Jesús adaud̶a ewari
2
1 Mau ewarid̶e Romad̶ebena chi aude mechiu César Augustoba ichi juad̶e b̶ee joma juasiibiasii.a 2 Mau ewarid̶e Cirenio Siria druad̶e chi jaradea ua b̶uabarii basiid̶e, mau ẽbẽrarã trʉ̃ b̶ʉbiad̶a ichiba mau chi naa waubiad̶a basii. 3 Maud̶e joma ãchi puurucha wãsid̶au juasiid̶amera.4 Mau ewarid̶e José Galilea druad̶e Nazaret puurud̶e b̶uabachii. Ichi nabẽra Davidd̶ebena neesiid̶eeba Judea druad̶e Belén puurud̶aa wãsii. Belén David adaud̶a puuru basii. 5 José, ichi wẽra bai b̶uu María ome wãsii ãchi trʉ̃ b̶ʉbid̶ai baita. Mau ewarid̶e María warr baraa b̶uasii. 6 Belend̶e panuud̶e María chi warr adaui ewari ba b̶uasii. 7 Kãibadau de bari wãꞌãed̶eeba ichi warr imina adaud̶a paruba bʉraped̶a ãnimara kobadaud̶e nub̶usii.
Ángel oeja nubadaurãmaa unubid̶a
8 Mau ẽsabud̶e oeja nubadaurãba ãchi oeja Belén kaita nu panasid̶au. 9 Maka b̶uud̶e Dachi Mechiud̶e ángel ãchimaa unubisii. Maud̶e Dachi Akõre kĩrawãrea ted̶echoa ãchi jãkaa ãrea ʉ̃d̶aa nub̶eesii. Maud̶eeba oeja nubadaurã ãrea perasid̶au. 10 Maamina mau angelba ãchimaa jarasii: «Wapearã́sturu. Mʉʉba bed̶ea bia machimaa jarad̶e neeruu. Mau bed̶ea kakua joma kĩrajʉʉd̶ai. 11 Id̶i David chi naweba adaud̶a puuru Belend̶e machi karibabarii adausii. Mau Cristobʉ, Dachi Mechiu.b 12 Naud̶eeba machiba kuitaad̶ai mʉʉba biawãra jaraaruu: machiba mau wãwa ãnimara kobadaud̶e paruba bʉra nub̶uu unud̶ai».
13 Ara makʉd̶e Dachi Akõreba chi angelerã ãrea unubiasii. Joma ãchiba Dachi Akõre ʉ̃rʉbena naka biꞌia berreasid̶au:
14 «¡Dachi Akõre ʉtʉ bajãad̶e b̶uu ãrea biꞌia nii! ¡Dachi Akõreba biꞌia unu b̶uu ẽbẽrarã nau druad̶e jirukaraayuwãe panad̶ai!»c
15 Maabae angelerã bajãad̶aa wãsid̶au. Ara makʉd̶e oeja nubadaurãba chiya jarasid̶au: «Maka b̶uubʉrã Dachi Mechiuba kuitaabid̶a Belend̶aa ichiad̶e wãuríduru».
16 Ara makʉd̶e isa wãurisid̶au. Ara basid̶aud̶e María, José maud̶e chi wãwa unusid̶au. Chi wãwa ãnimara kobadaud̶e nub̶uasii. 17 Mau unusid̶aud̶e angelba chi warr ʉ̃rʉbena jarad̶a ãchiba jomaurãmaa nebʉrʉsid̶au. 18 Chi oeja nubadaurãba jara panuu ũrisid̶aud̶e joma mau kakua kʉ̃risiaswãe paneesid̶au. 19 Maamina chi nawe Mariaba mau ʉ̃rʉbena ichi sõd̶e joma ãrea kʉ̃risia b̶uabachii. 20 Oeja nubadaurã waya wãaduud̶e ãchiba unuped̶aad̶a kakua maud̶e ũriped̶aad̶a kakua Dachi Akõre ʉ̃rʉbena biꞌia berreasid̶au. Chi angelba jarad̶a kĩra biawãra joma makasii.
