Juan
Bed̶ea bia Jesús ʉ̃rʉbena Juanba b̶ʉd̶a
Jesús baara nibad̶a Juanba nau karta b̶ʉsii. Año 80 Éfeso puurud̶e b̶uasiid̶e nau b̶ʉsii. Maamina nau kartad̶e Juanba nau b̶ʉd̶a jarawẽa b̶uu. Chi nureemaarã, nau kartad̶e Juanba ara ichimaa «Jesusba ãrea kʉ̃ria b̶uu» trʉ̃ jarabachii (21:20-24).
Juanba nau karta ãbarã baita b̶ʉsii kuitaad̶amera ãchiba Jesús ʉ̃rʉbena ijãaped̶aad̶a biawãrabʉ. Maud̶e jomaurã baita b̶ʉsii Jesús biawãra Dachi Akõre Warr ijãad̶amera. Mau kʉ̃risia mechiu Juanba b̶ʉsii 20:31: «Joma nau b̶ʉsii machiba Jesús Dachi Akõreba Dachi Karibabarii deai jarad̶a, Dachi Akõre Warr ijãad̶amera. Maka ijãaduubʉrã ichid̶eeba chokae b̶uai ara uru nuread̶ai».
Nau kartad̶e Juanba arakʉd̶e kuitaabiasii Jesús biawãra Dachi Akõred̶ebena neesii. Mau naed̶e kuitaabiasii ẽbẽrarãba jara panuud̶eeba (1:1-51). Mawãare kuitaabiasii Jesusba ẽbẽrarãba poyaa ne waud̶akau siete wau b̶uud̶eeba (2:1—11:44). Mawãare Juanba b̶ʉsii Jesús biui baita b̶uu ʉ̃rʉbena (11:45—17:26), ichi ida b̶u nureeba jidaud̶aped̶a cruzd̶e beaped̶aad̶a ʉ̃rʉbena (18:1—19:42) maud̶e ichid̶e ijãa nureeba ichi chokae jiradud̶a unuped̶aad̶a ʉ̃rʉbena (20:1—21:25).
Nau kartad̶e Jesusba arakʉd̶e jaradeasii Dachi Akõre Jauri ʉ̃rʉbena (3:1-8; 6:63; 7:37-39; 14:15-29; 15:26—16:15, 20:19-23). Mau awara arakʉd̶e berrea b̶uu Dachi Akõreba ichi Warr kʉ̃ria b̶uu ʉ̃rʉbena (5:19-21; 10:17-18; 17:1-26) maud̶e saka ichid̶e ijãa nuree kʉ̃ria b̶uu (3:16-17; 11:33-37; 13:1—17:26).