Pablo Roma puurud̶aa wãd̶a
27
1 Mau ewarid̶e chi jaradea ua b̶uabariiba dai Italia druad̶aa wãd̶ai panuu a jaraped̶a Pablo maud̶e chi nuree jʉ̃a b̶uped̶aad̶a Julio juad̶e b̶usii. Mau Julio kokoroarã Augusto abadaud̶ebena chi jaradea ua b̶uabarii basii. 2 Maabae dai jãba Adramitio puurud̶ebenad̶e ataud̶aped̶a wãsid̶au. Mau jãba Asia druad̶e puurucha wãaruu basii. Ãba Aristarco Macedonia druad̶ebena dai baara wãsii. Mau Tesalónica puurud̶ebena basii.3 Norema Sidón puurud̶e neesid̶au. Maud̶e Julioba ichi sõbiad̶eeba Pablo ichi kõpaerorãmaa ida wãbisii maarãba ichi irsibid̶amera. 4 Maabae Sidond̶ebena wãsid̶aud̶e Chipre isla kaita wãsid̶au, chi pũatu kĩramaa pũatu b̶uasiid̶eeba. 5 Cilicia drua kĩraare maud̶e Panfilia kĩraare wãd̶aped̶a Liciad̶ebena Mira puurud̶e neesid̶au.
6 Aria kokoroarã jaradea ua b̶uabariiba june jãba Alejandría puurud̶ebena unusii. Mau jãba Italia druad̶aa wãaruu basii. Dai ichi baara mau jãbad̶e ataud̶aped̶a wãsid̶au. 7 Ewari ãrea baaruud̶e bikãa wãsid̶au ãrea kĩramaa pũatu b̶uasiid̶eeba. Gnido puuru kĩraare need̶ai baita, bereka panuud̶e neesid̶au. Wabid̶a daimaa pũatu b̶uasiid̶eeba, Creta isla ad̶u wãsid̶au, Salmona kĩraare. 8 Mar iikaa ãrea bereka wãaduu nid̶aud̶e Lasea kaita, Buenos Puertos abaudaud̶e neesid̶au.
9 Ãrea kãꞌãa b̶uud̶eeba judiorã chiko kod̶akau ewari wãyaa ba b̶uasii. Mau ewarid̶e mard̶e wãi kachirua b̶uabachii.a Maud̶eeba Pabloba jarasii wãrãad̶amera. 10 Naka jarasii: «Mʉ mechiurã, mʉʉba kuitaa b̶uu dachi wãaduubʉrã kachirua wãd̶ai. Jãba ãrii, chi jãbad̶e adoeduu sid̶a ãriib maud̶e dachi sid̶a kinid̶ai».
11 Maamina mau kokoroarã jaradea ua b̶uabariiba Pablo bed̶ea ũrii kʉ̃riabasii. Maumaarã jãba adoebarii bed̶ea maud̶e jãba chibari bed̶eáturu ũrisii. 12 Mau jãba poebabariimare biꞌiwãe b̶uasii, kui che ewarid̶e panad̶ai baita. Maud̶eeba ãreaba kʉ̃risiasid̶au biꞌia b̶uu Fenice puurud̶aa wãd̶ai ab̶a kui che ewari wãꞌãeruud̶aa. Mau puuru sid̶a Creta islad̶e b̶uu. Mamauba suroeste maud̶e noroeste unubachid̶au.
Pũaturã ãreaba jãba ãyaa adoed̶a
13 Maud̶e pũaturã surd̶ebena bikãa pũatu neesiid̶e, biꞌia wãd̶ai kʉ̃risiasid̶au. Ancla jira adoed̶aped̶a Creta isla iikaa wãsid̶au. 14 Maamina ãreawãed̶e pũaturã kachirua Euroclidón abadau islad̶ebena ãrea pũatu kob̶eesii. 15 Mauba jãba ãyaa adoesii. Jãba kũ poyaa araa b̶ud̶aabasiid̶eeba pũaturãmaa ida adoebisid̶au. 16 Cauda isla wãyaa wãsid̶aud̶e, chi pũatu ãrea pũatuubasii.c Maud̶e chi jãba kaebeu doed̶a jʉ̃ nub̶uad̶a, poyaa jirad̶aabai panuud̶e, ʉtaa jirasid̶au. 17 Mau jãba kaebeu ʉtaa jira adaud̶aped̶a, chi jãba mechiu ekare jʉ̃karaba bʉra jʉ̃sid̶au, toapebiimaaba. Mau awara wapea panasid̶au, mard̶e ibu ʉ̃rʉ Sirte abadaumare wãd̶ai. Maud̶eeba chi bela ed̶aa adaud̶aped̶a nub̶usid̶au maabae chi pũatumaa ida adoebisid̶au.d 18 Norema pũaturã wabid̶a ãrea pũatu nub̶uasii. Maud̶eeba jãbad̶e trajabadaurãba chi jãbad̶e ne adoeduu mard̶e jirakuasid̶au chi jãba wẽsaamera. 19 Pũaturã wabid̶a ãrea pũatu nub̶uud̶eeba, ewari õbead̶e ara ãchi juabae chi jãbamaabena chi chikʉa b̶ee mard̶e jirakuasid̶au. 20 Maka panuud̶e ewari ãrea ʉmada maud̶e pusterrea unud̶awẽa panasid̶au. Mau iu pãriud̶e wabid̶a panuud̶eeba waa nibad̶aabai a kʉ̃risiasid̶au.
