Angelba Corneliomaa berread̶a
10
1 Cesarea puurud̶e ẽbẽra Cornelio abadau b̶uasii. Ichi Italia druad̶ebena kokoroarã chi jaradea ua b̶uabarii basii. 2 Mau Cornelio ichi ded̶ebenarã baara joma jipa nureasii. Dachi Akõre wapeadee panasid̶au. Cornelioba judiorã aid̶ai baita chi nejarra ãrea deabachii maud̶e Dachi Akõremaa ʉtaa id̶i b̶uabachii. 3 Ewari ab̶a ãsa ʉ̃rʉ hora õbea basiid̶e Dachi Akõreba Cornelio daumaa unubisii ángel ichimaa arakʉd̶e neeruu. Mauba jarasii:—¡Cornelio!
4 Cornelioba chi ángel kĩedarrmaa apii ichiaped̶a ãrea wapeaba id̶isii:
—¿Kãare kʉ̃ria b̶uma?
Maabae chi angelba jarasii:
—Bichiba Dachi Akõremaa ʉtaa id̶ibarii maud̶e chi nejarr barauwãe nuree aid̶abarii ichiba biꞌia unu b̶uu ichimaa ne baa dearuu kĩra. 5 Maud̶eeba Jope puurud̶aa ẽbẽrarã bʉikase Simón, ara mau Pedro abadau jʉrʉd̶e wãd̶amera. 6 Mau mar iikaa june Simón chi ãnimara e poabibarii ded̶e b̶uu.a
7 Ángel ichi ome berreaped̶a wãsii. Wãsiid̶e Cornelioba chi ichi baita bari trajabadau ome maud̶e kokoroa ab̶a iusii. Mau kokoroaba Cornelio aid̶abachii maud̶e Dachi Akõre wapeadee nibasii. 8 Cornelioba unud̶a joma nebʉrʉped̶a Jope puurud̶aa bʉikasii.
Dachi Akõreba Pedro daumaa unubid̶a
9 Norema ʉmada jipa baaruud̶e ãchi od̶e Jope puuru kaita needuud̶e, Pedro de ʉ̃rʉd̶e Dachi Akõremaa ʉtaa id̶id̶e wãsii. 10-11 Jarrbisia b̶uud̶eeba ko kʉ̃ria b̶uasii. Ne chuu panuumisa Dachi Akõreba Pedro bajãa ewaaruu daumaa unubisii. Bajãad̶ebena ẽeboro waib̶ʉa kĩra b̶uu ed̶aa neeruu unusii. Mau ẽeboro miducha jʉ̃karaba jʉ̃ b̶uasii. 12 Mau ẽeborod̶e ed̶a didiwaraa ãnimara panasid̶au, jʉ̃rʉ kimare nuree, jeed̶a ursu nuree maud̶e ibanarã. (Chi nuree ãnimara judiorãba kod̶akau duanasid̶au). 13 Maka b̶uud̶e Pedroba mimi ũrisii. Mau mimiba jarasii:
—Pedro, jiraduse. Beaped̶a kose.
14 Maamina Pedroba jarasii:
—Mʉ Mechiu, ¡makawãema! Chi daiba kod̶aabai panuu chiko maebʉrã chi bichi daad̶e biꞌiwãe b̶uu mʉʉba kokau.
15 Chi mimiba waya jarasii:
—Chi Dachi Akõreba biꞌia b̶ud̶a mau miadaa b̶uu a jararã́se.
16 Maka berrearuu Pedroba b̶es õbea ũrisii. Maabae chi ẽeboro waya bajãad̶aa wãsii. 17 Mau unud̶akare Pedroba kuitaa kʉ̃risiaswãe b̶eesii. Wabid̶a mauba kãare jara b̶uu kʉ̃risia b̶uumisa chi Cornelioba bʉid̶arãba Simón de id̶id̶aped̶a chi de poraamaa neesid̶au. 18 Ãchiba jĩwa id̶isid̶au Simón, ara mau Pedro abadau nau ded̶e b̶uu kuitaa.
