuitaad̶ai. 4 Mau biawãra dauchia jãadua paneeduubʉrã, ne jomad̶e biꞌia, jipa nuread̶ai. B̶istĩika bid̶a nistad̶awẽa panuu nuread̶ai.
5 Machid̶ebena ab̶aba kʉ̃risia kuitaawẽa niibʉrã, Dachi Akõremaa ʉtaa id̶ii b̶uu. Maabae Dachi Akõreba deai. Ichimaa ʉtaa id̶iiduubʉrã iadaawẽa sõbiad̶eeba jomaurãmaa deabarii. 6 Maamina biawãra ijãa b̶uud̶eeba ʉtaa id̶i b̶uu. B̶istĩika bid̶a kʉ̃risiabai b̶uu Dachi Akõreba deabai. Maka kʉ̃risia b̶uu pũaturãba mar ʉ̃rape ãyaa adoebarii kĩra b̶uu. 7 Chi maka b̶uuba kʉ̃risiabai b̶uu Dachi Mechiud̶ebena ne adaui. 8 Ichi kʉ̃risia ome uru b̶uud̶eeba arab̶au kʉ̃risiad̶e b̶uakau.
9 Ãba chi nejarra barauwãe nii kĩrajʉʉ b̶uai b̶uu Dachi Akõre daad̶e mechiud̶eeba. 10 Maamina chi ẽbẽra barau nii kĩrajʉʉ b̶uai b̶uu Dachi Akõreba ichi chi nejarr barauwãe nii unu b̶uud̶eeba. Ẽbẽra barau nii ãrea b̶uabai nepono ãrea b̶uakau kĩra. 11 Ʉmada neeruud̶e pisiaba nepono kidua bʉʉbarii. Maabae chi nepono b̶aeped̶a chi mipitaa wãꞌãebarii. Ara mau kĩra ẽbẽra barau nii ewaricha chi nejarra adaui baita b̶uu biui.
12 Ab̶a kachirua waui kʉ̃risia dauchia jãadua b̶uubʉrã, Dachi Akõre daad̶e ãrea biꞌia b̶uu.b Joma dauchia jãaduaruud̶e Dachi Akõreba boro jũra dearuu kĩra ichi ewaricha chokae b̶uabii. Dachi Akõreba joma ichi kʉ̃ria nureerã biawãrad̶eeba maka chokae b̶uabiai.
13 Kachirua waui kʉ̃risia b̶eeruud̶e ab̶au bid̶a jaraabai b̶uu Dachi Akõreba mau makabii b̶uu. Dachi Akõreba kachirua waui kʉ̃risiakau maud̶e ab̶aumaa bid̶a mau makabikau. 14 Maumaarã kachirua waui kʉ̃risia b̶eebarii ara dachiba maka wau kʉ̃ria panuud̶eeba. 15 Kachirua waui kʉ̃risiaped̶a mau wau b̶eebarii. Maka wau b̶eesiid̶eeba biuruud̶e Dachi Akõred̶ebena ewaricha awara b̶uai.
16 Ãbarã mʉa kʉ̃riakuabarii, ara machi du ab̶a nau ʉ̃rʉbena setaa kũruarã́sturu: 17 Ʉtareeba Dachi Bajãad̶ebena Akõreba ne joma ãrea biꞌia b̶ee dachimaa deabarii. Ichiaburu ne joma bajãad̶e koabadau waukuasii. Maarã ewaricha arab̶aud̶e koad̶akau. Maumaarã Dachi Akõre kĩra awara b̶uakau maud̶e diware waukau. 18 Ichi kʉ̃riad̶eeba ichi bed̶ea biawãrad̶eeba dachi chokae b̶uabiasii. Maka ne uu nub̶uud̶ebena nabena chaud̶a ichimaa dead̶a kĩra dachi joma ichiba waud̶ad̶ebena ichi baita biꞌia panuu.
19 Ãbarã mʉa kʉ̃riakuabarii, nau kʉ̃risia panásturu: Jomaurãba biꞌia ũrid̶ai baita nuread̶ai panuu, biꞌia nuread̶ai panuu, maud̶e barikia isa kĩrud̶aabai panuu. 20 Dachi kĩruuduud̶e Dachi Akõreba jipa waubi b̶uu waud̶akau. 21 Maud̶eeba ne joma kachirua maud̶e ne joma jipawãe b̶uu ida b̶ústuru. Maabae Dachi Akõreba ichi bed̶ea machi sõd̶e b̶ud̶a kʉ̃risia biad̶eeba ijã́sturu. Ara mau bed̶eaba machi Dachi Akõreba kastikaid̶ebena karibai.
22 Dachi Akõre bed̶ea jara b̶uu kĩra wau panásturu. Ab̶aburu ũriiduu panarã́sturu. Maka nureebʉrã, ara machi du ab̶a setaa kũrua nuread̶ai. 23 Dachi Akõre bed̶ea ũri b̶uuba mau wauwẽebʉrã, ẽbẽraba ichi kĩedarr chi ichiabariid̶e unubarii kĩra b̶uu. 24 Maka unuuruud̶e ichi saka b̶uu unubarimina, ãyaa wãaruud̶e ara makʉd̶e wãꞌãebibarii. 25 Maamina barikiuba Dachi Akõre bed̶ea ũrid̶a kĩraba b̶uai ida b̶uwẽebʉrã, ãrea biꞌia b̶uai. Ẽbẽraba mau bed̶ea jipa b̶uu dachi kariba b̶uu ewaricha biꞌia kʉ̃risiaped̶a wau b̶uubʉrã, ichiba maka wau b̶uud̶eeba ãrea biꞌia b̶uai.
26 Ab̶auba Dachi Akõred̶e ijãa b̶uu kʉ̃risia b̶uubʉrã, maamina ichi kẽrame biꞌia nuwẽebʉrã, ara ichi du ab̶a setaa kũrua b̶uu. Biawãra bari ijãa b̶uu. 27 Chi biawãra ijãa b̶uuba naka waui b̶uu Dachi Bajãad̶ebena Akõrebac ichiba wau b̶uu biꞌia unumera maud̶e jipa unumera: jẽramara maud̶e pẽdrãarã ãrea biꞌiwãe panuu aid̶ai b̶uu, maud̶e nau iujãad̶e nuree kachirua wau b̶uabai b̶uu.