1 Kɔlɛŋ 7

Diɛɛnə ki bə kpɛ bə nyo

Fidiɛɛ nlə nchuu bəŋ ki bieŋ bbɨŋ bə mà bieŋ bə mi. Fi nwaa lə mbɛɛ kə tuulə ə kpɛ go kə.^ª 2 Kwaalə, kidodo ki kpɛ yii fə̀ mbɛɛ mənhliŋ, bədi hlə yee bə́ fə̄ kiwaali, nəni fi nwaa lə nyo kənə wi kpɛ, kpɛ kənə wi nyo. 3 Nyo kə nɨŋ nə kpɛ ə ta kə. Kpɛ kə nɨŋ nə nyo ə ta kə. 4 Kpɛ kə̀nə lə muŋgeni ə gbo wiih bəŋ kə, ə kə̀nə ə duŋ nyimi muŋgeni mwe. Ə dəŋ yəəŋ lə nyo kə̀nə lə muŋgeni ə gbo wiih bəŋ kə, ə kə̀nə ə duŋ kpɛɛ muŋgeni mwe. 5 Mbɛɛ kə bwuŋ nə kinhlaŋ bə ju kə, kahiŋ lə bəŋ bənhliŋ hə nachɛ bwo bemi. Duŋ ə bə fə nəni bwɔɔ bəŋ chɛɛ, fo bə lə hlə nə go ŋieeŋ bənjə bwɔɔ chee Chu kwaa. Kwaalə bwɔɔ nnu bə fəə nəni, bə hlə chu yee bə dūŋ fieŋ fimwi, fo Hlaata lə nakə mɔŋ nə bəŋ kə, yulahalə bə kə̀lə lə bənfwoŋ go ŋieeŋ kə. 6 N'yɔ̄ɔ fɨhŋ nəni nnə̀ bəŋ ə duŋ keehnə, nnə̀ lə bəŋ ə duŋ ŋkɨnə kə. 7 Ə hə duŋ yu mi, ə n'yee ŋkīɛɛ lə mbɛɛ mənhliŋ yee i dūŋ kpɛ hləŋ ye ndùŋ lə. Kwaalə, nlə nfə ləhəŋ ye mbɛɛ ju kənə liih nnə li Chu chili. Mbɛɛ mənhliŋ duŋ chili bə ju.

8 Fidiɛɛ, n'yu n'yɔ̄ɔ bə bəne bbəŋ bə́ dùŋ bie bəkpɛh maa bəkwɛɛ bə bəŋkwu, n'yɔ̄ɔ lə fi nwaa lə bə́ ba bəkpɛh ye nduŋ lə. 9 Kwaalə, ə duŋ lə duŋ ə bə nakə kwaa lə tɔŋ, mbɛɛ kiɛɛ kpɛ ləkə nyo bə bəə wu baanə yee bə́ dūŋ, yu fi nwaa bə mbɛɛ bənjə kpɛ ləkə nyo, kahiŋ bəŋkpe bə hlɔɔ kinɔŋ.

10 Bə bəne bbəŋ bə́ mà baana, n'yee n'yɔ̄ɔ ba bə bəŋ lə kpɛ kə joo bəŋga bə nyimi kə. Ŋkɨnə nu kə fwoo ə duŋ ə mi kwáŋ kə. I fu ə duŋ ə Baba kwáŋ. 11 Kwaalə, ə mə lə gah, kəə i kənə bəmba kpɛh. Ə fi nakə duŋ nə nəni, i chu ə nyimi chəŋ, bəə wu baa lɛhiŋ bieŋ yee bə bāanə. Fi duŋ dəŋ lə nyo kə kohiŋ kpɛɛ kə.

12 Bə bədi bie, n'yu n'yɔ̄ɔ bə bə́ lə, ə mbɛɛ lə duŋ mbɛɛ kimbemi i kə̀nə mah kwili wi, ə mah kwili wi yo nakə duŋ nə kpɛ kimbemi, ə duŋ lə mah kwili yo yu lēki lə yee bə́ dūŋ, nyimi yo kə kohiŋ wu kə. Fɨhŋ nini yɔɔ ə duŋ mi. Ə kə duŋ nə n'yɔɔ Baba kə. 13 Ə kpɛ kənə nyimi, ə nyimi yo nakə duŋ nə mbɛɛ kimbemi, ə mə leki lə yee bə́ dūŋ bəə wu, kpɛ yo kə fwoo dəŋ kə. 14 N'yɔ̄ɔ nəni, ə nyimi yo nakə duŋ nə mbɛɛ kimbemi, i kə̀nə kpɛɛ ə duŋ kpɛ kimbemi, kəə Chu lə jə dəŋ wu ye mbɛɛ wi lə yu kpɛɛ kimbemi yo. Kpɛ nnu i kə duŋ nə dəŋ mbɛɛ kimbemi, i kə̀nə nyimi ə duŋ mbɛɛ kimbemi, kəə duŋ ə Chu jə dəŋ wu ye mbɛɛ wi lə yu nyimi yo. Ə fi nakə duŋ nə nəni, ə bwɔni bəbə dəŋ yá nakə yee bə́ dūŋ wɛɛŋ kə. Kwaalə, ye fi duŋ, duŋ lə bə́ bie wɛɛŋ. 15 Ə mbɛɛ nnu i kə duŋ nə mbɛɛ kimbemi kə lə kiɛɛ lə i gah, bə tukwaŋ mu. Dɨŋ fimbini fie fieŋ nhlaa ju hləŋ kə, ŋgwoŋ nyo ləkə kpɛ nnu i dùŋ mbɛɛ kimbemi duŋ nə kikwaa kə. Chu mà dii be lə yee kkə dûŋ ə kindunshiiŋ mə. 16 Wə kpɛ, wə kələ ləhəŋ lə wə yá bwo fə ə Chu fwoo kwoo ki nua lə? Wə nyo, wə kələ dəŋ ləhəŋ lə wə yá bwo fə ə Chu fwoo kwoo ki pwaa lə?

