Kauwa berread̶ai panuu
3
1 Ãbarã, machiba kuitaa panuu Dachi Akõreba dachi chi Ichi bed̶ea jaradeabadaurã aude ichiai. Maud̶eeba ãrea machid̶ebenaba jʉrʉd̶aabai panuu jaradeabadaurã nuread̶ai baita. 2 Joma dachiba ãrea biꞌiwãe waubadau. Ab̶auba berrearuud̶e ab̶a sõ puꞌuabikaubʉrã, ne jomad̶e jipa nii maud̶e ichi kakua joma jipa b̶uu.3 Dachiba mura itaed̶e jiorr kaabibadau dachi ijãamera. Maka mauba dachi wã kʉ̃ria panuumaa adoebadau. 4 Maud̶e jãba ʉ̃rʉbena kʉ̃risiásturu. Jãba mechiu nimina maud̶e pũatu ãrea puaruuba adoebarimina, chi ũubibariiba chi timón b̶istĩika b̶uu purrabarii ichi wã kʉ̃ria b̶uumaa wãi baita. 5 Ara mau kĩra chi kẽrame b̶istĩika b̶umina ara ichi ʉ̃rʉbena ãrea berreabarii. Kʉ̃risiásturu saka tʉbʉchia b̶aꞌãra koaruuba mode mechiu joma baabibarii. 6 Dachi kẽrame tʉbʉchia kĩra niid̶eeba joma kachirua jarabarii. Ab̶a mau dachi kakuad̶ebenad̶eeba dachi kakua joma pobibarii ab̶a biuduud̶aa. Maud̶e jʉbawãe niiba kachirua berreabiabarii tʉbʉchia koabiiruu kĩra.a
7 Barikiu ãnimara moded̶ebena, ibanarã, b̶i jãaba nureabadau maud̶e mard̶ebena ẽbẽrarãba jidaud̶aped̶a ʉmʉmʉrʉabibadau. 8 Maamina dachi kẽrame ome ab̶au bid̶a poyaad̶akau. Dachi kẽrameba joma kachirua berreabarii. Nearãa kachiruaba waabiru b̶uu kĩra b̶uu. 9 Dachi kẽrameba Dachi Bajãad̶ebena Mechiumaa biꞌia berreabadau maud̶e ara mau kẽrameba ẽbẽrarãmaa kachirua jarabadau, Dachi Akõreba mau ẽbẽra ara ichi kĩra waud̶amina. 10 Ara maud̶ebena okarrba bed̶ea bia maud̶e bed̶ea kachirua berreabarii. Ãbarã, mau makad̶aabai b̶uu. 11 Mied̶ebena bania, ¿bania kũaa maud̶e bania kuyaa chebarika? 12 ¿Higo bakuruba olivo jõ chaubarika? ¿Uvaba higo jõ chaubarika? Chaukau. Ara mau kĩra mied̶ebena bania kũaa maud̶e bania kuyaa chekau.
Chi biawãra kʉ̃risia kuitaa nii
13 Machi kʉ̃risia kuitaa nuree maud̶e ne kuitaa nuree kʉ̃risia panuubʉrã, unubísturu biawãra maka nuree, machi biꞌia nibabadaud̶eeba. Chi mechiu nuree kʉ̃risiad̶awẽa kʉ̃risia kuitaad̶eeba biꞌia waud̶ai panuu. 14 Maamina ab̶auba chi uru b̶uu kakua maebʉrã chi wau b̶uu kakua jiwaa duanuubʉrã, maud̶e waabenarã aude biꞌia nuread̶ai baita jʉrʉduubʉrã, jararã́sturu machi ne kuitaa nuree. Maka jaraaduubʉrã, chi biawãra bed̶ea ida b̶u panuu. 15 Machi kʉ̃risia kuitaad̶eeba maka kʉ̃risia panuubʉrã, mau kʉ̃risia kuitaa Dachi Akõred̶ebena neekau, maumaarã nau iujãad̶ebena, ẽbẽrarãd̶ebena maud̶e jʉbawãe niid̶ebena neebarii. 16 Chi waabenarãba uru panuu kakua maebʉrã wau panuu kakua jiwaa nuree, maud̶e chi waabenarã aude biꞌia nuread̶ai baita jʉrʉ nureerãba kʉ̃risia kachirua barikia kʉ̃risiabadau maud̶e ne joma kachirua waubadau. 17 Maamina chi Dachi Akõreba dea b̶uu kʉ̃risia kuitaa uru nureerãba ne jomad̶e jipa waubadau, jomaurã ome jirukaraayuwãe nuread̶ai baita jʉrʉbadau, jomaurã ome biꞌia panabadau, ab̶auba jara b̶uu ũrid̶ai baita panabadau, waabenarã kĩra chuburiabadau maud̶e ne joma biꞌia waubadau. Ab̶a waabenarã audeara biꞌia waud̶akau. Ichiba jara b̶uu kĩra biawãra waubarii. 18 Jirukaraayuwãe b̶uabariid̶eeba, waabenarã jirukaraayuwãe panabiabarii, ne uuruu kĩra. Mau ẽbẽraba unui chi waabenarãba jipa wau panuu, ne jõ bakuru biꞌia chaubarii kĩra.