Jesús Dachi Akõre de mechiud̶aa adoeped̶aad̶a
21 Chi warr adausiid̶e 8 ewari bad̶akare, chi wãwa chi mukĩra kakua tõosid̶au. Maud̶e ichi trʉ̃ Jesús b̶usid̶au, chi nawe warr baraai naed̶e angelba jarad̶a kĩra.
22 Chi warr adaud̶akare chi naweba nui b̶uu ewari joma wausii Moisesba b̶ʉd̶a kĩra. Mau ewari baaruud̶e María José omeeba chi wãwa Jerusalend̶aa adoesid̶au Dachi Mechiu daad̶e b̶ud̶ayua. 23 Maka wausid̶au Dachi Mechiuba Moisesmaa b̶ʉbid̶ad̶e naka b̶ʉ kub̶uud̶eeba: «Joma warr imina Dachi Mechiumaa dead̶ai panuu».d 24 Mau awara Dachi Mechiu daad̶e biꞌia paneed̶ai baita chi akõrerãba paloma baabisid̶au Dachi Mechiuba Moisesmaa b̶ʉbid̶ad̶e naka b̶ʉ kub̶uud̶eeba: «Urima maebʉrã paloma ome deai b̶uu».
25 Mau ewarid̶e ẽbẽra Simeón abadau Jerusalend̶e b̶uasii. Mau Simeón jipa b̶uasii maud̶e Dachi Akõreba jara b̶uu biꞌia waubachii. Ichiba esed̶au b̶uasii Dachi Akõreba Israel puuru sõbiabii ewari. Dachi Akõre Jauri ichi ome b̶uasii. 26 Naed̶e Dachi Akõre Jauriba ichimaa kuitaabisii ichi biui naed̶e Dachi Mechiuba Dachi Karibabarii deai jarad̶a unui. 27 Dachi Akõreba Moisesmaa b̶ʉbid̶ad̶e b̶ʉ kub̶uu kĩra waud̶ai baita akõrerãba Jesús Dachi Akõre de mechiud̶aa adoesid̶aud̶e Dachi Akõre Jauriba Simeón araa wãbisii. 28 Simeonba chi warr unusiid̶e jira adauped̶a Dachi Akõremaa naka biꞌia jarasii:
29 «Mʉ Mechiu, jãu kĩraburu bichi baita bari trajabarii ida jirukaraayuwãe biubise bichiba jarad̶a kĩra wausiid̶eeba.
30 Bichiba Dachi Karibabarii deai jarad̶a mʉʉmaa unubisii.
31 Bichiba ichi b̶usii joma puurud̶ebenarãba unud̶amera.
32 Ichi ʉ̃d̶aa kĩra b̶uai judiowãe nureerãba bichi ʉ̃rʉbena kuitaad̶amera.
Ichi kakua bichi puuru Israel baita chi bia jarad̶ai».
33 Simeonba ãchi warr ʉ̃rʉbena jara b̶uu ũrisid̶aud̶e Jesús akõrerãba kãare kauwa kʉ̃risiad̶ai adua paneesid̶au. 34 Maud̶e Simeonba ãchimaa biꞌia jaraped̶a Mariamaa naka jarasii:
—Dachi Akõreba nau warr deasii israeld̶ebenarã ãrea biꞌia b̶umera maud̶e ãrea biꞌiwãe b̶umera. Kuitaabiai ichi Dachi Akõred̶ebena nee b̶uu, maamina ichi ʉ̃rʉbena kachirua jarad̶ai. 35 Maka ãreaba ãchi sõd̶e mera uru b̶ee unubiad̶ai. Maud̶e bichi ãrea kĩra nomaa b̶uai nekoba sõ suuruu kĩra.