Ba kwaa ye wə mà duŋ lə bwɔɔ nnu Chu dii wə

17 Fieŋ ffɨŋ fi dùŋ, duŋ kwaa lə mbɛɛ mənhliŋ yee i dūŋ kinduŋh kkɨŋ Baba mà nə wu. Yee i dûŋ ye Chu mà diilə wu lə yee i dûŋ. Fɨhŋ lə fieŋ ffɨŋ n'yɔ̀ɔ bə bimbumə bi bəne bə kimbemi ə bidɔhɔ mə binhliŋ lə yee bə́ fə̄lə. 18 Mbɛɛ ju yo ə bəŋ mə nnu bə́ mà dii wu ə duŋ bə hə nyieŋna wu jo lə? I kə kiɛɛ lə lə yee i dūŋ ye mbɛɛ nnu bə́ kaani kə nyieŋ nə wu jo kə. Ə mbɛɛ lə duŋ həmə nnu bə́ mà dii wu, i kaani kintuulə, i kə yee i kîɛɛ lə bə́ nyieŋ wu jo fidiɛɛ kə, 19 yulahalə ə mbɛɛ lə duŋ nnu bə́ nyieŋna wu jo ləkə i kaani kintuulə, kəə fimbini fie dəŋ kənə lə fieŋ bənfə kə. Fieŋ fishaŋ duŋ lə mbɛɛ yee i chî bəŋkɨnə bə Chu. 20 Mbɛɛ mənhliŋ ba kwaa yee i dûŋ ye Chu mà dii lə wu i dùŋ. 21 Ə bə́ dii wə, wə duŋ nfwa, wə kə bii lə kə. Kwaalə, ə duŋ lə wə bəna je bənfu ə munfwa mə, wə fu wə fo. 22 Yee bə kə̂lə lə mbɛɛ nnu i dùŋ nfwa bwɔɔ nnu Baba mà dii wu, i fwoo ba ə munfwa mə ye i bumə lə bə Jisho Kleto. Ə dəŋ yəəŋ ye mbɛɛ nnu bə mà dii wu i dùŋ kə duŋ nə nfwa, i yo fidiɛɛ nfwa Kleto. 23 Bə́ mà taŋ bəŋ chuŋ ntakə. Bə kə yee bə dûŋ bənfwa ə duŋ bə bəne kə. 24 Nəni, bəŋgwoŋ, mbɛɛ ba kwaa yee i dûŋ bə Chu ə je yi mə, nni i mà dii wu i duŋ ə yi mə.

Keehnə ki bəkpɛh maa bəkwɛɛ bə bəŋkwu

25 Fidiɛɛ, ki bəkwɛɛ ləkə bənəə bbəŋ bə́ kaani bəkpɛh, ə kə duŋ nə Baba nnu i yɔ̄ɔ fieŋ fɨhŋ bə mi lə n'yɔ̄ɔ kə. Kwaalə, nduŋ nnə kɨŋŋ kinhle ye mbɛɛ nnu Baba kwò hlɨŋ bə wu lə mbɛɛ duŋ ə i bemi fieŋ ffɨŋ i yɔ̀ɔ. 26 Nhle ki ŋgə nnu i dùŋ nu fidiɛɛ, fi nwaa lə mbɛɛ hə ba yee i dūŋ ye i duŋ lə. 27 Ə mbɛɛ mà jə kpɛ, i kə baa lə kiɛɛ bəŋkohiŋ wu kə. Mbɛɛ nnu i dùŋ kpɛ hləŋ, i kə baa lə kiɛɛ kpɛ kə. 28 Kwaalə, ə nyo lə ŋəŋ lə ə mə jə kpɛ ə bəə wu yee bə dūŋ, kəə i kə fəə yiwaha kə. Hlɔŋ ŋiaŋ kpɛ lə bah nyo, kəə i kə fəə dəŋ yiwaha kə. Kwaalə, yee bə kə̂lə lə bəne bbəŋ bə́ baanə, duŋ ə yee bə́ kə̂nə bəŋgə ə mbiŋ nu nte, ə duŋ bə mi, ŋkiɛɛ lə n'yee nfwōŋ bəŋ bə fɨhŋ.

