1 Kɔlɛŋ 12

Nnə llɨŋ li bwò ə Fiana Wɛɛŋ mə

Bəŋgwoŋ, nlə n'yɔɔ fidiɛɛ ki nnə llɨŋ Fiana Wɛɛŋ nə̀ bə bəne. Ŋkə ŋkiɛɛlə lə yee bə dûŋ ə jɨbə mə kə. 2 Yee bə kə̂lə lə bwɔɔ nnu bə mà kaani bəne bbəŋ bə́ dùŋ kə kələ Chu, mà duŋ, bə́ fìhi bəŋ, bə dùŋ nyɔkɔ nyɔkɔ, fi hlə fə lə yee bə bwɔ̂kwe bə bəcheh bənya bbəŋ bə́ dùŋ ə bə́ nakə yɔɔ lə jə kə. 3 Nhlə n'yee n'yɔ̄ɔ lə bə kələ kinwaa lə, ə mbɛɛ lə duŋ nnu Fiana Chu yo ə wu mə, “Ə i nakə baa lə yɔɔ lə mə lə chɨŋ Jisho.” Mbɛɛ hləŋ nnu duŋ ə i yɔɔ lə, “Jisho duŋ Baba” ə duŋ kə duŋ nə Fiana Wɛɛŋ nnu i chɨ̀nə wu.

4 Ə wɛɛ wi nnə́ mə, bəne kə̀nə nnə́ chili chili ə duŋ Fiana mwi nnu i nə̀ ŋə bə bə́. 5 Bəne nɨ̀ŋ ními chili chili ə kimbumə ki bəne bə kimbemi mə, bələh che kwoo bə́ duŋ kwaa mwi. 6 Jé duŋ chili chili yyɨŋ bəne nɨ̀ŋ ə yí mə, ə duŋ kwaa Chu mwi nnu i fə̀ lə yee bəne fə̄ ními ŋie ŋənhliŋ ə jé yé mə. 7 Chu nə dəŋ mbɛɛ mwi mwi liih nnə li Fiana Wɛɛŋ lə yee i nɨ̂ŋ, i chɨ̀nə kimbumə ki bəne bə kimbemi kinhliŋ mu. 8 Mbɛɛ ju kənə liih nnə llɨŋ Fiana Wɛɛŋ nə wu, ə duŋ bən'yɔɔ ye mbɛɛ nnu i kə̀nə bufe, li mbɛɛ ju nnə duŋ bən'yɔɔ ye mbɛɛ nnu i kə̀lə bieŋ, ə duŋ kwaa dəŋ Fiana yo mwi. 9 Fiana bwo i nə mbɛɛ ju ə duŋ nnə li tɔŋ llɨŋ duŋ ə i yii ə Chu mə ntakə, i nə mbɛɛ ju ə duŋ bəŋwuhuŋ jə́ŋ. Fiana nu duŋ kwaa mwi. 10 Fiana bwò i nə mbɛɛ ju nnə ə duŋ bənfə bieŋ bintaabə, i nə mbɛɛ ju ə duŋ bən'yɔɔ hlɨŋ nni Chu nə wu, i nə mbɛɛ ju bufe bəŋkələ lə fieŋ fidi fù ə Fiana Chu mə, fidi fù lə ə Fiana Chu mə kə, i nə mbɛɛ ju ə duŋ muŋga bən'yɔɔ díe yyɨŋ bə́ duŋ kə kələ yí, i nə mbɛɛ ju ə duŋ bən'yɔɔ fii bieŋ bbɨŋ mbɛɛ ju yɔ̀ɔ bə bəne. 11 Bə́ fə̀ bieŋ bɨhŋ binhliŋ ə nə̀ kwaa Fiana mwi nnə́ ŋəhŋ bə bə́. I gà bə mbɛɛ mənhliŋ ye i lèki lə.

Kimbumə ki bəne bə kimbemi duŋ ye gbo wi mbɛɛ mwi lə

12 Yee kkə kə̂lə lə gbo wi mbɛɛ duŋ kwaa mwe, kwaalə wi kənə bikəllə kiŋaaŋkə. Maa ye bikəllə bie duŋ lə kiŋaaŋkə nəni, bi bumə fə mbili mwi. Ə dəŋ yəəŋ ye Kleto duŋ bə bəne biih. 13 Kkə dùŋ bəne chili chili, bədi dùŋ Bəjuu, bədi Bəglik, bədi dùŋ bənfwa, bədi kə dùŋ nə bənfwa. Ə kwaa ə Fiana mwi mə nnu bə́ mà yii be bənhliŋ ə njɔ bənduŋ gbo mwe. Chu mà yiila Fiana yo mwi ə tɔ́ŋ ŋiaa mə.^ª

