1 Kɔlɛŋ 15

Jisho Kleto mà fwoo ə kpe mə

Bəŋgwoŋ, ŋkiɛɛ fidiɛɛ bəŋoo bəŋ ki hlɨŋ nwaa nni mmà mbwo dontə ye bə bəŋ, bə tɨŋ jə yee bə lēmi ə yi bəŋ fidiɛɛ. 2 Ə hlɨŋ nwaa nini nni mə fwoo bəŋ ə duŋ lə bə kəna mu ntakə. Ə nakə duŋ nə nəni kəə bə mà bemi kwaa ə duŋ nya. 3 Yee bə kə̂lə lə mmà nnəə bəŋ fieŋ fishaŋ ə fieŋ finhliŋ mə. Ə duŋ dəŋ fi ffɨŋ bə́ mà yɔɔla mi. Fieŋ fɨhŋ duŋ lə Kleto mà kpee yu yíwaha yaa yəəŋ ye bə́ mà bieŋna lə ə Kiŋwaati ki Chu mə, 4 bə lə, bə́ mà diih'la wu, lə yee ə dūŋ ə joo bəŋ tɔh, Chu fwoo wu ə kpe mə dəŋ yəəŋ ye bə́ mà bieŋ lə ə Kiŋwaati ki Chu mə, 5 maa ye i mà nyiila lə gbo wiih bə Pita,^ª i baa nyii dəŋ bə bəne biih bə faŋnə bə yuufi ə nchɔ bəfwe. 6 I nyii dəŋ gbo wiih bə bəne bə kimbemi bbəŋ bə́ dùŋ dɔhɔ mwe kah bəne gi tiŋ. Bəne kiŋaaŋkə ə kintu kɨhŋ mə bie bə́ kaani həmə bwii daŋ, bədi mà kpee. 7 I nyii dəŋ gbo wiih bə Jɛŋ, i baa nyii bə bəne biih bə faŋnə bənhliŋ. 8 Bwɔɔ nnu dɨŋ, i nyii dəŋ gbo wiih bə mi nnu ndùŋ nu ye ŋiaŋ nnu bwee liih mà kə duŋ nə ə je ntiiŋ mə kə. 9 N'yɔ̄ɔ nəni yu nduŋ ye mbɛɛ tənə lə ə bəne bə faŋnə bə Jisho mə bənhliŋ. Ŋkə wunə dəŋ nnu ndùŋ ə yee bə́ chēe mi lə mbɛɛ faŋnə Jisho kə, yu mmà nhlɔɔla gbu ə kimbumə ki bəne bə kimbemi bə Chu dɨŋ. 10 Kwaalə, ə maa kinchɨnə ki Chu kkɨŋ ki fə̀ nhlə n'yee ndūŋ fieŋ ffɨŋ ndùŋ fɨhŋ ə fi mə fidiɛɛ. Kinchɨnə kkɨŋ Chu mà nə kɨhŋ mi kə laa nya kə. Mmà nɨŋna kah bəne bə faŋnə bə Jisho bənhliŋ. Kwaalə, ə mà kə duŋ nə mi nnu mmàa nnɨ̄ŋ nəni bə muŋgeni muŋŋ kə. Ə màa kinchɨnə kɨhŋ kkɨŋ Chu mà nəə mi kkɨŋ ki màa ki nɨ̄ŋ ə mi mə. 11 Fi hlə yee fi dūŋ lə ləkə ə màa mi nnu mmàa ndōntə hlɨŋ nih bə bəŋ, ləkə ə màa ə dōntə bə́, kəə ə kwaa fieŋ fimwi ffɨŋ bee bə́ dòntə, bə bèmi fi.

