1 Kɔlɛŋ 10

Yee kkə jə̂ bwɔɔ lə fieŋ ffɨŋ fi mà kah bə bəne Bəishlael kə chili be kə

Bəŋgwoŋ, ŋkiɛɛ lə bə hle kinwaa fieŋ ffɨŋ fi mà kah fie bə bəne bə fwii bwɔɔ nnu bə́ màa bə́ jāa ə nji. Bə́ bənhliŋ màa bə́ jāa bə bə̄lə joonə kkɨŋ Chu mà faŋ lə yee ki fwōŋ bə́. Bə́ bənhliŋ hlə gəŋ le nɔ ə shishɔ yi ŋɨmənə bəŋ.^ª 2 Ye fi mà kah'lə nəni, fi hlə duŋ ə waalə ə joonə kie mə bə ə nɔ yo mə duŋ bə́ kəna n'yiinjɔ bəne bə Mushe. 3 Bə́ bənhliŋ màa bə́ dī biləə ə duŋ bbɨŋ bi màa bi bwō ə Chu kwáŋ, 4 ŋwi dəŋ ŋgwiŋ ə nə Chu bə́, ə duŋ ŋgwiŋ mməŋ mə màa mə fū ə libwaa mə. Libwaa le duŋ Kleto nnu i màa i jāa bə bə́. 5 Maa ye bə́ màa bə́ ŋə̄ŋ lə ə bieŋ bɨhŋ go nəni, kiŋaŋ kibə yee bə́ fə̄ dəŋ bieŋ bbɨŋ tɔŋ li Chu lə yee li bēe. I hlə yee i jīi bə mbini bie bəne, biŋwuuni bibə bà mə nji.

6 Bieŋ bbɨŋ bi mà kah bɨhŋ bə bə́ lə keehnə bə be lə kkə kə kənə ŋgɨŋ bə bieŋ biwaha ye bə́ lə kə. 7 Kkə kə yee kkə chêe Chu bə bəcheh bə nya ye bədi ə bə mə chee lə kə. Fi duŋ ki bieŋ bə bə́ lə,

“Bəne màa bə́ shī, bə́ dì, bə́ ŋwì,

bə́ bɨ̀ŋ ŋkɔŋ bəcheh.”

8 Kkə kə yee kkə wâali ye bədi ə bə́ mə màa bə wāali lə, Chu mà fəə bə́ kpe bənchuku mbwɛɛnfie ə nchɔ bətɔh (23,000) ə butuu bumwi go. 9 Kkə kə yee kkə mɔ̂ŋ Baba ye bədi ə bə mə màa bə́ mɔ̄ŋ lə, yɔ bwo tɨŋ bəne bie bə kpe. 10 Kkə kə yee kkə ŋwûunə ye bədi ə bə mə màa bə́ ŋwūunə lə, Nchinda Chu bwo ləhə laa bə́ kə.

11 Bieŋ bbɨŋ bi màa bi chīli bie bə́ binhliŋ màa bəŋkɨnə bə bəne. Bə mà bieŋ nəni lə be bəhŋ jə bwɔɔ laanə ə bi go, kkə dùŋ ŋkwo ya bəne bbəŋ bə dùŋ ə bwɔɔ nnu mə kah yo mə. 12 Nəni, mbɛɛ nnu i hlè yo lə i lema ntakə gbaaŋ, i ŋəŋ lə i kə gbee kə. 13 Yee bə kə̂lə lə bimɔŋnə binhliŋ bbɨŋ bi bwò ə bəŋ go ə bi dəŋ bbɨŋ bi bwò ə bəne bədi go. Chu duŋ Chu kichɛɛŋ, ə duŋ ə i tukwaŋ lə bimɔŋnə bwo ə bəŋ go bbɨŋ bi kàh ye muŋgeni mweeŋ duŋ lə kə. Ə bimɔŋnə lə bwo ə bəŋ go, ə i nyii dəŋ bəŋ je nni duŋ ə bə kah ə yi mə, kah bimɔŋnə bie.

