Bəmbaa yɔɔ ki nnə li Fiana Wɛɛŋ
14
Yee bə chî kinleki fwi ə bieŋ binhliŋ mə, bə kə̀nə dəŋ ŋgɨŋ ntaabə ə nnə́ ŋŋəŋ Fiana Wɛɛŋ nə̀ bəne, gbɛntɛlɛ bən'yɔɔ hlɨŋ nni Chu nə̀ mbɛɛ. 2 Ə mbɛɛ yee i yɔ̄ɔ ə díe yyɨŋ bə́ duŋ kə woo yí, kəə i yɔ̀ɔ lə ə duŋ bə bəne kə, kəə i yɔ̀ɔ ə duŋ bə Chu, yu mbɛɛ ju wò lə fieŋ ffɨŋ i yɔ̀ɔ fie kə. I yɔ̀ɔ ə duŋ bieŋ bbɨŋ bi dùŋ ə nələ mə bə muŋgeni mu Fiana Wɛɛŋ. 3 Kwaalə, mbɛɛ nnu i dòntə hlɨŋ Chu yɔ̀ɔ ə duŋ bə bəne, i fə̀ bəne kò ə kimbemi kibə mə, i tàhi go ŋəbə, i fə̀ dəŋ tɔ́ŋ ŋə bəne də̀. 4 Mbɛɛ nnu i yɔ̀ɔ ə díe yyɨŋ bə́ duŋ kə woo mə chɨ̀nə ə duŋ gbo wiih kwaa. Kwaalə, mbɛɛ nnu i yɔ̀ɔ hlɨŋ Chu chɨ̀nə ə duŋ kimbumə ki bəne bə kimbemi kinhliŋ. 5 N'yu nlēki lə yee bə yɔ̄ɔ ə duŋ díe yyɨŋ bəne duŋ kə woo yí. Kwaalə, fieŋ ffɨŋ nlèki gbaaŋ duŋ lə yee bə yɔ̂ɔ ə duŋ hlɨŋ nni Chu nə mbɛɛ. Mbɛɛ nnu i yɔ̀ɔ hlɨŋ nni Chu nə bə mbɛɛ ko kah mbɛɛ nnu i yɔ̀ɔ díe yyɨŋ bə duŋ kə kələ yí kə. Kahiŋ lə mbɛɛ ju fiila díe yé bə kimbumə ki bəne bə kimbemi lə bə́ wo kinwaa fo fi chɨnə bə́.6 Bəŋgwoŋ, ə nlə nja fidiɛɛ bwo ə bəŋ go, n'yɔ̄ɔ díe yyɨŋ bə duŋ yí kə woo kə, ə fimbini fie chɨnə bəŋ bə laha lə? Fieŋ ffɨŋ duŋ ə fi chɨnə bəŋ duŋ kwaa bwɔɔ nnu mbwò bə fieŋ fifwɔ ffɨŋ Chu nyiila bə mi, ləkə fieŋ fidi ffɨŋ i yu kīɛɛ lə nfə lə bə kələ, ləkə hlɨŋ yi ji lə n'yɔɔ bəŋ, ləkə fieŋ fidi lə nlaanə bəŋ mu. 7 Bə chiini fieŋ fidi ye finlɛlɛ lə ləkə chiŋ nni i dùŋ kə kənə fiana. Ə duŋ ə mbɛɛ fə ləhəŋ hlə kələ fieŋ ffɨŋ bi yɔ̀ɔ ə duŋ bə́ kaani kə tɔŋ nə bi ləkə kwi bi kinwaa kə lə? 8 Ə mbɛɛ ja lə i yu tɔ̄ŋ kiŋgbu ki ntɨmə, ə mə nakə tɔŋ nə ə je nwaa mə, ə bəne fə ləhəŋ hlə bwɛɛ go ŋə ntɨmə lə? 9 Ə dəŋ yəəŋ ye ə bə lə yɔɔ díe bə bəne yyɨŋ bə́ duŋ kə woo yí, ə bə́ fə ləhəŋ hlə kələ fieŋ ffɨŋ bə yɔ̀ɔ fie lə? Ə fi nakə duŋ nə lə biyɔɔnə bieeŋ bie bi lā kwaa ə fwee mə lə? 10 Ə fieŋ fi naamənə kə lə díe dùŋ yaŋ ə mbiŋ nte kiŋaaŋkə chili chili. Yidi hləŋ həmə yyɨŋ mbɛɛ duŋ kə kələ kinuu ki yí kə. 11 Kwaalə, ə mbɛɛ lə ja yee i yɔ̄ɔ bə mi ə díe yyɨŋ ndùŋ kə woo mə kə, kəə nduŋ nfuuntə bə wu, i duŋ dəŋ nfuuntə bə mi. 12 N'yu n'yɔ̄ɔ bə bəŋ lə, ye bə kiɛɛlə lə muŋgeni mu Fiana Wɛɛŋ yee mwi dūŋ ə bəŋ mə, ye bə jù lə gbaaŋ bəŋkənə nnə llɨŋ Fiana nə̀, bə kiɛɛ ə duŋ llɨŋ li fə̀ kimbumə ki bəne bə kimbemi kò.