14 Gbo wi mbɛɛ duŋ nə kwaa kəllə mwe kə. Ə bikəllə kiŋaaŋkə. 15 Ə gbu lə ja yɔɔ lə, “Ye ndùŋ lə kə duŋ nə bweenə, kəə ndùŋ nə kəllə ki mbili kə,” ə fimbini fie nakə fəə lə ki duŋ nə kəllə ki mbili kə. 16 Ə tiɛɛ ja yɔɔ dəŋ lə, “Ye nduŋ lə kə duŋ nə dii, kəə ndùŋ nə kəllə ki mbili kə,” ə fimbini fie nakə fəə lə ki kə duŋ nə kəllə ə mbili go kə. 17 Ə mbili mbɛɛ lə duŋ kwaa dii, ə yee i wō bieŋ bə laha lə? Əə duŋ kwaa bituŋ, ə yee i wō chee bieŋ bə laha lə? 18 Fieŋ ffɨŋ fi dùŋ, duŋ lə Chu mà fə mbɛɛ bwɛɛ bikəllə binhliŋ chili chili ye i mà lèki lə. 19 Ə duŋ lə mbili mbɛɛ duŋ kwaa kəllə mwe, ə yee i dūŋ ləhəŋ lə? 20 Ye fi duŋ, bikəllə bi mbili duŋ kiŋaaŋkə. Kwaalə bi bumə bi fə mbili mwi. 21 Duŋ ə dii nakə yɔɔ lə bə bweenə lə, “Nlə bə fieŋ bənfə bə wə kə.” Duŋ dəŋ ə kwoo nakə yɔɔ lə dəŋ bə wuh lə, “Nlə bə fieŋ bənfə bə wə kə.” 22 Fieŋ ffɨŋ fi dùŋ duŋ lə, bikəllə bi mbili bbɨŋ bi nyiee bie lə bi dùŋ wɛɛɛ, duŋ ə gbo wi mbɛɛ jɨnə bi kə. 23 Bikəllə bi gbo bbɨŋ kkə ŋə̀ŋ bie lə bi lə bə nimi liŋkuntaŋ kə, ə bi bbɨŋ kkə fwòŋ gbaaŋ. Bikəllə bbɨŋ gbo bee bie be bənyii bə bəne, ə bi bbɨŋ kkə bwò yee kkə kə̄ə. 24 Bikəllə bbɨŋ bəne ŋə̀ŋ, bi kə duŋ nə bbɨŋ duŋ ə yee bə fwōŋ bi nəni kə. Chu mà bwɛɛla gbo wi mbɛɛ ə je nni duŋ ə yee bə kōhi bikəllə bbɨŋ bi nyìi lə bi duŋ nya. 25 I mà fə nəni fo kiŋga lə nakə duŋ nə ə gbo go kə, fo kəllə kidi lə yee ki chɨ̄nə kidi, kidi chɨ̀nə kidi. 26 Ə kəllə ki gbo kidi lə ja yee ki lō, kəə bikəllə bi gbo bie binhliŋ lə yee bi lō. Ə bə dohi kəllə mwe ki mbili, kəə bi binhliŋ lə yee bi tɨ̄ŋ. 27 Fidiɛɛ bəŋ bənhliŋ duŋ mbili Kleto, mbɛɛ mənhliŋ ə bəŋ mə duŋ kəllə ki mbili yo. 28 Chu chiee bəne lə yee bə́ nɨ̀ŋ ními chili chili ə kimbumə ki bəne bə kimbemi mə. Bə́ fwii dùŋ bəne bə faŋnə bə Jisho, bbəŋ bə́ bə̀lə ə bə́ go duŋ bəne bə hlɨŋ Chu, bbəŋ bə́ bə̀lə bie duŋ bəne bbəŋ bə́ kèeh bəne. I chiee bədi lə yee bə́ dūŋ bəne bbəŋ bə́ fə̀ bieŋ biŋkpee gbo, bədi ŋwùhuŋ jə́ŋ, bədi chɨ̀nə bəne. Chi bədi lə yee bə́ nāchɛ ye duŋ ə yee nimi jāa, bədi yɔ̀ɔ ə duŋ díe yyɨŋ bə duŋ kə kələ yí kə. 29 Kwaalə ə bəne bənhliŋ bbəŋ bə́ dùŋ bəne bə faŋnə bə Jisho kə. Kwaalə ə bəne bənhliŋ bbəŋ bə́ yɔ̀ɔ hlɨŋ Chu kə. Kwaalə ə bəne bənhliŋ bbəŋ bə́ kèeh bəne kə, ə bəne bənhliŋ bbəŋ bə́ fə̀ bieŋ biŋkpee gbo kə. 30 Ə bəne bənhliŋ bbəŋ bə́ kə̀nə nnə li ŋwuhuŋnə jə́ŋ kə. Ə bəne bənhliŋ bbəŋ bə́ yɔ̀ɔ díe yyɨŋ bə́ dùŋ kə kələ yí kə. Ə dəŋ bəne bənhliŋ bbəŋ duŋ ə bə́ yɔɔ fii bieŋ bbɨŋ bəne yɔ̀ɔ ə díe yidi mə bə bəne kə. 31 Ye nnə́ ŋəhŋ ŋənhliŋ duŋ lə nəni, yee bə kîɛɛ gbaaŋ lə bə kənə ə duŋ nnə liŋkuntaŋ kah ŋənhliŋ. Kwaalə, nlə nyii bəŋ fieŋ ffɨŋ fi kàh nnə ŋənhliŋ.