Kkə yá yi fu dəŋ ə kpe mə

12 Fidiɛɛ ye kkə yɔɔlə lə Kleto mà fwoo ə kpe mə, bəŋ bədi bie fə ləhəŋ hlə yee bə yɔ̄ɔ lə bəne bbəŋ bə́ kpè yá ba kə fwoo ə kpe mə lə? 13 Ə duŋ lə ə chɛɛŋ lə bəne bbəŋ bə́ kpè yá fwoo ə kpe mə kə, kəə Kleto mà kə fwoo dəŋ ə kpe mə kə. 14 Ə duŋ lə Kleto mà kə fwoo ə kpe mə kə, kəə fieŋ ffɨŋ kkə dòntə fie duŋ nya, tɔŋ llɨŋ bə yìi le ə wu mə duŋ dəŋ linya. 15 Ə duŋ lə ə lə, kəə kkə bèmi kah bənhlaa kaalənə yo ki Chu, yu kkə jàa kkə yɔ̀ɔ lə i mà fwoola Kleto ə kpe mə, ə duŋ kə duŋ nə lə kə, ə fi duŋ lə bəne bbəŋ bə́ kpè fù lə ə kpe mə kə. 16 Ə lə duŋ chɛɛŋ lə bəne fù lə ə kpe mə kə, kəə Kleto mà kə fwoo ə kpe mə kə. 17 Yee fi dūŋ lə, ə duŋ lə Kleto mà kə fwoo ə kpe mə, kəə tɔŋ llɨŋ bə yìi le ə wu mə duŋ linya, yíwaha yeeŋ kaani kwaa ə bəŋ fí. 18 Ə yee fi dūŋ dəŋ lə bəne bbəŋ bə́ mà kpee ə duŋ bə́ duŋ mbuhuŋ bə Kleto laa nya. 19 Ə duŋ lə kkə yìi bufe ə Kleto mə, kkə kèe lə i chɨnə kwaa be ə kinduŋh ki yaŋ kwe kɨhŋ mə, kəə kkə dùŋ bəne bbəŋ bə́ dùŋ lə yee bəne kwô hlɨŋ bə be kah bəne bənhliŋ.

20 Kwaalə, kichɛɛŋ ki mu duŋ lə, Chu mà fwoola Kleto ə kpe mə. Ə Kleto mbɛɛ nnu fwii nnu i mà hlaa tɔ je ə bəne bbəŋ bə́ kpè mə. 21 Ə màa mbɛɛ mwi nnu i mà fə kpe hlə bwo ə bəne bənhliŋ bəŋ, ə dəŋ yəəŋ ye mbɛɛ mwi mà fəə lə bəne yá hlə fu ə kpe mə. 22 Yee fi dūŋ lə, ye bəne bənhliŋ mà kpe lə yu bə́ mà duŋ ə kichəŋ ki Adaŋ mə, ə dəŋ yəəŋ ye bəne bənhliŋ yá baa duhŋ yu bə́ dùŋ bəne bə Kleto. 23 Kwaalə, mbɛɛ yáa i fū dəŋ ə wi yo bwɔɔ bəŋ. Kleto dùŋ mbɛɛ nnu i mà hlaa tɔ je funə. I yá fiimə bwo, ə bəne bbəŋ bə́ dùŋ biih hlə fu dəŋ. 24 Fi yá duŋ nəni, ə bwɔɔ nnu mbiŋ lə ka hlə bwii. Kleto yá gɔhɔ laa muŋkɨŋ bə muŋga maa kiŋkuntaŋ kinhliŋ kkɨŋ ki hlàah fidiɛɛ, ə i chuu muŋkɨŋ mwii bə Tili Chu. 25 Ə wu Kleto nnu i kə̀nə kwaa bənhlaah gəŋ bwii bwɔɔ nnu Chu yá chi bəne bənhliŋ bbəŋ bə́ dùŋ kə diee njənə bə wu wuh ŋiih kwe, ə i diɛŋ wuh ŋiih ə bə́ bəŋ. 26 Mbɛɛ nnu i dùŋ yo kə diee njənə bə wu nnu dɨŋ, nnu i yá kaanə gɔhɔ laa lə kpe. 27 Ə fieŋ ffɨŋ bə́ mà bieŋna ə Kiŋwaati ki Chu mə lə,

“Chu chiee bieŋ binhliŋ wu kwe i yu hlāah.”

Kwaalə, bən'yɔɔ lə bieŋ binhliŋ duŋ wu kwe kə duŋ nə lə Chu nnu i chi yo bieŋ binhliŋ ə wu kwe duŋ dəŋ ə wu kwe kə. 28 Ə yáa ə dūŋ bwɔɔ nnu bieŋ binhliŋ yá duŋ ə Kleto kwe i hlàah, ə wu Ŋwa Nchu hlə chi gbo wiih Tili kwe nnu i chì yo bieŋ binhliŋ ə wu kwe, fo Chu lə yee i dūŋ ə bieŋ binhliŋ bəŋ ə bidɔhɔ mə binhliŋ i hlàah.