36 Aria Dachi Akõre baita berreabarii Ana abadau b̶uasii. Mau Aserd̶ebena need̶a Panuel kau basii. Mau chõodraa b̶uasii. Ãwera b̶uasiid̶e, kima adoeped̶a 7 año b̶uud̶e pẽdrãa basii. 37 Ichi pẽdrãa b̶eed̶a 84 año ba b̶uasii.e Ewaricha ãyadaa maud̶e ẽsabud̶e bid̶a Dachi Akõre de mechiud̶aa wãbachii Dachi Akõremaa chi bia jarai baita, Dachi Akõre baara b̶uayua chiko kod̶akau ewari waui baita maud̶e Dachi Akõremaa ʉtaa id̶ii baita. 38 Mau chõodraa Jesús akõrerã kaita wãped̶a Dachi Akõremaa ichíturu kid̶ibai jarasii. Maabae Dachi Akõre Jerusalén puuru karibai ewari esed̶au panuurãmaa chi wãwa ʉ̃rʉbena berreasii.
39 Moisesba b̶ʉd̶ad̶e b̶ʉ kub̶uuf kĩra joma wauped̶aad̶akare José maud̶e María baara Galilea druad̶e ãchi puuru Nazaretd̶aa waya wãsid̶au. 40 Chi warr kakua meserãa warisii. Ichiba ne ãrea kuitaasii maud̶e Dachi Akõreba ne jomad̶e ichi karibabachii.
Jesús Dachi Akõre de mechiud̶e b̶uad̶a
41 Añocha Jesús akõrerã Jerusalend̶aa wãbachid̶au judiorã Pascuag ewari waud̶ai baita. 42 Jesús 12 año b̶uasiid̶e ãchi wãsid̶au mau bari panabadau ewari waud̶ai baita joma judiorãba waubadau kĩra. Jesús sid̶a ãchi baara wãsii. 43 Mau bari panabadau ewari wãꞌãesiid̶e waya ãchi deed̶aa wãsid̶au. Maamina ãchi warr Jesús Jerusalend̶e b̶eesii. Mau ãchiba adua panasid̶au. 44-45 Kʉ̃risia panasid̶au Jesús ẽbẽrarã tãed̶e nii. Maka ewari ab̶a nibasid̶au. Kewaraa ichi jʉrʉsid̶aud̶e ãchi ded̶ebenarã maud̶e kõpaerorã tãed̶e unud̶aabasii. Ara makʉd̶e waya Jerusalend̶aa chi Jesús jʉrʉd̶e wãsid̶au.
46 Ewari õbea baaruud̶e ichi unusid̶au Dachi Akõre de mechiu dud̶a Moisesba b̶ʉd̶a jaradeabadaurã tãed̶e akʉ b̶uu. Ãchiba jaradea panuu ũri b̶uasii maud̶e maarãmaa ne id̶imaa b̶uasii. 47 Maud̶e ãchiba id̶i panuu ichiba biꞌia panausii. Joma mau ũri panuuba kauwa kʉ̃risiad̶aabasii ichi kʉ̃risia kuitaad̶eeba panau b̶uasiid̶eeba. 48 Chi akõrerãba ichi unusid̶aud̶e kauwa kʉ̃risiad̶aabasii. Chi naweba ichimaa id̶isii:
—Wau, ¿bichiba sakãe jãkasma? ¿Sakãe nama b̶eesma? Mʉ maud̶e bichi akõre omeeba ãrea kĩra nomaa panuud̶eeba bichi jʉrʉ panasid̶au.
49 Jesusba panausii:
—Machiba ¿sakãe mʉ jʉrʉ panuma? ¿Mʉ Chacha ded̶e b̶uai b̶uu adua panuka?
50 Maamina Jesusba jarad̶a chi akõrerãba kuitaad̶aabasii. 51 Maabae Jesús ãchi baara Nazaretd̶aa wãsii. Ãchiba jaraaduu ichiba joma waubachii. Joma Jerusalend̶e makad̶a chi naweba ãrea biꞌia kʉ̃risia b̶uabachii. 52 Jesús kakua meserãa warisii maud̶e ewaricha ne kuitaa kãribasii. Dachi Akõreba maud̶e ẽbẽrarãba ichi biꞌia unusid̶au.