Jerusalend̶aa wãped̶aad̶a
21
1 Mau ãbarã b̶ʉid̶aped̶a dai jãbad̶e Cos islad̶aa jipa wãsid̶au. Norema Roda islad̶aa wãd̶aped̶a Patará puurud̶e neesid̶au. 2 Mau Patarad̶e jãba Fenicia druad̶aa wãi baita nub̶uu unusid̶aud̶e maud̶e ataud̶aped̶a wãsid̶au. 3 Wãaduud̶e Chipre isla mechiu jua sordoare unusid̶au maamina Siria druare wãsid̶au, aria Tiro puurud̶e chi trajabadaurãba chi jãbad̶ebena chi ne adoeduu awara jirakuad̶ai panasid̶aud̶eeba.4 Aria daiba chi Jesusd̶e ijãabadaurã unuped̶aad̶ad̶eeba ãchi ome 7 ewari paneesid̶au. Maud̶e ãchiba Dachi Akõre Jaurid̶eeba Pablomaa jarasid̶au Jerusalend̶aa wãrãamera. 5 Maamina 7 ewari basiid̶e dai wãsid̶au. Joma ãbarã, ãchi wẽrarã maud̶e ãchi warrarã dai baara puuru awara wãsid̶au. Aria mar iikaa ibud̶e õdarrd̶e duaneed̶aped̶a Dachi Akõremaa ʉtaa id̶isid̶au. 6 Maabae wãd̶ai ad̶aped̶a jãbad̶e atausid̶au. Ãchi deed̶aa wãsid̶au.
7 Maabae Tirod̶ebena jãbad̶e wãd̶aped̶a Tolemaida puurud̶e neesid̶au. Aria ãbarã ichiad̶e wãd̶aped̶a mau ome ewari ab̶a paneesid̶au. 8 Norema wãd̶aped̶a Cesarea puuru mechiud̶e neesid̶au. Aria Felipe ded̶e paneesid̶au. Mau Felipe chi bed̶ea bia Jesús ʉ̃rʉbena jarabarii basii. Ãbarã aid̶abadaurã 7 jʉrʉ adauped̶aad̶ad̶ebena ab̶a basii. 9 Ichiba kaurã duurã kimare uru b̶uasii. Mau wẽrarã Dachi Akõre baita berreabadaurã basii.
10 Aria ewari b̶aꞌãra panuud̶e Dachi Akõre baita berreabarii Agabo Judea druad̶ebena neesii. 11 Dai ichiad̶e neesiid̶e Pablo kʉrrd̶e jʉ̃barii adausii. Mauba ara ichi jʉ̃rʉ maud̶e jua jʉ̃ped̶a naka jarasii:
—Dachi Akõre Jauriba naka jara b̶uu: nau kʉrrd̶e jʉ̃barii chibari judiorãba Jerusalend̶e naka jʉ̃d̶ai. Maabae judiowãerãmaa jidau dead̶ai.
12 Mau ũrisid̶aud̶e daiba maud̶e ãbarã Cesarea puurud̶ebenarãba Pablomaa chi chuburia id̶isid̶au Jerusalend̶aa wãrãamera. 13 Maamina Pabloba jarasii:
—¿Sakãe jẽa panuma? ¿Sakãe mʉ jãka kĩra nomaabi panuma? Ab̶aburu mʉ jʉ̃d̶ai baita b̶uwãema, maumaarã mʉ Mechiu Jesús kakua Jerusalend̶e biui baita b̶uu.
14 Maud̶e daiba ichimaa jara paneesid̶au wãrãamera maamina daiba ichi kʉ̃risia poyaad̶aabasii. Maud̶eeba waa mau ʉ̃rʉbena berread̶aabasii. Maumaarã jarasid̶au:
—Makase, Dachi Mechiuba kʉ̃ria b̶uu kĩra waui.