19 Pedroba unud̶a wabid̶a kʉ̃risia b̶uud̶e Dachi Akõre Jauriba ichimaa jarasii: «Ẽbẽrarã õbea panuuba bichi jʉrʉ panuu. 20 Jiraduped̶a isa ed̶aa wãse. Maarã baara wãabai a kʉ̃risiarã́se, mʉʉba maarã neebiasiid̶eeba».
21 Ara makʉd̶e Pedro ed̶aa wãsii Cornelioba bʉid̶arãmaa. Ichiba jarasii:
—Chi machiba jʉrʉ panuu mʉʉbʉ. ¿Kãare sãad̶e neesid̶ama?
22 Ãchiba panausid̶au:
—Dai kokoroarã chi jaradea ua b̶uabarii Cornelioba bʉisii. Ichi ẽbẽra jipa nii maud̶e Dachi Akõre wapeadee nii. Joma judiorãba ichi ʉ̃rʉbena biꞌia kʉ̃risia panuu. Dachi Akõre angelba bichi ichi deemaa neei iusii bichi bed̶ea ũrimera.
23 Maabae Pedroba deed̶aa wãbisii. Mau ẽsabud̶e Pedro baara paneesid̶au. Norema Pedro jiraduped̶a ãchi baara wãsii. Maud̶e chi nuree ãbarã Jope puurud̶ebena ãchi baara wãsid̶au.
Pedro Cornelio ome berread̶a
24 Mau norema Cesarea puurud̶e neesid̶au. Cornelioba ichi ded̶ebenarã maud̶e ichi kõpaerorã biarã iusiid̶eeba ichi ded̶e esed̶au panasid̶au. 25 Pedro chi de kaita neesiid̶e Cornelioba araa irsibid̶e wãsii. Pedro daad̶e jeed̶a õdarrd̶eeba kob̶eeped̶a biꞌia kʉ̃ria kob̶eesii. 26 Maamina jiradubiped̶a, Pedroba naka jarasii:
—¡Jiraduse! Mʉ sid̶a ẽbẽra mukĩra nii, bichi kĩra.
27 Pedro Cornelio ome berrea nid̶aud̶e ed̶a wãsii. Aria ẽbẽrarã ãrea panuu unusii. 28 Maabae Pedroba jarasii:
—Machiba kuitaa panuu dai judiorã judiowãerã baara nibad̶akau panuu maud̶e judiowãerã ded̶e ed̶a wãd̶akau panuu. Maamina Dachi Akõreba mʉʉmaa kuitaabisii ab̶au ʉ̃rʉbena mʉʉba mau Dachi Akõre daad̶e biꞌiwãe b̶uu a jaraabai, maebʉrã mau miadaa b̶uu a jaraabai. 29 Maud̶eeba mʉ iud̶e bʉisid̶aud̶e wãabai awẽa urusii. Jãabae mʉʉba kuitaa kʉ̃ria b̶uu sakãe mʉ adaud̶e bʉisid̶ama.
