1 Kɔlɛŋ 16

Bichukənə bbɨŋ bə́ nə̀ bənchɨnə bəne bə Chu mu

N'yɔɔ fidiɛɛ ki bichukənə bbɨŋ bə́ bie bə́ bwɛ̄ɛ bənnə bənchɨnə bəne bə Chu mu. Yee bə fə̂ dəŋ yəəŋ ye mmà yɔɔ lə bə bimbumə bi bəne bə kimbemi bə Galeshia lə yee bə́ fə̂. 2 Bwɔɔ nnu ə duŋ butuu bu fwii ə kibumwe kinhliŋ go, mbɛɛ mwi mwi hlaa fwoo fieŋ fidi bwɛɛ kili fi. Bwɔɔ nnu mbɛɛ yo fwoo, yee i fwôo yəəŋ ye Chu hə nəə lə wu. Nəni ə bichukənə nakə duŋ nə bwɔɔ nnu nlə mbwo kə. 3 Bwɔɔ nnu nlə nfiimə, nlə mbieŋ kiŋwaati buhuŋ bə nnə lieeŋ, ə bəne bbəŋ bə́ shaala bie hlə jə gəŋ bə ki ə Jelushalɛŋ. 4 Ə duŋ lə fi fie kinwaakə lə ŋgəŋ, ə bee bə́ hlə gəŋ.

Bieŋ bbɨŋ Pwɔɔ màa i hlē lə mə fə

5 Nlə nhlaa kah ə Meshedonia, ə nhlə n'yee mbwō ə bəŋ go, yu ŋkiɛɛ lə ŋkah je mə. 6 Ə duŋ lə kkə lə yee kkə dūŋh, ə kkə duhŋ hləŋ hləŋ gəŋ bwii bwɔɔ nnu fwee kintaabə lə yee ki kāh, fo bə lə chɨnə mi ə gbɛŋ wuŋŋ mə, ə nhlə n'yee ŋgə̄ŋ dɔhɔ kkɨŋ n'yu ŋgə̄ŋ kie. 7 Ŋkə ŋkiɛɛ lə lə mbwo fidiɛɛ lə bə ŋəŋ ə mi go ye ŋkāh bu kahnə kə. Nhle lə, bwɔɔ nnu nlə mbwo ə kkə duŋ bee bəŋ gbaaŋ, ə duŋ lə Baba bema. 8 Kwaalə n'yu ŋkāani bənduŋ fəŋ Ɛfɛshu gəŋ bwii butuu bu Chɔnɔ ki Pɛntikɔ. 9 Je kiŋkuntaŋ wɛɛma bə mi yaŋ bənfə nimi linwaa li Chu, bələh bəne bədi ə bə́ mə bie bə́ bāŋ nimi le.

10 Ə Timɔti lə bwo, bə ŋəŋ lə bə lə fə yee i wô njənjə ə bəŋ mə, yu i nɨ̄ŋ nimi li Chu yəəŋ dəŋ ye mi lə. 11 Mbɛɛ kə jəə wu kwe kə. Bə chɨnə wu, i jaa ə kindunshiiŋ mə bwo chili mi, yu bee bəŋgwoŋ kkə bie kkə kē wu. 12 Ffɨŋ fi duŋ ki ŋgwoŋ ya Apolo, duŋ lə mmaa nduŋ ŋkɔ̄nɔ wu gbaaŋ lə i bwo bə bəŋgwoŋ biaa bədi bie la bəŋ kpuuni, kwaalə mə nakə leki bəmbwo fidiɛɛ kə. Bwɔɔ nnu mə lə bənə je, ə i hlə bwo.

Cheenə bə ki həŋgbɔŋ ki bin'yɔɔnə

13 Bwɔɔ nnu bə duŋ, yee bə jə̂ bwɔɔ. Yee bə lêmi kɨɨŋ bə tɔŋ llɨŋ bə yiila le, bə dùŋ bəne bbəŋ bə́ kwàa tɔ́ŋ. Bə lèmi ntakə. 14 Fieŋ finhliŋ ffɨŋ bə fə̀, yee bə fə̂ fi ə kinleki mə.

15 Bə kələ lə Tefana bə kichəŋ kiih lə bəne bə fwii fwii ə bidi bi Akeya mə, bbəŋ bə́ mà hlaa yii tɔŋ ə Baba mə. Bə́ mà nəə go ŋəbə lə bə́ lə yee bə́ chɨ̄nə bəne bə Chu. Bəŋgwoŋ n'yu ŋkwī bəŋ kwáŋ, 16 lə yee bə wô bə bəne dəŋ ye bəŋ lə, yee bə baa bə wō dəŋ bə bəne bbəŋ bə́ nɨ̀ŋ bə́ bwòŋ ə fieŋ bəŋ fimwi.

17 N'yu ŋ'wō njənjə ye wu Shitefana bə Foltunatu maa Akayiku bwo lə bwo ŋəŋ mi. Ŋŋəŋna bə́, fi hlə yee fi dūŋ dəŋ ə waalə mi ŋŋəŋna ə bəŋ go. 18 Bə́ diɛɛla tɔŋ lɨŋŋ dəŋ yəəŋ ye bə́ mà diɛɛlə ŋieeŋ. Bəne ye bəhŋ lə duŋ bbəŋ bə́ dùŋ lə yee bə kōhi bə́. 19 Bimbumə bi bəne bə kimbemi bə fəŋ Ɛshia bie bə́ chēe bəŋ. Akwila bə Plishilia maa kimbumə ki bəne bə kimbemi bbɨŋ bi shìi ə bə́ chəŋ bie bə́ chēe bəŋ ə yii li Baba bəŋ kinwaakə. 20 Bəŋgwoŋ biaa bə kimbemi bənhliŋ faŋna dəŋ cheenə kibə. Mbɛɛ mənhliŋ chee yohi yohinə ki bəne bə Chu. 21 Kɨhŋ cheenə lə mi Pwɔɔ nnu mbieŋ bə kwaŋ wuŋŋ. 22 Kida yee ki dûŋ bə mbɛɛ nnu i dùŋ yo kə leki Baba kə. Butee, Baba fiimə kwaa wə bwo. 23 Baba Jisho nyii bəŋ tɔŋ liih linwaa bwɔɔ mənhliŋ. 24 Kinleki kɨŋŋ kie bə bəŋ bənhliŋ ye kkə duŋ lə bə Jisho Kleto. [Yee fi Dûŋ lə.]^ª