Hlɨŋ ki biləə bbɨŋ bə́ fə̀ bəntofi bə bəcheh mu
8
Nlə n'yɔɔ fidiɛɛ ki biləə bbɨŋ bəne tòfi bəcheh mu. Ə duŋ chɛɛŋ ye bə́ yɔɔlə lə, be bənhliŋ kə̀nə bufe. Bu mbini buhŋ bufe duŋ bbuŋ bu fə̀ mbɛɛ wè. Kwaalə, kinleki wɛ̀ɛ ə ŋ'wɛɛ mə. 2 Ə mbɛɛ ja yee i hlē lə i kə̀lə bieŋ, yee i kə̂lə lə i yu kaani bəŋkələ ye i dùŋ lə bəŋkələ. 3 Kwaalə, ə mbɛɛ yee i lēki Chu, kəə ə wu nnu Chu lə kələ wu.4 Nəni, ki ndi biləə bbɨŋ bə́ tòfi bəcheh mu, kkə kə̀lə lə bəcheh bəhŋ lə fieŋ kə. Chu duŋ kwaa mwi, ju hləŋ. 5 Bəne bədi jə̀ lə bəcheh bədi bie buh ləkə yaŋ kwe. Ə duŋ chɛɛŋ lə bəne jə̀ lə bəcheh duŋ kiŋaaŋkə, bəche kwoo dùŋ dəŋ kiŋaaŋkə. 6 Ye bə jə̀ lə nəni, bə be Chu duŋ kwaa mwi. Ə wu nnu i dùŋ Tah ya nnu i mà fə bieŋ binhliŋ. Kkə duŋ həmə fo kkə lə nə kiŋkohi bə wu. Che Kwoo duŋ kwaa dəŋ mwi ə duŋ Jisho Kleto. Ə wu nnu bə́ mà fə bieŋ binhliŋ bi kah ə kwáŋ ŋiih mə, kkə duŋ dəŋ həmə yu wu.
7 Fɨhŋ lə fieŋ ffɨŋ duŋ ə mbɛɛ mənhliŋ ə be mə kələ fi kə. Bəne bədi bbəŋ bə́ maa bə tōfi bəcheh bwɔɔ nnu bə dì biləə bi bəcheh bɨhŋ fidiɛɛ, bə́ hlè kwaa lə biləə bɨhŋ lə bi bəcheh. Tɔ́ŋ ŋəbə ŋə bɛɛɛ hlə yee ŋə hlāa bə́ lə biləə bie biha bə́. 8 Kwaalə duŋ ə biləə fə ə yee kkə dūŋ chili ə Chu fwi kə. Ə kkə nakə diee ə fimbini fie nakə bihi be bə Chu kə. Ə kkə di, ə fimbini fie fə dəŋ be fieŋ kə. 9 Fieŋ ffɨŋ fi dùŋ, duŋ kwaa lə, bəŋ bbəŋ bə kə̀lə bie bieŋ bɨhŋ, yee bə jə̂ bwɔɔ, mbɛɛ ya kə ja jə muŋgeni mmuŋ i kə̀nə bənfə fieŋ ffɨŋ i lèki mu, fə ə duŋ fieŋ ffɨŋ maani lə gbe ə ŋgbe mə kə. 10 Ə mbini yo mbɛɛ nnu tɔŋ liih duŋ yo bɛɛɛ ŋə̀ŋ wə nnu wə kə̀lə yo bieŋ, dì ə dɔhɔ kkɨŋ bə́ tòfi bəcheh mə, ə i nakə yee i lēki dəŋ bəndi mu lə? 11 Ə mə fə nəni, ə yee fi dūŋ lə, wə nnu wə kə̀lə yo bieŋ, biha mwaa nnu i dùŋ yo bɛɛɛ, ə duŋ wu nnu Kleto mà kpe yu wu. 12 Ə fieŋ ffɨŋ wə fə fɨhŋ duŋ yiwaha yyɨŋ wə fəə, yi bihi mwaa nnu i dùŋ yo bɛɛɛ, kəə wə fəə yiwaha ye ə duŋ bə Kleto. 13 Nəni, ə fi duŋ lə fieŋ ffɨŋ ndì fie lə fə lə ŋgwoŋ fə yiwaha, ə mbaa tuu ə fi go kə, i yá kə gbe.