1 Kɔlɛŋ 13

Kinleki kàh bieŋ binhliŋ

Ə duŋ lə n'yii ŋkə̀lə bən'yɔɔ díe yí bitɨŋ binhliŋ maa díe yí bənchinda bə Chu, ə duŋ lə kə̀nə lə kinleki bə bəne, kəə ŋkə̀h kwaa ə duŋ kijə ye nyɔŋ nni bə́ kɔ̀ɔ lə, ləkə bikwinə bbɨŋ bə́ kwì lə. 2 Ə duŋ lə ŋkənə dəŋ múŋga mu n'yɔɔnə hlɨŋ nni Chu nəə bə mi, ŋkələ dəŋ bieŋ binhliŋ maa bbɨŋ bi dùŋ ə nələ mə, ə duŋ n'yiila tɔŋ ə Chu mə gbaaŋ llɨŋ duŋ ə n'yee mbwā bikɔni, kwaalə ŋkə ŋkənə kinleki bə bəne, kəə ndùŋ kwaa fieŋ finya. 3 Ə nlə njə bieŋ bɨŋŋ kiɛkiɛ gah bə bəne, nnəə kaa gbo wuŋŋ bənɨŋ bə Chu fo nlə n'yee ŋ'wē,^ª kwaalə ŋkə ŋkənə kinleki bə bəne, ə mbɨŋ nakə duŋ nə mu kə. 4 Mbɛɛ nnu i kə̀nə kinleki bə bəne bwò i dɨ̀ɨmə, i fə̀ bieŋ binwaa bə bəne. Dɨŋ mbini yo mbɛɛ kənə lə mɛɛ ki luhunə kə. I nyìi lə gbo ləkə we kə. 5 Mə lə bə kintɔŋ kə. I bwò i kə hlee kwaa ə duŋ gbo wiih kə. I fwòo lə lo chichii kə. I chì lə mbɛɛ hədɨŋ kə. 6 I wò lə njənjə bə fieŋ fiwaha. I bwò i wò njənjə ə duŋ bə fieŋ fintiiŋ. 7 Mbɛɛ nnu i lèki maani bwò i bèmi bieŋ binhliŋ, i yìi tɔŋ ə bieŋ binhliŋ mə, i kèe kwaa fwi ə fieŋ finhliŋ go, i kwàa tɔŋ bə fieŋ finhliŋ. 8 Kinleki kà lə kə. Kwaalə bwɔɔ yu bwō nnu muŋgeni mmuŋ Chu nəə lə bəne yee bə́ yɔ̄ɔ hlɨŋ mu yá kah, ə bəne nakə baa lə yɔɔ díe yyɨŋ bə́ duŋ kə kələ yí kə, ə bəne nakə baa lə kənə nnə li kələnə bieŋ kə. 9 Bi kàh nəni yu kkə kələ bieŋ fidiɛɛ kwaa kiŋkə kiŋkə, kkə yɔ̀ɔ hlɨŋ nni Chu nəə kwaa kiŋkə kiŋkə. 10 Kwaalə ə yáa ə dūŋ bwɔɔ nnu bieŋ yá wunə kaa, ə bieŋ kiŋkə kiŋkə kah. 11 Bwɔɔ nnu mmàa ŋkāani ŋiaŋ wɛ, mmàa n'yɔ̄ɔ ye ŋiaŋ lə, nhlè bieŋ ye ŋiaŋ lə, ŋ'wə̀lə bieŋ ye ŋiaŋ lə. Ntaa fidiɛɛ bwo cheekwaŋ ə fwɔ wi bwɔni go. 12 Fidiɛɛ kkə ŋə̀ŋ bieŋ jɨkə jɨkə ye ə miajɔ mə lə. Kwaalə ə yáa ə dūŋ ə bwɔɔ yo bəŋ, ə kkə yá ŋəŋ bieŋ dii bə dii. Fidiɛɛ duŋ ŋkələ bieŋ kiŋkə kiŋkə, ə bwɔɔ yo bəŋ duŋ ə n'yá ŋkaanə kələ bieŋ dəŋ yəəŋ ye Chu kəla lə kaa mi. 13 Bəŋkpee bieŋ bie həmə bitɔh bbɨŋ bi bà həmə. Bieŋ bɨhŋ duŋ: bən'yii tɔŋ ə Chu mə, bəŋkee fwi ə ki kaachi ki Chu go, maa bəŋkənə kinleki. Ə bieŋ bi bitɔh bɨhŋ mə, kwaalə kinleki dùŋ ffɨŋ fi ko kah bi binhliŋ.