21 Ãrea ba b̶uasii kod̶awẽa panuu. Maud̶eeba Pablo jomaurã ẽsa b̶ari nub̶eeped̶a jarakuasii:
—Mʉʉba machimaa jarasii Creta islad̶ebena wãrãad̶amera. Mʉ bed̶ea ijãaped̶aad̶a basirã nau kachiruad̶e duanad̶aabaikausii maud̶e ne adaud̶aabaikausii. 22 Maamina jirukaraarã́sturu. Nau jãba joma ãriirumina dachi ab̶a bid̶a biud̶aabai. 23 Mʉ Dachi Akõred̶ebʉ. Ichid̶e ijãa nii. Ẽsabud̶e ara mau Dachi Akõred̶e ángel mʉʉmaa unubisii. 24 Mauba mʉʉmaa jarasii: “Wapearã́se, Pablo. Bichi Romad̶ebena chi aude mechiu daad̶e berreai b̶uu. Bichi kakua, Dachi Akõreba joma nau jãbad̶e wãaduu ida kinibiabai”. 25 Maud̶eeba, ẽbẽrarã, jirukaraarã́sturu. Mʉʉba ijãa b̶uu Dachi Akõreba waui ichi angelba mʉʉmaa jarad̶a kĩra. 26 Maamina barikia isla ibud̶aa wãd̶ai panuu».
Jãba ãrid̶a
27 Misa ome baaruud̶e Adriático mard̶e ũu kãribasid̶au. Ẽsa baaruud̶e jãbad̶e trajabadaurãba kʉ̃risiasid̶au ioro kaita needuu. 28 Jʉ̃karaba chi mar id̶u chaasid̶aud̶e 37 metrosf chaasid̶au. Waa wãaduud̶e waya chaasid̶aud̶e mau 15 chaasid̶au. 29 Moomaa trʉd̶e wãd̶ai wapead̶eeba, ancla kimare chi jãba ãdawaare taa bʉikasid̶au. Maabae ãrea perad̶eeba id̶i panasid̶au isa ewarimera.g 30 Maka panuud̶e chi jãbad̶e trajabadaurã jãbad̶ebena miru wãd̶ai kʉ̃risiasid̶au. Maud̶eeba chi jãba kaebeu mard̶aa ed̶aa bʉisid̶au ancla kũumaabena setaa mard̶e bʉiduu kĩra. 31 Maamina Pabloba kokoroarã jaradea ua b̶uabariimaa maud̶e ichi kokoroarãmaa jarasii: «Jãarã jãba mechiud̶e paneeduuwãebʉrã machi kinid̶ai».
32 Maud̶eeba kokoroarãba chi jãba kaebeu jʉ̃ nub̶uu jʉ̃kara tõotad̶aped̶a, mard̶e b̶aebisid̶au.
33 Ewarimaa b̶uud̶e Pabloba jomaurãmaa jarasii kod̶amera: «Dachi sakad̶ai adua panuud̶eeba misa ome baaruu machi kod̶awẽa panuu. 34 Mʉʉba chi chuburia id̶iiruu kod̶amera. Maka chi kakua meserãa nuread̶ai poyaa nibad̶ai baita. Ab̶a bid̶a biubai».h
35 Maka jaraped̶a Pabloba pan juad̶e adauped̶a jomaurã daad̶e Dachi Akõremaa ichíturu kid̶ibai asii. Maabae chi pan b̶ʉaped̶a kosii. 36 Mau unuuduud̶e jomaurã kĩrajʉʉd̶aped̶a kosid̶au. 37 Dai chi mau jãbad̶e 276 panasid̶au.i 38 Ãchi b̶i jãwaad̶aped̶a trigo mard̶e jirakuasid̶au chi jãba wẽsaamera.
39 Ewarisiid̶e ãchiba ioro unusid̶aud̶e kuitaad̶aabasii sama panuu. Mau iorod̶aa wãi baita mar jua b̶uasii ibu baraa. Mau unud̶aped̶a kʉ̃risiasid̶au poyaa wãd̶ai panuubʉrã, chi jãba mau ibu põesãad̶aa adoed̶ai. 40 Maud̶eeba ancla jʉ̃kara tõokuad̶aped̶a mard̶e joma b̶ʉisid̶au. Maud̶e chi jãba pʉrra adoebarii jʉ̃ b̶uad̶a enasid̶au. Maabae kũd̶ebena vela ʉtʉ eab̶ari nub̶usid̶au pũatuba ibud̶aa adoemera. 41 Maamina chi jãba ibu ara ʉ̃rʉ b̶uud̶eeba drʉ nub̶uad̶e wãsii. Chi jãba kũ ibud̶e ãrea troa nub̶eesii, ãyaa poyaa wãi karaa. Maabae chi mar ʉ̃rapeba chi ãdawaarebena toawãsii.
42 Maud̶e kokoroarãba chi jʉ̃a duanuu kenad̶ai kʉ̃risiasid̶au ab̶au sid̶a ibud̶aa ũuduuba mirurãad̶amera. 43 Maamina kokoroarã jaradea ua b̶uabariiba Pablo karibai kʉ̃ria b̶uasii. Maud̶eeba ida kenabiabasii, maumaarã joma chi ũu kuitaa nuree naa mard̶e wãbiakuasii ibud̶aa ũu wãd̶amera. 44 Chi waabenarã bakurud̶e maebʉrã jãbad̶e ne b̶eed̶a ʉ̃rʉ ũu wãbiasii. Maka joma biꞌia iikaad̶aa wãsid̶au.