Jesús Nicodemo ome berread̶a
3
1 Fariseo b̶uasii Nicodemo abadau b̶uasii. Mau judio mechiu basii. 2 Mau Nicodemo ẽsabud̶aa Jesusmaa wãsii. Maabae Jesusmaa jarasii:—Jaradeabarii, daiba kuitaa panuu bichi Dachi Akõreba bʉid̶a. Dachi Akõre bichi baara b̶uad̶awãe basirã chi ẽbẽrarãba poyaa ne waud̶akau poyaa waubai basii.
3 Jesusba ichimaa jarasii:
—Mʉʉba bichimaa biawãra jaraaruu: wãwa adaubarii kĩra, waya chiwid̶i b̶eewẽebʉrã, Dachi Akõre juad̶e poyaa b̶uabai ichid̶irã baara.a
4 Maud̶eeba Nicodemoba ichimaa id̶isii:
—¿Saka dachi chõra b̶uu waya wãwa adaui kĩra b̶eeima? Maka b̶uubʉrã ¿dachi nawe b̶ited̶e wãi b̶uka waya wãwa adauruu kĩra?
5 Jesusba panausii:
—Mʉʉba bichimaa biawãra jaraaruu: baniad̶eeba maud̶e Dachi Akõre Jaurid̶eeba b̶ited̶ebena neewẽebʉrã, Dachi Akõre juad̶e poyaa b̶uabai ichid̶irã baara.b 6 Dachi naweba chi warr adaud̶a nau kakuad̶ebena need̶abʉ, maamina waya chiwid̶i need̶a Dachi Akõre Jaurid̶eeba need̶abʉ. 7 Mʉʉba waya wãwa adaui kĩra panad̶ai panuu ad̶a kakua ãrea kʉ̃risiarã́se. 8 Pũaturã barikiareeba pũatubarii. Chi jĩwa ũribarimina kuitaakau samareeba neeruu maud̶e samaa wãaruu. Ara mau kĩra Dachi Akõre Jauri unud̶akamina kuitaa panuu ẽbẽra sõd̶e saka maka wau b̶uu.
9 Nicodemoba jarasii:
—Dachi Akõre Jauriba ¿saka mau maka wauima?
10 Jesusba panausii:
—Bichi Israeld̶ebenarãmaa Dachi Akõre bed̶ea jaradeabarii mechiumina ¿mau adua b̶uka? 11 Mʉʉba bichimaa biawãra jaraaruu: daiba kuitaa panuu ʉ̃rʉbena, unu panuu ʉ̃rʉbena berrea panuu maamina daiba jara panuu machiba ijãad̶akau. 12 Mʉʉba nau iujãad̶e unubadau ʉ̃rʉbena jara b̶uu machiba ijãad̶awẽebʉrã, bajãad̶ebena jaraaruubʉrã ¿saka ijãad̶aima?
13 »Ab̶a bid̶a bajãad̶aa wãkau mau kuitaai baita. Ab̶aburu mʉ́turu, chi Ẽbẽra Ba B̶uad̶aba mau kuitaa b̶uu, bajãad̶ebena need̶ad̶eeba.c 14 Moisesba drua sirua wãꞌãe b̶uud̶e dama bronce waud̶a ʉtʉ jira b̶ud̶a kĩra, mʉ, chi Ẽbẽra Ba B̶uad̶a ʉtʉ jirab̶ud̶ai, 15 chi mʉʉd̶e ijãaduu Dachi Akõre ome ewaricha chokae nuread̶amera.d
16 »Dachi Akõreba ẽbẽrarã ãrea kʉ̃riakua b̶uud̶eeba ichi Warr ab̶a nii nau iujãad̶aa bʉisii joma ichid̶e ijãaduu ichid̶ebena awara nurearãad̶amera, maumaarã ichi ome ewaricha chokae nuread̶amera. 17 Dachi Akõreba ichi Warr nau iujãad̶aa bʉibasii ẽbẽrarã kastikamera maumaarã bʉisii karibakuamera. 18 Dachi Akõreba ichi Warrd̶e ijãa b̶uu kastikaabai. Maamina chi ichi Warr ijãawẽa b̶uu Dachi Akõreba kastikabarii, ichi Warr ab̶a nii ida b̶u b̶uud̶eeba.