13 Fi hlə yee fi dūŋ lə, ə mbɛɛ yɔɔ díe yyɨŋ bə duŋ kə woo yí, yee i chêe Chu lə Fiana Chu nə wu bufe bu yɔɔnə fii fieŋ ffɨŋ i yɔ̀ɔ fie bə bəne. 14 Ə nja n'yee nchēe Chu ə díe yyɨŋ bə duŋ kə woo mə kə, kəə nchèe ə duŋ bə fiana ŋgwəŋ, kwaalə ŋkə nchee lə bə bufe buŋŋ kə. 15 Ye fi duŋ lə nəni, duŋ ə nfə ləhəŋ lə? Duŋ ə n'yee nchēe Chu bə fiana ŋgwəŋ, nchèe dəŋ bə bufe buŋŋ, nshèeni ə fiana ŋgwəŋ mə, nshèeni dəŋ bə bufe buŋŋ. 16 Kahiŋ nəni, ə wə ja yee wə dōhi Chu ə fiana wa mə, ə mbɛɛ ju duŋ həmə nnu i wə̀lə kwaa, ə i fə ləhəŋ hlə bemi lə, “Yee fi Dûŋ lə” yulahalə kimbaafɛɛ kkɨŋ wə nə̀ kie bə Chu, ə i nakə woo díe yyɨŋ wə yɔ̀ɔ yé kə lə? 17 Ə wə nə kimbaafɛɛ nəni, baa nə dəŋ gbaaŋ ye ləhəŋ lə, kəə duŋ ə fi chɨnə dəŋ mbɛɛ ju yo kə. 18 Mbaafɛ Chu lə n'yɔ̀ɔ díe yyɨŋ bə duŋ kə woo yí kə kah bəŋ bənhliŋ. 19 Kwaalə, maa ye n'yɔ̄ɔlə nəni, bwɔɔ nnu ndùŋ ə kimbumə ki bəne bə kimbemi mə, nlèki bən'yɔɔ díe shiŋ yyɨŋ yí kə̀nə bufe, fo nlə nlaanə bəne bədi, kahiŋ bən'yɔɔ díe bənchuku yuufi (10,000) yyɨŋ bə́ nakə woo yí kə.
20 Bəŋgwoŋ, bə kə yee bə kə̂nə munhlenə ye bwɔni bəwɛ lə kə. Yee bə dûŋ kwaa ye bwɔni bəwɛ lə bbəŋ bə́ dùŋ kə kələ fieŋ ki yiwaha kə. Kwaalə, yee bə kə̂nə munhlenə mu bəne bəcha. 21 Bə́ mà bieŋna ə Kiŋwaati ki bəŋkɨnə mə lə,
“Mi Baba Chu n'yɔ̄ɔ lə, nlə n'yee n'yɔ̄ɔ
bə bəne bəŋŋ ə díe yí nfúuntə mə,
ə díe yyɨŋ bə́ duŋ kə woo yí kə.
Kwaalə, maa ye nfə̀lə nəni ə bə́ nakə woo mi kə.”
22 Fi hlə yee fi dūŋ lə, bən'yɔɔ díe yyɨŋ bə duŋ kə woo yí, duŋ kinyii kkɨŋ ki nyìi muŋgeni mu Chu bə bəne bbəŋ bə́ dùŋ kə duŋ nə bə kimbemi kə. Ə kinyii ki bəne bə kimbemi kə. Kwaalə, nnə li n'yɔɔnə hlɨŋ Chu lə kinyii kkɨŋ ki nyìi muŋgeni mu Chu bə bəne bə kimbemi, ə kə duŋ nə bə bbəŋ bə́ dùŋ kimbemi hləŋ kə. 23 Ə duŋ lə kimbumə ki bəne bə kimbemi bənhliŋ ja bwo bumə, mbɛɛ mənhliŋ ja chɔɔ bən'yɔɔ kwaa ə duŋ díe yyɨŋ bə́ duŋ kə woo yí kə, ə bəne bə woo ləkə bəne bbəŋ bə́ dùŋ kə duŋ nə bə kimbemi ja bwo lɛɛ ə bəŋ mə, wo ye bə yɔ̄ɔ, ə bə́ nakə hlee lə bə gbee ja lə? 24 Kwaalə, ə duŋ lə mbɛɛ mənhliŋ yɔ̀ɔ ə duŋ hlɨŋ nni Chu nə mbɛɛ, ə mbɛɛ woo ləkə nnu i dùŋ kə duŋ nə mbɛɛ kimbemi lɛɛ ə bəŋ mə, fieŋ ffɨŋ bə yɔ̀ɔ, ə fi fə ə i kələ lə i dùŋ mbɛɛ waha, ə fi hlaah wu ə tɔŋ liih go, 25 ə bieŋ bbɨŋ bi nimi ə tɔŋ liih go, nyiee ŋgbuuŋ. Nəni, ə i hlə bɛŋ núh kwe, nə kiŋkohi kiŋkuntaŋ bə Chu yɔɔ lə, “Chu yo ba ə bəŋ mə.”
