1 Kɔlɛŋ 9

Muŋgeni mmuŋ mbɛɛ hlɨŋ Jisho kə̀nə

Fieŋ fidi hləŋ ffɨŋ duŋ ə fi baŋ mi bənfə fieŋ ffɨŋ nlèki kə. Ndùŋ mbɛɛ faŋnə Jisho. Mmà ŋŋəŋna ə Jisho Baba ya go bə díi. Bə duŋ bəne bə Baba yu nimi lɨŋŋ llɨŋ mmà nnɨŋ bə wu. 2 Ə bəne bədi lə noo lə ŋkə nduŋ nə mbɛɛ faŋnə Jisho, kəə duŋ ə bəŋ dəŋ yee bə nōo kə. Bə duŋ nche nnu bəne ŋə̀ŋ chɛɛŋ lə ndùŋ mbɛɛ faŋnə Jisho wi.

3 N'yu ntə̄ŋ kwoo kɨŋŋ n'yɔ̄ɔ bə bəne bbəŋ bə kìɛɛ bie lə bə hliki kinuu kɨŋŋ. 4 Kkə kə duŋ nə lə yee kkə dī kkə ŋwì yu nimi lɨhŋ kə lə? 5 Ə duŋ lə kkə bie kə lēki, ə kkə nakə yee kkə jāa bə biaa bəkwɛɛ ye bəne bə faŋnə bədi bie, dəŋ yəəŋ maa bə dɨŋ Baba ya Jisho bə Shefa lə? 6 Fi duŋ lə ə ba kwaa be bee Banaba bbəŋ kkə kənə bənɨŋ bə kwáŋ ŋiaa ə kkə hlə di lə? 7 Ə mbɛɛ kicha nnu i nɨ̀ŋ, ə duŋ dəŋ wu nnu i fwòŋ gbo wiih. Mbɛɛ nɨ̀ŋ wɛɛh, i dì biləə bbɨŋ bi fù bie ə wɛɛh kie mə. Mbɛɛ chìi dəŋ shɔ́ŋ, yee i kīaŋ biŋ ŋie i ŋwì.

8 Bieŋ bbɨŋ n'yɔ̀ɔ bɨhŋ kə duŋ nə kwaa muŋgeni mu mbɛɛ ŋkee kə. Bi dùŋ dəŋ ə bəŋkɨnə bə Chu mə. 9 Mushe mà bieŋna ə Kiŋwaati ki Bəŋkɨnə mə lə,

“Wə kə kwaa lə biwu bi nyaŋ bwɔɔ nnu i dìɛŋ gɨŋ ŋə bəjaa kə,

wə kə kwaa lə biwu bi nyaŋ ye kə.”

Bə́ hle lə Chu mà yɔɔ nəni ə duŋ ki nyaŋ ye lə? 10 I mà yɔɔ ə duŋ yu be. Bə́ mà bieŋ bə be, yulahalə mbɛɛ nnu i nɨ̀ŋ wɛɛh ləkə nnu i gbà, i dùŋ bəŋkələ lə i yá yi bənə fieŋ mə sho. 11 Ə kkə mà nɨŋ ə bəŋ mə, kəə bə mà bəna mbɨŋ nnu i dùŋ bieŋ bi fiana Chu, ə yee fi dūŋ ŋkokə gbaaŋ bə be bəŋkənə bieŋ yaŋ mbiŋ nte yu bəŋ lə? 12 Ə duŋ lə bəne bədi bie bə muŋgeni bən'yɔɔ lə yee bə nə̂ bieŋ bə bə́, ə kkə nakə kənə kah lə lə?

Pwɔɔ mà kə jəə muŋgeni mwii mu mbɛɛ faŋnə Jisho lə yee i jə̄ bieŋ bi bəne kə

Kwaalə, kkə jə̀ lə mumbini muhŋ muŋgeni kə. Kkə ŋkwaa kwaa tɔ́ŋ bə fieŋ finhliŋ, fo kkə lə nakə baŋnə hlɨŋ nwaa ki Kleto ni lə yee i gə̄ŋ fwi fwi. 13 Duŋ ə bə ŋəŋ lə bəne bbəŋ bə́ nɨ̀ŋ ə chəŋ ntofi mə bənə biləə bibə mu, bəne bbəŋ bə́ nɨ̀ŋ ə táŋ ŋə ntofi bəŋ bənə dəŋ bieŋ bibə ə ŋə bəŋ. 14 Ə duŋ dəŋ yəəŋ ye Baba mà yɔɔ lə bəne bbəŋ bə́ dòntə hlɨŋ nwaa kənə bəndi ə nimi li hlɨŋ nwaa go.