15 Maabae wãd̶ai baita joma waud̶aped̶a Jerusalend̶aa wãsid̶au. 16 Waabenarã Jesusd̶e ijãabadaurã Cesarea puurud̶ebena dai baara wãsid̶au. Ãchiba ẽbẽra Nasóna abadaumaa adoed̶aped̶a dai ichi ded̶e paneesid̶au. Mau Chipred̶ebena basii. Jesusd̶e ijãa b̶uu ãrea ba b̶uasii.
Pablo Jerusalend̶e Santiago ome berread̶a
17 Jerusalend̶e neesid̶aud̶e ãbarãba dai ãrea kĩrajʉʉ adoesid̶au. 18 Norema Pablo dai ome Santiago ichiad̶e wãsid̶au.b Ãbarã nubadaurã sid̶a joma aria duanasid̶au. 19 Maabae Pabloba «ajá» aped̶a Dachi Akõreba chi Pablod̶eeba judiowãerã tãed̶e waud̶a joma arakʉd̶e nebʉrʉsii. 20 Mau ũrisid̶aud̶e ãbarãba Dachi Akõremaa biꞌia berreasid̶au. Maabae ãchiba Pablomaa jarasid̶au:
—Ãba, bichiba kuitaa b̶uu judiorã ãreaba Jesusd̶e ijãa panuu. Maud̶e Moisesba b̶ʉd̶a ãchiba ãrea ijãabadau. 21 Maamina bichi ʉ̃rʉbena setaa ũrisid̶au. Waabenarãba ãchimaa jarasid̶au bichiba joma judiorã griego tãed̶e nureerãmaa Moisés ida b̶ubi b̶uu, ãchi warrarã mukĩra chi kakua tõobiakau maud̶e waabena dachi judiorãba waubadau sid̶a waubiakau. 22 ¿Saka waud̶aima mau setaa kuitaad̶amera? Bichi need̶a kãꞌãabariwãed̶e kuitaad̶ai. Maabae biawãra bichi kachirua waud̶ai baita araa ãbua imid̶ai.c
23 Maud̶eeba daimaarã bichiba naka waui b̶uu: dai tãed̶e ãbarã kimare panuu. Ãchiba Dachi Akõre daad̶e ne waud̶ai jaraped̶aad̶a joma wauduu. 24 Mau ãbarã Dachi Akõre de mechiud̶aa adoese. Aria Dachi Akõre daad̶e biꞌia nuread̶ai baita wáusturu. Ãchiba Dachi Akõremaa dead̶ai panuu bichiaburu dease. Makarã ãchi poyaa boro metad̶ai kuitaabiad̶ai baita ãchiba ne waud̶ai jaraped̶aad̶a joma wausid̶au. Mauba jomaurãba kuitaad̶ai chi bichi ʉ̃rʉbena jara panuu seta b̶uu maud̶e kuitaad̶ai bichi biawãra jipa nibabarii Moisesba b̶ʉd̶ad̶e jara b̶uu kĩra. 25 Maamina judiowãerã Jesusd̶e ijãabadaurãba waud̶ai panuu daiba kuitaa jarad̶aped̶a kartad̶e b̶ʉsid̶au: Dachi Akõre kĩra nuree juaba kaped̶aad̶amaa kiuru baa deaped̶aad̶a kod̶aabai panuu, dachi kakuaba barikia kachirua wau kʉ̃ria b̶uu nibad̶aabai panuu, ãnimara otãabara bead̶a kod̶aabai panuu maud̶e oa sid̶a kod̶aabai panuu.
26 Norema Pabloba mau ẽbẽrarã ichi baara adoeped̶a, ne wausid̶au Dachi Akõre daad̶e biꞌia nuread̶ai baita. Maud̶e Dachi Akõre de mechiud̶aa wãd̶aped̶a jarasid̶au sãu ewarid̶e Dachi Akõre daad̶e biꞌia panad̶ai. Mau ewarid̶e ãchicha Dachi Akõremaa ãnimara baa dead̶ai panasid̶au.