Ye duŋ ə kimbumə ki bəne bə kimbemi yee ki bwɔ̂kwe ə je nwaa mə
26 Bəŋgwoŋ, fieŋ finhliŋ ffɨŋ n'yɔ̀ɔ duŋ lə ləhəŋ lə? Fi duŋ lə, bwɔɔ nnu bə bwò ə kimbumə mə, mbɛɛ nnu i kə̀nə yii li teenə i tee, nnu i kə̀nə keehnə i keeh, nnu i kə̀nə fieŋ ffɨŋ Chu nyiila bə wu i yɔɔ, nnu i kə̀lə bən'yɔɔ díe yyɨŋ bə́ dùŋ kə woo yí kə i yɔɔ, nnu i kə̀lə bən'yɔɔ fii díe lə bəne wo duŋ dəŋ i yɔɔ fii. Yee bə fə̂ bieŋ binhliŋ ə jé yyɨŋ duŋ ə yee yí chɨ̀nə kimbumə ki bəne bə kimbemi. 27 Ə duŋ lə bəne bie bbəŋ bə́ yɔ̀ɔ díe yyɨŋ bə́ duŋ kə woo yí, yee bə́ dûŋ kwaa bəfwe ləkə bətɔh. Bwɔɔ yɔɔnə yee bə́ yɔ̂ɔ mbɛɛ mwi mwi, mbɛɛ ju yɔɔ fii fieŋ ffɨŋ bə́ yɔ̀ɔ fie bə bəne. 28 Ə mbɛɛ nakə duŋ nə həmə nnu i kə̀lə bən'yɔɔ fii fieŋ ffɨŋ bə́ yɔ̄ɔ fie, yee i dûŋ kijə kimaalə ə kimbumə ki bəne bə kimbemi mə, i yɔ̀ɔ kwaa ə tɔŋ liih mə bə gbo wiih maa bə Chu. 29 Ə duŋ lə bəne bbəŋ bə́ yɔ̀ɔ hlɨŋ nni Chu nəə bə bəne bie həmə, bəfwe ləkə bətɔh yee bə́ yɔ̂ɔ bə bəne. Bwɔɔ nnu bə́ yɔ̀ɔ, bədi yee bə́ chîini fieŋ ffɨŋ bə́ yɔ̀ɔ fie kinwaa. 30 Ə duŋ lə Chu nyiila fieŋ bə mbɛɛ ju nnu mə hə shii həmə, mbɛɛ nnu mə həə i hlaa yɔ̄ɔ yo də shiiiŋ, i nə je bə mbini yo mbɛɛ i yɔɔ chuu. 31 Yee bə kə̂lə lə bəŋ bənhliŋ duŋ ə bə yɔɔ hlɨŋ nni Chu nə̀ bə mbɛɛ. Bwɔɔ nnu bə yɔ̀ɔ, ə fi keeh mbɛɛ mwi mwi fo bəne bənhliŋ lə laanə bieŋ bə bəŋ, ə yee bə baa bə tàhi go ŋəbə ŋənhliŋ. 32 Bəne bbəŋ bə́ kə̀nə nnə li yɔɔnə hlɨŋ nni Chu nəə bə mbɛɛ, kənə muŋgeni bənfwoŋ nnə le ə je nwaa mə, 33 yu Chu duŋ nə nyɔkɔ kə, Chu duŋ Chu kindunshiiŋ.
Ye fi duŋ ə bimbumə bi bəne bə Chu mə, 34 bəkwɛɛ bbəŋ bə́ bwò həmə, yee bə́ dûŋ kijə ki maalə, yulahalə fi kə duŋ nə yəəŋ bə kpɛ bən'yɔɔ jə mu kə. Yee bə́ wô bə bənəə bəbə, ə duŋ dəŋ ye ŋkɨnə yɔ̀ɔ. 35 Ə duŋ lə fieŋ fie həmə ffɨŋ bə́ kiɛɛ lə bə́ kələ, bə́ bii bə bənəə bəbə bwɔɔ nnu bə́ kwələ chu chəŋ, yu ə gbo wi beenə bə kpɛ bən'yɔɔ jə ə kimbumə ki bəne bə kimbemi mə. 36 Yee bə kə̂lə lə die Chu mà kə bwoo ə bəŋ kwáŋ kə. Ə kwaa bəŋ bbəŋ bə́ mà jə die Chu dəŋ kə. 37 Ə mbɛɛ lə hle lə i dùŋ mbɛɛ nnu i yɔ̀ɔ hlɨŋ Chu, kəə i jəə gbo wiih ye mbɛɛ Fiana Wɛɛŋ lə, i kənə bəmbemi lə fieŋ ffɨŋ mbieŋ fɨhŋ ə nyii Baba mi fɨhŋ nini. 38 Ə mbɛɛ nakə bemi fi, ə yee fi dūŋ lə bə duŋ ə bə nakə bemi dəŋ wu bə fiih fieŋ kə.