Dachi Akõreba jara b̶uu joma wau panásturu
4
1 ¿Machi sakãe chĩobadama maud̶e oa kachirua berreabadama? Machiba kachirua wau kʉ̃ria panuu machi sõd̶e chĩo b̶uu maka waud̶amera. 2 Machiba ne adaud̶ai ãrea kʉ̃riabadamina poyaa adaud̶akau. Maud̶eeba mia beabadau. Waabenarãd̶e ne kaebea adaud̶ai kʉ̃riabadau. Maamina poyaa adaud̶akaud̶eeba oa kachirua berreabadau maud̶e chĩobadau. Machiba chi kʉ̃ria panuu adaud̶akau, Dachi Akõremaa ʉtaa id̶id̶akaud̶eeba. 3 Maud̶e machiba Dachi Akõremaa ʉtaa id̶iiduud̶e ne poyaa adaud̶akau kʉ̃risia kachiruad̶eeba ʉtaa id̶ibadaud̶eeba. Machiba ʉtaa id̶ibadau, ara machiaburu kʉ̃ria panuu kĩra waud̶ai baita. 4 Junebena wẽra ome kãiduu kĩra machiba Dachi Akõre ida b̶uu panuu nau iujãad̶ebenarãba waubadau kĩra waud̶ai baita. ¿Machiba wabid̶a adua panuka chi nau iujãad̶ebena kʉ̃ria b̶uu Dachi Akõre ome chi kĩramaa? Biawãra barikiuba nau iujãad̶ebena kʉ̃ria b̶uubʉrã, Dachi Akõre ome chi kĩramaa b̶eei. 5 Dachi Akõreba dachi sõd̶e b̶ud̶a Jauriba kʉ̃ria b̶uu Dachi Akõréturu kʉ̃ria panad̶amera. ¿Machiba kʉ̃risia panuka Dachi Akõre bed̶ead̶e bari ara jãka b̶ʉbisii? 6 Maamina Dachi Akõreba ichi sõbiad̶eeba dachi ãrea aid̶a b̶uu. Maud̶eeba Ichi Bed̶ead̶e naka b̶ʉ kub̶uu:«Chi nejuakaya nuree Dachi Akõreba ida biꞌia b̶uabikau.
Maamina chi mechiu kʉ̃risiawẽa nuree Dachi Akõreba ichi sõbiad̶eeba aid̶abarii».
7 Maud̶eeba Dachi Akõre juad̶e panásturu. Jʉbawãe nii ijãarã́sturu. Maka ichi machid̶ebena ãyaa wãi. 8 Dachi Akõre kaita nésturu, makarã ichi machi kaita neei. Machi chi kachirua waubadaurã, ¡machi jua jeraaduu kĩra waa kachirua waurã́sturu! Machi kʉ̃risia ome uru nuree, ¡kʉ̃risia kachirua ida b̶ud̶aped̶a Dachi Akõréturu kʉ̃risiásturu! 9 Machiba kachirua wauped̶aad̶a kakua kĩra nomaa panásturu, jẽásturu, biuchaa jẽásturu. Waa kĩrajʉʉ ʉirã́sturu, maumaarã machiba kachirua wauped̶aad̶a kakua ãrea jirukaraa panásturu. 10 Chi waabenarã audeara mechiuwãe nuree, Dachi Mechiu daad̶e nésturu. Maka mauba machi chi mechiurã b̶ui.
Waabena ʉ̃rʉbena kachirua jararã́sturu
11 Ãbarã, waabenarã ʉ̃rʉbena kachirua jararã́sturu. Ab̶auba ichi ãba ʉ̃rʉbena kachirua jaraaruubʉrã maebʉrã jidearuubʉrã, Moisesba b̶ʉd̶a ʉ̃rʉbena kachirua jara b̶uu, maud̶e mau Moisesba b̶ʉd̶a jidea b̶uu.a Ab̶auba Moisesba b̶ʉd̶a maka jideai kʉ̃risia b̶uubʉrã, mau Moisesba b̶ʉd̶ad̶e jara b̶uu wauwẽa b̶uu. Moisesba b̶ʉd̶ad̶e jara b̶uu audeara ichi waabenarã nebʉra ichiabarii b̶eesii. 12 Maamina mau Moisesba b̶ʉd̶a Dachi Akõréburu deasii. Jãuburu dachi nebʉra ichiabarii. Ab̶a jãuburu ẽbẽrarã poyaa karibai maud̶e poyaa dachi nebʉra ichiai. Maud̶eeba ¿bichi kaima, bichi ãba nebʉra ichiai baita?
Ara machi ʉ̃rʉbena arakʉd̶e kʉ̃risiásturu
13 ¡Mʉ bed̶ea ũrísturu! Waabenarãba naka jarabadau: «Id̶i maebʉrã nu dachi junebena puurud̶aa wãd̶ai. Aria año ab̶a paneed̶ai. Maud̶e ne waud̶ai chi nejarra adaud̶ai baita». 14 Maamina machiba adua panuu nubena ewarid̶e kãare sãai. ¿Machiba kuitaa panuka nubena ewarid̶e chokae nuread̶ai? Adua panuu. Machi jʉ̃rʉara kĩra nuree. Jʉ̃rʉara neeped̶a isa wãꞌãebarii kĩra, machi sid̶a kãꞌãabariwãe nuread̶ai. 15 Maud̶eeba biꞌia b̶uu machiba naka jarad̶ayu: «Dachi Mechiuba kʉ̃riaruubʉrã, dachi chokae nuread̶ai. Maabae ne waukuad̶ai». 16 Maamina machiba maka waud̶akau. Maumaarã chi mechiu nuree kʉ̃risia panuud̶eeba jarabadau machiba wau kʉ̃ria panuu poyaa waud̶ai. Biawãra mau kachirua b̶uu. 17 Chi biꞌia waui kuitaa b̶uuba maka wauwẽebʉrã, kachirua wau b̶uu.