Hechos
Jesusba bʉid̶arãba wauped̶aad̶a
Nau karta Lucasba b̶ʉsii. Colosenses 4:14 maud̶e Filemón 24 b̶ʉ kub̶uu mau Lucas Pablo baara nibasii. Maud̶e b̶ʉ kub̶uu Hechos 16:10-17, 20:5—21:18 maud̶e 27:1—28:16. Chi nureerãmaarã, Jesucristo adaud̶a 60 año wãyaad̶akare, Lucasba nau karta b̶ʉsii.
Chi bed̶ea bia Jesús ʉ̃rʉbena ẽbẽra Teófilo baita b̶ʉ b̶uad̶a kĩra Lucasba nau karta sid̶a Teófilo baita b̶ʉsii chi Jesusba bʉid̶arãba wauped̶aad̶a ʉ̃rʉbena kuitaamera. Chi kʉ̃risia mechiu 1:8 naubʉ: «Dachi Akõre Jauri machi baara b̶uad̶e neeruud̶e machiba ichi poyaabarii adaud̶ai. Mauba machiba Jerusalend̶e, joma Judea druad̶e, Samaria druad̶e maud̶e drua kaitawẽ nureed̶e mʉ ʉ̃rʉbena berread̶ai».
Chi nabena capitulod̶e b̶ʉ kub̶uu Jesusba Dachi Akõre Jauri deai jarad̶a, Jesús bajãad̶aa wãd̶a maud̶e Matías chi waabenarã Jesusba bʉid̶arã baara b̶u b̶uad̶a ʉ̃rʉbena.
Mawãare b̶ʉ kub̶uu Jesusba bʉid̶arãba Jerusalend̶e chi bed̶ea bia ichi ʉ̃rʉbena jaraped̶aad̶a (2:1—8:3). Ed̶a b̶ʉ kub̶uu Dachi Akõre Jauri ãchimaa need̶a, Pedroba Dachi Akõre de mechiu kaita jaradead̶a, Jesusd̶erã saka ãbua panad̶a maud̶e judiorãba Esteban beaped̶aad̶a ʉ̃rʉbena.
Mawãare b̶ʉ kub̶uu Jesusba bʉid̶arãba Judea druad̶e maud̶e Samaria druad̶e chi bed̶ea bia ichi ʉ̃rʉbena jaraped̶aad̶a (8:4—9:43). Ed̶a b̶ʉ kub̶uu Dachi Akõre Jauri Samariad̶ebena ãbarãmaa need̶a, Felipeba chi Etiopiad̶ebenamaa jaradead̶a maud̶e Sauloba Jesucristod̶e ijãad̶a ʉ̃rʉbena.
Mawãare b̶ʉ kub̶uu Jesusba bʉid̶arãba chi bed̶ea bia ichi ʉ̃rʉbena judiowãerãmaa jaraped̶aad̶a. Ed̶a b̶ʉ kub̶uu Dachi Akõre Jauri judiowãerãmaa need̶a (10:1—11:18), Pedro chi Herodesba jʉ̃abid̶ad̶ebena ena bʉiped̶aad̶a (11:19—12:25), Pablo chi Jesús bed̶ea jarad̶e wãd̶a (13:1—14:28), ãbarã chi mechiurã Jerusalend̶e araa ãbua imiped̶aad̶a (15:1-35), Pablo chi Jesús bed̶ea maucha jarad̶e wãd̶a (15:36—18:22), chi mawãare wãd̶a (18:23—20:38) maud̶e Pablo Romad̶aa jʉ̃a b̶ud̶e adoeped̶aad̶a ʉ̃rʉbena (21:1—28:31).