14 Nəni bədɔɔ bəŋŋ bbəŋ bə́ duŋ tɔŋ lɨŋŋ, n'yu ŋkēeh bəŋ lə yee bə lɔ̂ bieŋ bi bəcheh bə nya. 15 N'yɔ̄ɔ nəni bə bəŋ ye bəne bbəŋ bə́ kə̀nə bufe. Bə ŋəŋ bə go ŋieeŋ lə fieŋ ffɨŋ n'yɔ̄ɔ fɨhŋ lə chɛɛŋ. 16 Kkə bwò kkə jə̀ kwoo ki kinhləmə, kkə nə̀ kimbaafɛɛ bə Chu ŋwi mbuhuŋ, duŋ lə kkə buma ə ŋgɔŋ mə Kleto mə lə? Bwɔɔ nnu kkə jə̀ kibele kkə gaa di mbuhuŋ, duŋ dəŋ lə kkə buha gbo bə wi Jisho Kleto lə? 17 Ye kkə dì lə kibele kɨhŋ bəne kiŋaaŋkə nəni, chee ye duŋ kwaa mi, fi nyìi lə kkə dùŋ mbili mwi, yu kkə diee kwaa ə duŋ chee mi. 18 Bə jə kinyii ə bəne Bəishlael go. Mbɛɛ mənhliŋ nnu i dì fieŋ ffɨŋ bə tofa ə taŋ lɨhŋ bəŋ, bumə bə Chu ə ntofi yo mə. 19 Fieŋ ffɨŋ n'yɔ̄ɔ fɨhŋ duŋ lə laha lə? Fidiɛɛ duŋ lə bieŋ bbɨŋ bə́ tofi bəcheh mu kə̀nə nimi ləkə lə bəcheh bie kə̀nə nimi lidi lə? 20 Ə lə kə. Fieŋ ffɨŋ n'yɔ̄ɔ duŋ lə bəntofi bbəŋ bəne bbəŋ bə́ dùŋ kə kələ dəŋ Chu fə̀, bə́ fə̀ ə duŋ bə bənchinda bə fiŋkwini. Bə́ fə̀ lə ə duŋ bə Chu kə. N'yu n'yɔ̄ɔ lə ŋkə ŋkiɛɛlə lə yee bə bûmə bə bənchinda bə fiŋkwini kə. 21 Duŋ ə yee wə ŋwī ə kwooh ki kimbumə ki Baba mə, baa ŋwi dəŋ ə kwooh ki bəchinda bə fiŋkwini mə kə. Ə duŋ dəŋ ə yee wə dī biləə bi Baba wə baa wə dì dəŋ bə bənchinda bə fiŋkwini kə. 22 Kkə kə yee kkə fə̂ fieŋ ffɨŋ duŋ ə yee tɔŋ lō Baba. Kkə hlè lə kkə kənə muŋga kah wu lə?

Yee mbɛɛ fə̂ fieŋ ə duŋ ffɨŋ duŋ ə fi chɨnə dəŋ maani

23 Be bədi yɔ̀ɔ lə fieŋ fidi baŋ nə be bənfə fieŋ finhliŋ ffɨŋ kkə lèki kə. Kwaalə, yee bə kə̂lə lə ə fieŋ finhliŋ ffɨŋ duŋ ə fi chɨnə mbɛɛ kə. Bəne bədi yɔ̀ɔ lə fieŋ fidi baŋ nə bə́ bənfə fieŋ finhliŋ ffɨŋ bə́ lèki kə. Ə fieŋ finhliŋ ffɨŋ duŋ ə fi fə ə mbɛɛ ko kə. 24 Mbɛɛ kə yee i fə̂ fieŋ i hlè kwaa ə duŋ kwoo kiih kə. Yee mbɛɛ hlê dəŋ ki maani. 25 Bwɔɔ nnu wə gəŋ ə shibəŋ bəŋgəŋ taŋ nyaŋ, duŋ ə wə di nyaŋ ye kiɛkiɛ kə bii lə dɔhɔ kkɨŋ i bwò kie fo wə lə nakə fəə lə yee tɔŋ lo hlāah wə kə. 26 N'yɔ̄ɔ nəni, yu fi duŋ ki bieŋ ə Kiŋwaati ki Chu mə lə,

“Ə Baba nnu i kə̀nə mbiŋ nu maa bieŋ binhliŋ bbɨŋ bi dùŋ mə.”

27 Ə mbɛɛ nnu i dùŋ kə duŋ nə mbɛɛ kimbemi lə dii bəŋ lə bə bwo di biləə, ə bə leki bəŋgəŋ yee bə dī fieŋ finhliŋ ffɨŋ bə nə bə bəŋ kə bii lə kə. Biwɛɛ kə yee bi hlâah bəŋ ə fimbini fie fieŋ go kə. 28 Kwaalə, ə mbɛɛ ju lə yɔɔ bə bəŋ lə bə́ hə tofa biləə bie bə bəcheh, bə kə diee kə yu mbɛɛ nnu i yɔ̄ɔ yo bə wə kə yee i ŋə̄ŋ lə bə bie bə fə̄ fieŋ fiwaha, tɔŋ kə yee li hlâah mbɛɛ kə. 29 N'yɔ̄ɔ tɔŋ lɨhŋ nəni ə duŋ bə mbɛɛ nnu mə hə yɔɔ yo wə. N'yɔ̄ɔ lə ə duŋ tɔŋ lieeŋ kə. Kwaalə, Ə mbɛɛ ju yɔɔ bə mi lə nduŋ ə nnakə fəə fieŋ yu ə fieŋ fiwaha ə ntu ba kwáŋ ə fi go yulaha lə? 30 Ə duŋ lə ndì fieŋ nnə̀ kimbaafɛɛ ki mu bə Chu, ə mbɛɛ baa yee i hlāah mbɛɛ yulaha lə? 31 N'yu ŋkpēe lə fieŋ finhliŋ ffɨŋ mbɛɛ fə̀, ləkə ffɨŋ i ŋwì, ləkə ffɨŋ i dì, yee i fə̂ bə je nni Chu lə kənə kiŋkohi ə fi go. 32 Bə kə yee bə fə̂ fieŋ ffɨŋ duŋ ə fi bihi tɔŋ li mbɛɛ kə, ləkə bə Bəjuu ləkə bəne bbəŋ bə́ dùŋ kə duŋ nə Bəjuu, ləkə kimbumə ki bəne bə kimbemi bə Chu. 33 N'yu njū ŋkwo ŋgwəŋ bənfə fieŋ finhliŋ ə duŋ ffɨŋ mbɛɛ mənhliŋ lə yee i wō njənjə bə fi. Nhlè lə ə duŋ gbo wuŋŋ kwaa kə. Nhlè ki bəne bənhliŋ lə nfə bə́ fukwoo.