Lucas
Bed̶ea bia Jesús ʉ̃rʉbena Lucasba b̶ʉd̶a
Nau karta Lucasba b̶ʉsii. Mau kʉ̃risiabadau griego basii. Colosenses 4:14 maud̶e Filemón 24 jara b̶uu Lucas Pablo ome nibasii. Mateoba, Marcos bid̶a ãchicha karta Jesucristo ʉ̃rʉbena b̶ʉped̶aad̶akare Lucasba nau karta b̶ʉsii.
Lucasba nau karta ẽbẽra chi mechiu Teófilo baita b̶ʉsii kuitaamera Jesús ʉ̃rʉbena ichimaa jaradeaped̶aad̶a biawãra b̶uu (1:1-4). Lucasba waabenarã audeara biꞌia b̶ʉsii Juan chi Boro Eabarii adaud̶a ʉ̃rʉbena (1:5-80), maud̶e Jesús adaud̶a ʉ̃rʉbena (2:1-52). Mawãare b̶ʉ kub̶uu Juanba Jesús boro ead̶a ʉ̃rʉbena (3:1-22), Jesusd̶eed̶ebena nabẽrarã trʉ̃ ʉ̃rʉbena (3:23-38), maud̶e jʉbawãe niiba Jesús kachiruad̶e b̶aebii kʉ̃ria bad̶a ʉ̃rʉbena (4:1-13). Mawãare b̶ʉ kub̶uu Jesusba Galilea druad̶e jaradea nibad̶a ʉ̃rʉbena (4:14—9:50) maud̶e Jerusalend̶aa wãaruud̶e jaradea b̶uad̶a ʉ̃rʉbena (9:51—19:27).
Kaad̶aa b̶ʉ kub̶uu Jesús Jerusalend̶e makad̶a ʉ̃rʉbena: Jerusalén puuru kakua jẽad̶a, cruzd̶e beaped̶aad̶a, chokae jiradud̶a, maud̶e chi ichid̶e ijãabadaurã daad̶e bajãad̶aa wãd̶a (19:28—24:53).
Lucasba arakʉd̶e b̶ʉsii Dachi Akõreba ẽbẽrarã kastikai ʉ̃rʉbena (2:25-35; 19:37-44; 21:20-24) maud̶e kachirua waubadaurã ichimaa waya needuurã karibai ʉ̃rʉbena (1:67-80; 15:1-32; 19:1-10). B̶es ãrea b̶ʉsii kachirua waubadaurã Jesusba kĩra chuburiad̶a ʉ̃rʉbena: judiorã, judiowãerã, Samariad̶ebenarã, chi nejarr barauwãe nuree maud̶e Romad̶ebena baita chi nejarra pebadaurã.