15 Maa ye fi duŋ lə nəni, ŋkə njəə mumbini muhŋ muŋgeni kə, ŋkə mbieŋ nə nəni lə yee bə fə̄ fidi bə mi dəŋ kə. Ye n'yu ŋ'wēlə nəni lə n'yu ndōntə die Chu ni nya, ə mbɛɛ lə bwo yɔɔ lə ŋkə wee nəni yulahalə ŋgbee bənjə bieŋ, ə nwaa lə ŋkpe bu kpenə. 16 Njə lə gbo lə n'yu dōntə hlɨŋ nwaa ki Jisho Kleto kə. Ə Chu nnu i yɔ̀ɔ lə n'yee ndōntə ba. Ə nlə nɨhŋ bəndontə, ə Chu lɛɛ ŋgə ə mi fi. 17 Ə duŋ lə nnɨŋ nimi lɨhŋ bə kinhle kɨŋŋ, ə n'yee ŋkīɛɛ bikoonə. Kwaalə, ye fi duŋ lə lə ə mi nnu mmà mbwɛɛ kə. Ə mà bwɛɛ Chu nə ə mi kwáŋ. 18 Nəni bikoonə bɨŋŋ lə laha lə? Bikoonə bɨŋŋ duŋ kwaa lə n'yee ndōntə hlɨŋ nwaa nya, ŋkə nnəə ŋgɨŋ lə yee bə́ kōŋ mi ye mbɛɛ faŋnə Jisho nwaa Chu. 19 Yee bə kə̂lə lə nduŋ nə ə mbɛɛ ju dɨŋ kə. Kwaalə, nchuula gbo wuŋŋ lə n'yee ndūŋ nfwa bəne bənhliŋ, fo nlə ŋkpa jə bə́ kiŋaaŋkə, yee bə́ dūŋ bəne bə Kleto. 20 Bwɔɔ nnu ndùŋ bə Bəjuu, nfə̀ ye bə́ fə̀ lə, fo nlə ŋkpa jə bə́, bə́ chu bəne bə Kleto. Maa ye ndùŋ lə kə duŋ nə ə bəŋkɨnə kwe. Bwɔɔ nnu mbə̀lə bəne bbəŋ bə́ bə̀lə bəŋkɨnə bə Mushe, nfə̀ dəŋ ye bə́ lə. Nfə̀ nəni fo nlə ŋkpa jə bəne ə bə́ mə. 21 Bwɔɔ nnu ndùŋ bə bəne bbəŋ bə́ dùŋ kə duŋ nə bəŋkɨnə kwe, nfə̀ kwaa dəŋ ye mbɛɛ nnu i dùŋ kə duŋ nə ə bəŋkɨnə kwe. Nfə̀ nəni fo nlə ŋkpa jə dəŋ bəne bie, ə yee bə́ dūŋ bə Kleto. Fi kə duŋ nə lə nduŋ nə ŋkɨnə Chu kwe kə. Ndùŋ ə ŋkɨnə Kleto kwe. 22 Bwɔɔ nnu ndùŋ bə bəne bbəŋ bə́ dùŋ bɛɛɛ ə kimbemi mə, nchu dəŋ ye bə́ fo nlə ŋkpa jə dəŋ bə́. Nchoo dəŋ fieŋ finhliŋ bə bəne bənhliŋ, fo nlə nfə maa ə duŋ filaha ffɨŋ duŋ ə nfə, ə bədi ə bə́ mə fukwoo. 23 Nfə̀ bieŋ bɨhŋ binhliŋ nəni yu hlɨŋ nwaa ni ki Kleto, fo nlə ŋkənə dəŋ kinhləmə kkɨŋ hlɨŋ ye nə̀ bəne.

24 Bə kə kələ lə bwɔɔ nnu bə lə̀lə lili, bəne kiŋaaŋkə lə̄lə ə kwaa mbɛɛ mwi nnu i kàh lə? Nəni, yee bə lə̂lə dəŋ ə je nni bə lə kah dəŋ. 25 Bəne bbəŋ bə́ lə̀lə lili, bwò bə́ bwɛ̀ɛ go ŋəbə, bə́ kə fəə bieŋ woo woo, fo bə lə lələ kinwaakə. Bə́ bwɛɛ nəni fo bə́ lə kah bəne ə fikɔ ffɨŋ fi yá kah mə. Kwaalə, fikɔ fiaa duŋ ffɨŋ fi dùŋ kə kaa. 26 Nlə̀lə lɨŋŋ lili ŋgə̀ŋ ntiiŋ ə dɔhɔ kkɨŋ bə́ lə kwo mi. Ndùŋ nə ye mbɛɛ muŋkɔɔ nnu i lɛ̀ɛ muŋkɔɔ woo woo kə. 27 Ŋkwuŋ gbo wuŋŋ lə yee wi bə̄lə ə duŋ fieŋ fintiiŋ, fo bwɔɔ nnu ndòntə die Chu bə bəne bədi, ə Chu nakə yɔɔlə lə ŋkə wunə kə.