29 Bəŋgwoŋ, fieŋ ffɨŋ n'yɔ̄ɔ fɨhŋ duŋ yulahalə bwɔɔ yo ŋkwoo. Chɔɔ jə fidiɛɛ gəŋ fwi, bəne bbəŋ bə́ kə̀nə bəkwɛɛ yee bə́ dûŋ ye bə́ duŋ lə bəkwɛɛ kə kənə, 30 bəne bbəŋ bə́ dè kpe yee bə́ dûŋ ye bə́ duŋ lə kə dee kpe, bbəŋ bə́ tɨ̀ŋ yee bə́ dûŋ ye fieŋ duŋ lə bə́ kə nwaa lə. Bəne bbəŋ bə́ tàŋ bieŋ yee bə́ dûŋ ye bə́ duŋ lə kə kənə fieŋ. 31 Bəne bbəŋ bə́ fə̀ bieŋ bi mbiŋ nu kə yii lə bufe gbaaŋ bənfə bieŋ bɨhŋ kə. N'yɔ̄ɔ nəni, yulahalə mbiŋ nu, ye i duŋ lə fidiɛɛ nəni, i yu ka bu kanə.

32 Ŋkiɛɛ lə yee bə́ dûŋ nyɛkii, hlɔɔ kə kwuŋ nə bəŋ kə. Mbɛɛ nnu i dùŋ kpɛ hləŋ i bənə je bənyii bufe ə bieŋ bi Baba mə fo mə lə yee i fə̄ ə duŋ fieŋ ffɨŋ Baba lə yee i wō njənjə bə wu. 33 Mbɛɛ nnu i kə̀nə kpɛ, i yìi bufe bwii ə duŋ ə bieŋ bi mbiŋ mə, fo mə lə yee i fə̄ fieŋ ffɨŋ fi nwaa kpɛɛ. 34 Ŋgɨŋ wi gaha wɛɛ fwe. Ə duŋ dəŋ lə yəəŋ ye fi kpɛ nnu i duŋ nyo hləŋ. I yìi bufe ə bieŋ bi Baba mə fo mə lə nə gbo wiih bə tɔŋ liih linhliŋ bə wu. Ə mə kənə nyo ə yee i yīi bufe ə duŋ ə bieŋ bi mbiŋ nu mə, i fə̀ fieŋ ffɨŋ gbo lə yee wi nūaa nyimi. 35 N'yɔ̄ɔ fɨhŋ nəni yulahalə ŋkiɛɛ bəŋkeeh ə duŋ bəŋ, ə kə duŋ nə lə ŋkiɛɛ lə mbaŋ je mbɛɛ ju kə. Ŋkiɛɛ ə duŋ lə mbɛɛ yee i kə̄lə fieŋ ffɨŋ fi dùŋ yəəŋ, fo bə lə yee bə nɨ̄ŋ bə Baba bə tɔŋ mwe ə bufe bweeŋ nakə gaa kə.

36 Ə nyo lə lɛɛ ŋiaŋ kpɛ, duŋ duŋ ŋəŋ lə gbo we wi shī wu gbaaŋ, ə duŋ lə fi fie kwaa lə bə́ baanə yee bə dūŋ, ə i fə ye i kiɛɛ lə jə kpɛ yo. Kəə i kə fəə yiwaha kə. 37 Kwaalə, nyo nnu i chiee tɔŋ liih lə mə lə jəə kpɛ kə, i yɔɔ bə kichɛɛŋ kiih, mbɛɛ yaa yəə wu lə bə́ baanə kə, i nɨhŋ ba bə gbo wiih, yii ba tɔŋ liih lə mə baanə kə,^ª kəə i fəə kinwaakə. 38 Fi hlə yee fi dūŋ lə, mbɛɛ nnu i jə̀ kpɛ nnu i mà lɛɛ lə yee bə́ dūŋ bə wu, kəə i fəə dəŋ kinwaakə. Kwaalə, mbɛɛ nnu i kə jəə wi kpɛ duŋ kəə i fəə kinwaakə gbaaŋ.^ª 39 Kpɛ bwò i dùŋ kpɛɛ mbɛɛ bwɔɔ nnu nyimi kaani həmə. Kwaalə, ə nyimi lə kpe, kəə duŋ ə i gəŋ chili nyo ju nnu i lèki, ə bəə wu baanə yee bə́ dūŋ, fieŋ fie duŋ kwaa lə mbini yo mbɛɛ kənə bənduŋ mbɛɛ Baba. 40 Kwaalə, ye ŋŋəŋ duŋ lə ə kpɛ yo hə ba nəni, ə yee i wō njənjə gbaaŋ. N'yɔ̄ɔ nəni, ŋkə̀lə lə ŋkənə dəŋ Fiana Chu.