29 Ə nakə duŋ nə lə bəne bbəŋ bə́ mà kpe bie mà fwoo ə kpe mə, bə́ hlə yee bə́ yīi bəne ə njɔ ə yii li bəne bbəŋ bə́ mà kpee bie bəŋ yulaha lə? Bə́ yìi bə́ ə njɔ nəni kinhle ki mu duŋ laha lə? 30 Kkə hlə yee kkə jāa kkə jìi go ŋiaa bwɔɔ mənhliŋ ə bidɔhɔ bi bəŋgə mə nəni yulaha lə? 31 Bəŋgwoŋ, nduŋ ə gbe jə joo ŋənhliŋ. N'yɔ̄ɔ bieŋ bɨhŋ nəni yulahalə n'yu ŋ'wē bə fieŋ ffɨŋ Jisho Kleto Baba ya kaah ə mi kwáŋ fə bə bəŋ. 32 Ə nakə duŋ nə lə bəne bbəŋ bə́ kpè yá yi fu ə kpe mə, ye bəne ba bən'yɔɔ bieŋ, mbwo ŋgəŋ ə Ɛfɛshu, bəne bbəŋ bə́ lò ye nyáŋ yí nji lə yee bə́ kīɛɛ lə bə́ shwa mi ə nshwa mə mbɨŋ nnu mu lə laha lə? Nlə nchee lə kwáŋ mu yɔɔ kwaa lə, “Yee kkə dī, kkə ŋwì yu mbwaa yá duŋ ə kkə kpe lə?” 33 Mbɛɛ kə yee i fîhi bəŋ kə. Yee bə kə̂lə lə, “Ə mbɛɛ fwɔ winwaa yee i jāa bə kintu kiwaha, ə kintu kie bihi wu.” 34 Bə́ dii bufe bweeŋ dɨŋ, tukwaŋ ə yiwaha go. Ŋŋəŋna lə bəŋ bədi kələ lə Chu. N'yɔ̄ɔ nəni fo bə lə yee bə dūŋ bə kimbee gbo.

Gbo wwuŋ bəne yáa bə́ fū bə wi ə kpe mə

35 Duŋ ə mbɛɛ ju ja yee i bīi ləə, “Bəne yá fu ə kpe mə ləhəŋ lə? Bə́ yáa bə́ kənə ə duŋ dɨŋ gbo wɛhɛŋ lə?” 36 Mbini yo mbɛɛ nnu i bīi yo nəni duŋ nfili, i kə kələ lə bə́ bwo ə bə́ dɔ fieŋ, fi hlaa kpe fi hlə bwo mɛŋ lə? 37 Fieŋ ffɨŋ bə́ dɔɔ, ə fimbini fie kibɛɛ ffɨŋ fi fù kə. Bə́ bwò ə bə dɔ kwaa ŋgɔ yo wu wu, ləkə ə ŋgɔ gɨŋ ŋə bəjaa, ləkə ə laha lee, 38 Chu hlə nə ŋgɔ yo gbo wwuŋ i lèki. I nə̀ go chili chili bə bəŋgɔ bie ye ŋgɔ yo duŋ lə. 39 Bieŋ binhliŋ kənə lə gbo yəəŋ kə. Bəne kə̀nə nyáŋ yí go chili chili, nyáŋ kə̀nə yiyi, munyini kə̀nə muyi, fiɔŋ kə̀nə dəŋ yiyi go. 40 Bieŋ bi buh kə̀nə jé yibi, bi yaŋ kwe kə̀nə jé yibi. Bieŋ bi buh kə̀nə kinwaa kibi, bi yaŋ kwe kə̀nə kinwaa kibi. 41 Ŋwiŋ kə̀nə kinwaa kiwi, kpii kə̀nə kinwaa kiwi, muntoola kə̀nə dəŋ kinwaa kimwi. Fintoola fidi bə fidi kənə lə dəŋ kinwaa yəəŋ kə.

42 Ə lə dəŋ ye fi duŋ bə gbo wi mbɛɛ bwɔɔ nnu i fwoo ə kpe mə. Bwɔɔ nnu bə́ diih mbɛɛ gbo wiih fwɔ, kwaalə gbo wwuŋ Chu yá fwoo we ə kpe mə yá baalə fwɔ kə. 43 Bə́ diih mbɛɛ bə gbo wi kə nyiee lə kinwaakə kə, wi kə kənə muŋga dəŋ kə. Kwaalə, i yáa i fū ə kpe mə bə gbo wwuŋ wi duŋ winwaa, wi kənə muŋga. 44 Bə́ diih mbɛɛ gbo wiih duŋ wi mbɛɛ ŋkee. Kwaalə, i yáa i fū ə kpe mə bə gbo ə duŋ dɨŋ wi fiana. Ə duŋ lə gbo wi mbɛɛ ŋkee yii dùŋ, kəə dɨŋ gbo wi fiana yii dùŋ dəŋ.

