Santiago 5

Dachi Akõreba barau nuree iadaai ʉ̃rʉbena

1 Chi nejarra barau nuree, ¡mʉ bed̶ea ũrísturu! ¡Kĩra nomaa jẽásturu, kãꞌãabariwãed̶e machi nebʉrad̶e paneed̶aid̶eeba! 2 Joma machiba uru panuu b̶eraad̶a kĩra b̶uu. Machi paru simiaba kod̶a kĩra b̶uu. 3 Nau kaad̶ebena ewarid̶e machiba chi nejarra aribia ʉyaa panuu. Maamina machi nee maud̶e parata mokokoro chau b̶uu. Dachi Akõreba ichiaruud̶e machi parata arab̶aud̶e mokokoro chau b̶uuba kuitaabii machiba kachirua wauped̶aad̶a. Maud̶eeba tʉbʉchiaba ãrea biꞌiwãe panad̶ai. 4 Machi ne uu nub̶uud̶e trajabadaurãmaa chi nejarra dead̶awẽa panuu ãchi traju bare. Maud̶eeba ãchiba Dachi Akõremaa ʉtaa id̶i panuu kastikamera. ¡Ũrísturu! Dachi Mechiu chi joma poyaa wau b̶uuba ũrisii maarãba ʉtaa id̶iped̶aad̶a. 5 Nau iujãad̶e machiba ne joma uru panuu maud̶e machiba wau kʉ̃ria panuu waubadau. Maka machi sõ boreabi panabachid̶au, paka boreabibadau kĩra. Maamina paka beaduu kĩra kãꞌãabariwãed̶e Dachi Akõreba machi kastikai. 6 Machiba chi ẽbẽra jipa nii nebʉra barau ad̶aped̶a beasid̶au. Maud̶e mauba ne waubasii bearãad̶amera.

Joma dauchia jãadua panásturu

7 Maud̶eeba ãbarã, joma dauchia jãadua panásturu ab̶a Dachi Mechiu neeruud̶aa. Ne uu nub̶uud̶e ẽbẽraba wau b̶uu ʉ̃rʉbena kʉ̃risiásturu. Ichi pead̶e uuruud̶e, apii esed̶aubarii kui cheeruud̶e chi uud̶a tonomera maud̶e warimera. Ara maka nubarii kui maucha cheeruud̶e, mau uud̶a biꞌia chaumera. 8 Ara mau kĩra joma dauchia jãadua panuud̶eeba esed̶au panásturu maud̶e sõd̶eeba ijãa panásturu, Dachi Mechiu Jesucristo kãꞌãabariwãed̶e neeid̶eeba. 9 Ãbarã, waabena ʉ̃rʉbena kachirua jararã́sturu, Jesucristoba machi ichiarãamera. Jesucristo dachi nebʉra ichiabarii kãꞌãabariwãed̶e neei.

10 Ãbarã, kʉ̃risiásturu saka Dachi Akõre baita berreabadaurãba dauchia jãaduaped̶aad̶a ʉ̃rʉbena. Dachi Mechiu trʉ̃d̶eeba berreasid̶au kakua ãrea biꞌiwãe panad̶a joma dauchia jãaduasid̶au. Ara mau kĩra machia bid̶a joma dauchia jãaduad̶ai panuu. 11 Dachimaarã, chi ãrea biꞌiwãe panuud̶e dauchia jãadua nuree ãrea biꞌia nuree. Machiba ũribadau Job ichi ewarid̶e ãrea biꞌiwãe b̶uad̶a joma dauchia jãaduasii. Mau ewari ãrea nebʉrad̶e b̶uaped̶a, kuitaa panuu Dachi Mechiuba ichi biꞌia b̶usii. Mauba kĩra chuburia b̶uu maud̶e kʉ̃riad̶eeba aid̶ai b̶uu.

Dachi Akõremaa ʉtaa id̶ísturu

12 Mau awara ãbarã, ab̶au trʉ̃d̶e biawãra ne waud̶ai arã́sturu. Bajãa trʉ̃d̶eeba, nau iujãa trʉ̃d̶eeba maebʉrã barikiad̶e biawãra waud̶ai arã́sturu. Waud̶ai aaduubʉrã, biawãra wáusturu. Maud̶e waud̶awẽe aaduubʉrã, biawãra waurã́sturu. Maka Dachi Akõreba machi nebʉra ichiabai.

13 Machid̶ebena ab̶a ãrea biꞌiwãe b̶uubʉrã, Dachi Akõremaa ʉtaa id̶i b̶uu. Ab̶a kĩrajʉʉ b̶uubʉrã, karid̶eeba Dachi Akõremaa biꞌia kʉ̃riai b̶uu. 14 Machid̶ebena ab̶a ẽpermo b̶uubʉrã, chi ijãabadaurã nubadaurã chõrarã iui b̶uu mau baita Dachi Akõremaa ʉtaa id̶id̶amera. Ãchiba ʉtaa id̶iiduud̶e Dachi Mechiu Jesús trʉ̃d̶e olivo draaba b̶aꞌãra purud̶ai panuu. 15 Maud̶e ijãa panad̶ai panuu Dachi Akõreba mau aribiabii. Maka ʉtaa id̶iiduubʉrã Dachi Mechiuba aribiabii. Chi ẽpermo b̶uad̶aba kachirua waud̶abʉrã, Dachi Mechiuba mau perdonai. 16 Mau baita machiba kachirua wauped̶aad̶a chiya jarásturu. Maud̶e ãbua Dachi Akõremaa ʉtaa id̶ísturu biꞌia duanad̶ai baita. Ẽbẽra jipa b̶uuba Dachi Akõremaa ʉtaa id̶iiruubʉrã Dachi Akõre poyaabariid̶eeba ne aribia waubarii. 17 Elías dachi kĩra ẽbẽra basii. Mauba sõd̶eeba Dachi Akõremaa ʉtaa id̶isii kui cherãamera. Maabae Israel druad̶e año õbea y medio kui cheebasii. 18 Mau maad̶akare ichiba Dachi Akõremaa ʉtaa id̶isii kui chemera. Ara makʉd̶e kui chesii. Mauba ne uu nub̶uu tonoped̶a chausii.

19-20 Ãbarã, nau kuitásturu: chi biawãra bed̶ead̶ebena ab̶a ãyaa wãaruubʉrã, maud̶e ab̶auba ichimaa kachirua ida b̶ubiped̶a waya neebiiruubʉrã, mau ẽbẽraba kachirua ãrea wau b̶uad̶a Dachi Akõreba perdonaped̶a, ewaricha Dachi Akõre awara b̶uai bad̶ad̶ebena karibai.