Judiorãba Pablo jidauped̶aad̶a
27 Maamina 7 ewari bamaa b̶uud̶e waabenarã judiorã Asia druad̶ebena Dachi Akõre de mechiu dud̶a panasid̶au. Mau judiorãba Pablo unusid̶aud̶e joma ẽbẽrarã aria duanuu kĩrubikad̶aped̶a Pablo jidausid̶au. 28 Maud̶e jĩwa jara panasid̶au: «¡Israeld̶ebenarã, dai aid̶ásturu! Nau ẽbẽraba druacha jaradea b̶uu dachi israeld̶ebenarã, Moisesba b̶ʉd̶a maud̶e Dachi Akõre de mechiu sid̶a kachirua b̶eei. ¡Mau awara griegorã Dachi Akõre de mechiu ed̶a adoesii!d ¡Ichiba nau de ab̶aburu Dachi Akõre baita b̶uu kachirua b̶eebisii!»
29 Maka jarasid̶au Trófimo Efesod̶ebena Pablo ome puurud̶e niiba unuped̶aad̶ad̶eeba. Kʉ̃risiasid̶au Pabloba Trófimo Dachi Akõre de mechiu kaita ed̶a adoe b̶uasii.
30 Maud̶e joma Jerusalend̶ebenarã kĩrud̶aped̶a pira wãurisid̶au. Pablo jidaud̶aped̶a Dachi Akõre de mechiu dud̶a jeed̶a erta adoesid̶au. Maabae chi poraa joma jʉ̃akuasid̶au. 31 Pablo bea kʉ̃ria panuumisa ab̶auba Romad̶ebena kokoroa chi aude mechiuba jarad̶e wãsii joma Jerusalend̶e panuurã kĩrusid̶au. 32 Ara makʉd̶e ichi kokoroarã mechiurã iuped̶a ẽbẽrarã kĩru panuumaa pira wãsid̶au. Judiorãba ãchi needuu unusid̶aud̶e Pablo sĩ panad̶a ida b̶usid̶au. 33 Kokoroa chi aude mechiu araa neesiid̶e, Pablo jidauped̶a kaena omeeba jʉ̃bisii. Maabae ẽbẽrarã pĩchua imi nub̶uumaa id̶isii Pablo kai maud̶e kãare wausii kuitaai. 34 Maud̶e jomaurã kĩra aꞌawaraa b̶ia duanasid̶au. Maamina kokoroa chi aude mechiuba kuitaa ũrikau basii ẽbẽrarã ãrea kĩrubika panuud̶eeba. Maud̶eeba Pablo kokoroarã duanabadaumaa adoebisii. 35 Chi jʉ̃rʉmetamaa neesid̶aud̶e mamauba kokoroarãba Pablo jira adoesid̶au, judiorã ãrea kĩramaa panuud̶eeba. 36 Ãchiba kokoroarã kaad̶e jĩwa jarabachid̶au: «¡Jãu beatásturu!»
Pablo Jerusalend̶aa wãd̶a
37 Kokoroarãba Pablo ãchi duanabadau deed̶aa ed̶a adoeduud̶e, Pabloba griego bed̶ead̶e naka jarasii:
—¿Biꞌia b̶uka mʉ bichi ome berreai?
Chi kokoroarã aude mechiuba panausii:
—¿Bichiba griego bed̶ea kuitaa nika? 38 ¿Bichiwãeka chi Egiptod̶ebena, ẽbẽrarã naed̶e kĩrubikaped̶a, moded̶ebenarã 4.000 drua sirua wãꞌãe b̶uud̶aa adoesiiwãeka?
39 Maud̶e Pabloba jarasii:
—Makawãema, mʉ judiobʉ. Cilicia iujãa druad̶ebenabʉ. Tarso puuru mechiud̶ebenabʉ. Michuburia puuru daad̶e ida berreabise.
40 Chi kokoroarã aude mechiuba ida berreabisii. Maabae Pablo jʉ̃rʉmetad̶e b̶ari nub̶uuba ichi juaba ẽbẽrarã chũpeabiasii. Chũpeabiasiid̶e hebreo bed̶ead̶e berreasii.