30 Maud̶e Cornelioba jarasii:
—Ewari kimare basii ara nau horaka, ãsa ʉ̃rʉ hora õbead̶e, mʉʉba chiko kod̶akau ewari wau b̶uasii. Dachi Akõremaa ʉtaa id̶imaa b̶uud̶e ẽbẽra mʉ daad̶e akʉ nub̶uu unusii. Mau paru ted̶echoa b̶uasii. 31 Mau ẽbẽraba mʉʉmaa jarasii: “Cornelio, bichiba ʉtaa id̶i b̶uad̶a Dachi Akõreba biꞌia ũrisii. Ichiba kĩraba b̶uu chi bichiba chi nejarr barauwãe nuree aid̶abarii. 32 Maabae ẽbẽrarã Jope puurud̶aa bʉikase Simón, ara mau Pedro abadau jʉrʉd̶e wãd̶amera. Mau mar iikaa june Simón chi ãnimara e poabibarii ded̶e b̶uu. Mau Simón, ara mau Pedro neeruud̶e ichiba bichimaa berreai”.b
33 Ara makʉd̶e mʉʉba bichi jʉrʉbisii. Maud̶e bichi sõbia niid̶eeba, neesii. Jãabae joma dai nama Dachi Akõre daad̶e panuu Dachi Mechiuba bichimaa jarabi b̶uu ũrid̶ai baita.c
34 Maud̶e Pedroba jarasii:
—Biawãra ʉ̃raburu mʉʉba kuitaaruu Dachi Akõreba ab̶a chi ab̶au aude kʉ̃riakau. 35 Maumaarã puuruchabena ichi wapeaba jipa wau nuree biꞌia unubarii. 36 Dachi Akõreba chi bed̶ea bia Jesucristo ʉ̃rʉbena jarabiasii israeld̶ebenarãmaa, Dachi Akõre baara biꞌia nuread̶amera. Mau Jesucristo jomaurã Mechiubʉ. 37 Machiba kuitaa panuu joma Judea druad̶e Jesús ʉ̃rʉbena nebʉrʉbadau. Naed̶e Galilead̶e Juanba jaradea b̶uasii ẽbẽrarã boro ead̶amera. 38 Mau ewarid̶e Dachi Akõreba ichi Jauri maud̶e ichi poyaa Jesús Nazaretd̶ebenamaa deasii. Dachi Akõre ichi ome b̶uasiid̶eeba Jesusba ne bia wau nibasii maud̶e ẽbẽrarã jʉbawãe niiba kachirua uru panuu joma aribiabiabachii. 39 Judiorã druad̶e maud̶e Jerusalén puurud̶e Jesusba waud̶a daiba joma unusid̶au. Ichiba ne bia wausmina judiorãba cruzd̶e jirab̶u beasid̶au.
40 Ara mau Jesús Dachi Akõreba ewari õbead̶e chokae jiradubiped̶a waabenarãmaa unubisii. 41 Dachi Akõreba jomaurãmaa unubiabasii maamina daimaa unubiasii mau baita adoesiid̶eeba. Ichi chokae jiradusiid̶e dai ichi ome kosid̶au maud̶e dosid̶au. 42 Jesusba dai bʉisii joma ẽbẽrarãmaa naka jarad̶amera: Dachi Akõreba ichi b̶usii chi chokae nuree maud̶e biuped̶aad̶a ãchi juez b̶uamera. 43 Joma Dachi Akõre baita berreabadaurãba mau ʉ̃rʉbena berreasid̶au. Maarãba kuitaabiasid̶au barikiuba Jesusd̶e ijãaruubʉrã, mau ẽbẽraba kachirua wau b̶uad̶a Dachi Akõreba ichid̶eeba perdonai.
Dachi Akõre Jauri judiowãerãmaa need̶a
44 Pedro wabid̶a berrea b̶uud̶e joma chi ichi ũri panuumaa Dachi Akõre Jauri neesii. 45-46 Maud̶e ãibena bed̶ead̶e berrea duaneesid̶au maud̶e Dachi Akõremaa biꞌia berrea duaneesid̶au. Judiorã Jesusd̶e ijãabadaurã Pedro ome neeped̶aad̶aba mau ũrisid̶aud̶e kuitaa kʉ̃risiad̶aabasii Dachi Akõreba ichi Jauri judiowãerãmaa deasiid̶eeba. 47 Maud̶e Pedroba jarasii:
—Dachi Akõre Jauri adoesid̶au dachiba adoeped̶aad̶a kĩra. ¿Kaiba baniaba boro earãaba ad̶aima?
48 Maabae Pedroba ãchi Jesucristo trʉ̃d̶eeba boro eabisii. Mau maad̶akare ãchiba chi chuburia id̶isid̶au ichi ãchi ome aribia b̶uamera.