19 »Dachi Akõreba nau iujãad̶ebenarã kastikabarii nau kakua: chi ʉ̃d̶aa nii nau iujãad̶aa neesii jomaurãba Dachi Akõre unud̶amera. Maamina ẽbẽrarãba kachirua waubadaud̶eeba pãriu ãrea kʉ̃riasid̶au. 20 Joma chi kachirua waubadaurãba ʉ̃d̶aa kʉ̃riad̶akau. Ʉ̃d̶aad̶aa need̶akau ãchiba kachirua wau panuu kuitaarãad̶amera. 21 Maamina joma chi biawãra waubadaurã ʉ̃d̶aad̶aa neebadau ãchiba Dachi Akõreba kʉ̃ria b̶uu kĩra waubadau jomaurãba kuitaad̶amera.
Juan chi Boro Eabariiba Jesús ʉ̃rʉbena berread̶a
22 Mau maad̶akare Jesús maud̶e ichi baara nibabadaurã Judea druad̶aa wãsid̶au. Aria panuud̶e chi ichid̶e ijãaduu boro eakuabachii. 23 Maumisa Juanba boro ea b̶uabachii Enond̶e, Salim puuru kaita, aria bania ãrea b̶uud̶eeba. Aria ẽbẽrarã wãbachid̶au, boro eabidai baita. 24 Mau makasii Juan jʉ̃ad̶ai naed̶e. 25 Mau ewarid̶e waabenarã Juan baara nibabadaurã ab̶a judio ome kĩru berreasid̶au ne jeraabadau ʉ̃rʉbena, Dachi Akõre daad̶e biꞌia nuread̶ai baita.e 26 Mau maad̶akare Juanmaa wãd̶aped̶a jarasid̶au:
—Jaradeabarii, bichi ome Jordán kĩare b̶uad̶aba ẽbẽrarã boro eakuamaa b̶uu, chi mau ʉ̃rʉbena bichiba berread̶a. Joma maumaa wã panuu.
27 Maud̶eeba Juanba jarasii:
—Ab̶au bid̶a poyaa uru b̶uabai, chi mau Dachi Akõreba ichimaa dearuuwãebʉrã. 28 Machiba mʉʉba jarad̶a ũrisid̶au. Mʉʉba jarasii mʉ chi Dachi Akõreba Dachi Karibabarii deai jarad̶awãe. Maumaarã Dachi Akõreba mʉ naa bʉisii ichi o jipa jaremera. 29 Miakãiduud̶e chi wẽra adauruu chi aude mechiu nii. Maamina ichi kõpaero ichi jãkaa b̶uu kĩrajʉʉ b̶uu, ichi berrearuu ũri b̶uud̶eeba. Ara mau kĩra mʉ kĩrajʉʉ b̶uu ichi nama b̶uud̶eeba. 30 Mau chi aude mechiu bai b̶uu. Maud̶e mʉ kaebeu b̶eei b̶uu.
Ʉtʉbena ẽbẽra
31 »Chi ʉtʉʉba need̶a jomaurã audeara mechiu nii. Chi nau iujãad̶e nuree nau iujãad̶ebenad̶eeba ab̶a nau iujãad̶ebenáturu berreabadau. Maud̶eeba chi bajãad̶ebena neeruu jomaurã audeara mechiu nii. 32 Ichiaburu berrea b̶uu bajãad̶e unud̶a ʉ̃rʉbena maud̶e ũrid̶a ʉ̃rʉbena. Maamina ichiba berrea b̶uu ab̶au bid̶a ijãad̶akau. 33 Chi ichi bed̶ea ijãa b̶uuba kuitaa b̶uu Dachi Akõreba jara b̶uu biawãrabʉ. 34 Dachi Akõreba bʉid̶aba Dachi Akõre bed̶ea jarabarii, Dachi Akõreba ichi Jauri wãakawẽa deasiid̶eeba. 35 Dachi Akõreba ichi Warr kʉ̃ria uru b̶uu; maud̶eeba ne joma deasii ichi juad̶e uru b̶uamera. 36 Chi ichi Warrd̶e ijãa b̶uu Dachi Akõre ome ewaricha chokae b̶uai, maamina chi ichi Warr ida b̶u b̶uu Dachi Akõre ome ewaricha chokae b̶uabai. Mau Dachi Akõreba kastikai.