1 Kɔlɛŋ 11

Ye duŋ ə nyo bə kpɛ yee bə́ dūŋ bwɔɔ nnu bə́ chèe Chu

Yee bə bə̂lə fwɔ wuŋŋ ye mbə̀lə lə wi Kleto. 2 Ŋkòhi bəŋ ye bə hlè lə mi ə fieŋ finhliŋ mə, baa bələ dəŋ keehnə kkɨŋ mmà ŋkeeh bəŋ. 3 Kwaalə, ŋkiɛɛ lə bə kələ kinwaa lə kwoo ki nyo mənhliŋ lə Kleto, kwoo ki kpɛ lə nyimi, kwoo ki Kleto lə Chu. 4 Mbɛɛ mənhliŋ nnu i chèe Chu, ləkə i yɔ̀ɔ hlɨŋ nni Chu nəə wu, i kəəla kwoo kiih, kəə i nəə Kleto giaali nnu i dùŋ yo kwoo. 5 Kwaalə, ə kpɛ yee i chēe Chu, ləkə i yɔ̀ɔ ə duŋ hlɨŋ Chu ə duŋ i kə kəə lə kwoo kiih kə, kəə i nəə nyimi giaali nnu i dùŋ yo kwoo.^ª Kichili bə mbini yo kpɛ bə nnu mə hə kɔɔ yo kwoo kiih hləŋkə. 6 Ə mə ŋəŋ lə mə kəə lə kwoo kiih, i ŋwi fwee kiih. Kwaalə, ye fi duŋ lə lə ə giaali bə kpɛ bəŋwi kwoo kiih, finwaa lə yee i kə̂ə kwoo kie. 7 Nyo kə duŋ nə lə i kəə kwoo kiih bwɔɔ nnu i chèe Chu kə, yu i bu Chu i baa duŋ dəŋ kiyuunə ki Chu. Kwaalə, kpɛ lə kiyuunə ki nyimi. 8 Chu mà kə jəə biili kpɛ fə nyo mu kə, ə màa kpɛ nnu i mà fu ə nyo go. 9 Chu mà kə fəə nyo yu kpɛ kə. I mà fə ə duŋ kpɛ yu nyo. 10 Ə yu fimbini fie bə yu bənchinda nnu kpɛ kənə bəŋkənə fieŋ ffɨŋ fi nyìi muŋgeni mwii. 11 Maa ye fi duŋ lə nəni, bə be bbəŋ kkə duŋ bie mbuhuŋ bə Baba, kpɛ kə duŋ nə bənhle kwaa kwoo kiih kə, ləkə nyo bənhle kwaa kwoo kiih kə. 12 Fi duŋ nəni yu ye kpɛ mà fulə ə nyo go, fidiɛɛ nyo duŋ mbwee kpɛ. Fieŋ finhliŋ bwò ə Chu kwáŋ. 13 Bə kee ŋəŋ dəŋ mənte lə fi duŋ yəəŋ bə kpɛ bənchee Chu kə kəə lə kwoo kiih lə? 14 Maa dəŋ ye bə ŋəŋ lə ə bieŋ go ə mbiŋ nte, bə kələ lə bə nyo bəŋkoo fwee kindiɛɛ lə giaali bə wu. 15 Kwaalə, bə kpɛ bəŋkənə fwee kindiɛɛ duŋ kiyuunə bə wu. Chu mà nə kpɛ fwee kindiɛɛ lə yee ki kə̄ə kwoo kiih. 16 Nəni, ə mbɛɛ ju lə duŋ həmə nnu i kìɛɛ lə yee i nōo fieŋ fɨhŋ, yee i kə̂lə lə be ləkə bimbumə bi bəne bə Chu baalə kənə je ji bənfə bieŋ kə.

Bəŋkɨnə bə kimbumə ki ndi biləə bi Chu

(Matio 26:26-29; Maak 14:22-25; Lukaa 22:14-20)