45 Fi duŋ bə́ bieŋna lə, “Adaŋ nnu fwii mà choo mbɛɛ ŋkee.” Lə ə bwo chu Adaŋ nnu dɨŋ, yee i dūŋ mbɛɛ nnu i nə̀ fiana. 46 Mbɛɛ bwo i kə hlaa lə kənə gbo ə duŋ wi fiana kə. I bwo i hlaa kənə ə duŋ gbo wi mbɛɛ ŋkee, i hlə bwo kənə gbo wi fiana. 47 Adaŋ nnu fwii bə́ mà fə wu bə shishɔ. Adaŋ nnu dɨŋ mà fu ŋgwo wi ə buh. 48 Bəne bə yaŋ kwe duŋ ye mbɛɛ nnu fwii nnu bə mà fə yo wu bə shishɔ, bəne bbəŋ bə́ dùŋ ye bə buh duŋ ye mbɛɛ nnu i fu ə buh. 49 Ye kkə duŋ lə ye mbɛɛ nnu bə́ mà fə bə shishɔ, ə li dəŋ nəni ye kkə yá duŋ li ye mbɛɛ nnu i mà fu ə buh.

50 Bəŋgwoŋ, n'yɔ̄ɔ bəŋ lə gbo wwuŋ wi duŋ nyaŋ bə ŋgɔŋ yá kənə dɔhɔ ə muŋkɨŋ mu Chu mə kə. Duŋ dəŋ ə fieŋ ffɨŋ duŋ ə fi fwɔ nakə kənə dɔhɔ ə fieŋ fifwɔ mə kə. 51 Nlə n'yɔ̄ɔ bəŋ fieŋ fi nələnə. Be bənhliŋ yá kpee kə. Kwaalə go ŋiaa ŋənhliŋ yá yi gaanə. 52 Bwɔɔ nnu bə́ yá tɔŋ kiŋgbu ki həŋgbɔŋ, ə go ŋiaa hlə gaanə dəŋ nəni cha mi ye mbɛɛ bwo lə i mìaali bə díi. Bwɔɔ nnu kiŋgbu yá yɔɔ jə ə Chu yá hlə yee i fwōo bəne ə kpe mə bə gbo wwuŋ wi duŋ ə wi nakə baa lə fwɔ kə, ə be bbəŋ kkə kaani bie bəŋkee hlə gaanə. 53 Gbo wwuŋ wi fwɔ wuhŋ kənə ba bəŋgaanə chu ə duŋ wwuŋ wi yá duŋ kə fwɔɔ kə. Gbo wwuŋ wi duŋ ə wi kpe kənə bəŋgaanə baa chu wwuŋ wi duŋ ə wi nakə kpee kə. 54 Bwɔɔ nnu gbo fwɔ chu wwuŋ duŋ ə wi nakə fwɔɔ kə, bwɔɔ nnu gbo chu wwuŋ duŋ ə wi nakə kpee kə, ə fieŋ finhliŋ hlə wunə ye bə́ bieŋna lə ə Kiŋwaati ki Chu mə lə,

“Bə́ kaah kpe bwo kah muŋgeni mwii.

55 Ho kpe, muŋgeni mwo lə fəhəŋ lə?

Ho kpe, gbɛŋ wo wwuŋ wə tà we bəne mu lə fəhəŋ lə?”

56 Gbɛŋ wi kpe duŋ yiwaha, muŋga mu yiwaha duŋ bəŋkɨnə bə Chu. 57 Ye fi duŋ lə nəni, kkə nə kimbaafɛɛ bə Chu nnu i buhaŋ be bə Baba ya Jisho Kleto, kkə kaah yiwaha bə kpe.

58 Nəni bəŋgwoŋ bbəŋ bə́ dùŋ tɔŋ lɨŋŋ, yee bə lêmi ntakə. Fieŋ fidi kə nɛhiŋ bəŋ kə. Yee bə nə̂ go ŋieeŋ bə nimi li Baba bwɔɔ mənhliŋ, bə kə̀lə lə nimi llɨŋ mbɛɛ nɨ̀ŋ bə Baba kə laa nya kə.