17 Kwaalə, fieŋ fidi fie həmə ffɨŋ ŋkiɛɛ lə ŋkeeh bəŋ ki fi, ə duŋ ffɨŋ duŋ ə fi fə nnakə kohi bəŋ ə fi go kə. Bwɔɔ nnu bə shii ə kimbumə mə ki fùlə bə yinwaa kə, ki fù ə duŋ bə yiwaha. 18 Fieŋ ffɨŋ ŋkiɛɛ lə nhlaa yɔɔ duŋ lə, n'yu ŋ'wō lə bwɔɔ nnu bə bwo bumə ye kimbumə ki bəne bə kimbemi lə, yee bə gā ə bintu mə. N'yee ŋŋə̄ŋ lə ə chɛɛŋ. 19 Dɨŋ bɨhŋ bimbumə kənə bənduŋ ə bəŋ mə, fo bə lə kələ bəne bbəŋ bə́ bə̀lə Jisho bə kichɛɛŋ. 20 N'yu ŋŋə̄ŋ lə bwɔɔ nnu bə bwo bumə ə kimbumə mə bəndi biləə bi Baba, bə dìlə ə duŋ bi kə. 21 N'yɔ̄ɔ nəni yu bwɔɔ nnu bə dì, mbɛɛ dì kwaa ə duŋ biih biləə i gə̀ŋ fwi, bədi ba bə jəbulə, bədi ŋwì mbihŋ mə kwò bə́ ə ŋkwomə. 22 Ə laha nəni lə? Bə lə bə chə́ŋ yyɨŋ duŋ ə yee bə dī bə ŋwì ə yí mə kə lə, lii bə kiɛɛ lə bə jə kimbumə ki bəne bə kimbemi ki Chu kwe lə, bə jə̀ bəne bənjɨnənə kwe lə? Duŋ ə n'yɔ̄ɔ bə bəŋ lə laha lə? Duŋ ə n'yee ŋkōhi bəŋ lə? ə lə kə, duŋ ə ŋkohi bəŋ kə.

23 Mmà ŋkeeh'la bəŋ ə duŋ fieŋ ffɨŋ Baba mà keeh mi, lə ə mà duŋ ə butuu, butuu bbuŋ bə́ mà duŋ bəntaa Baba Jisho, i jə chee kibele, 24 i nə kimbaafɛɛ bə Chu, gaa yɔɔ lə, “Wuhŋ lə gbo wuŋŋ wwuŋ n'yu nnə̄ bə bəŋ. Yee bə fə̂ fɨhŋ bənhle mi.” 25 Lə bə́ di kaa, i jə kwooh fə dəŋ yəəŋ ye mə hə hlaalə fə fwii, yɔɔ lə, “Kwooh kɨhŋ lə tɨmə kifwɔ kkɨŋ Chu nəə bə ŋgɔŋ məŋŋ. Yee bə fə̂ fɨhŋ bwɔɔ mənhliŋ bə ŋwì bənhle mi.” 26 Fi hlə yee fi dūŋ lə, bwɔɔ mənhliŋ nnu bə dì kibele kɨhŋ, ŋwi dəŋ kwooh kɨhŋ, yee bə dôntə ki kpe Baba gəŋ bwii bwɔɔ nnu i yá fiimə bwo. 27 Nəni, maa mbɛɛ nwɛhɛŋ nnu i dì kibele kɨhŋ ləkə i ŋwì kwooh ki Baba kɨhŋ, ə mə nakə duŋ nə ə je nwaa mə, kəə mbɛɛ yo gbee gbɛmi wi gbo maa ŋgɔŋ mə Baba. 28 Ə Mbɛɛ jə yee i dī kibele kɨhŋ i ŋwì kwooh kɨhŋ, i hlaa hlaah gbo wiih kinwaa i hlə yee i fə̂ lə, 29 yu ə mbɛɛ yee i dī kibele kɨhŋ, i ŋwì kwooh kɨhŋ nhle hləŋ lə məhŋ lə ŋgɔŋ bə gbo wi Baba, kəə mbɛɛ yo dì i ŋwì nəni, i yìi ə duŋ gbo wiih ə ŋgə mə. 30 Fiee fieŋ ffɨŋ bəne kiŋaaŋkə ə bəŋ mə duŋ fie gbo wɛɛɛ, bədi gɔ̀ŋ bədi kpè. 31 Kwaalə, ə kkə hlaah go ŋiaa kinwaakə hlə yee kkə dī kkə ŋwì, ə Baba baa hlaah be kə. 32 Ə Baba lə hlaah be, kəə i lɛhiŋ be ə nlɛhiŋ mə fo mə lə nakə buhuŋ be bə bəne bə mbiŋ nu lə kə gbee nhlaa kə. 33 Bəŋgwoŋ, fi hlə yee fi dūŋ lə, bwɔɔ nnu bə bùmə bəndi biləə bi Baba, bə ke mbɛɛ mənhliŋ i bwo. 34 Ə jəbulə lə wu mbɛɛ, mbɛɛ yo di ə wu chəŋ, i hlə yee i bwō fo mə lə nakə bwoo bwo fə fieŋ ffɨŋ duŋ ə fi too wu nhlaa fi. Ki bieŋ bidi, nlə ŋkeeh bəŋ bwɔɔ nnu nlə mbwo.