1 Kɔlɛŋ 6

Mbɛɛ kimbemi kə gəŋ nə hlɔmɔ ju bə bəne bbəŋ bə́ dùŋ kə kənə kimbemi

Fi kə nwaa lə dəŋ lə, ə mbɛɛ ju ə bəŋ mə lə kənə fieŋ fidi bə maani, i she bəŋgəŋ hlɔmɔ wu ə bəne bə́ Chu fwi, i kaka gəŋ nə nhlaa yo bə bəne bbəŋ bə́ dùŋ kə fəə bieŋ ntiiŋ. 2 Bə kə kələ lə bəne bə Chu yáa bə́ hlāah bəne bə yaŋ ə mbiŋ nu mə kə lə? Ye fi duŋ lə lə ə bəŋ bbəŋ bə yá hlaah bə́, ə chu duŋ lə duŋ ə bə nakə hlaah lə mumweenə muntənə muhŋ ə bəŋ mə lə? 3 Bə kə kələ lə, ə be bbəŋ kkə yá hlaah bənchinda bə Chu kə lə? Ye fi duŋ lə nəni, kəə duŋ ə bə kələ bənhlaah bieŋ bbɨŋ bi dùŋ ə kinduŋh ki fidiɛɛ kɨhŋ mə kinwaa. 4 Bwɔɔ nnu bieŋ ye bi mbini bie dùŋ, bə kah ləhəŋ maa yee bə jə̄ bə gə̄ŋ bə bi ə duŋ ə bəne bbəŋ bəne bə kimbumə ki bəne bə kimbemi jə bə́ ye bəne bənya lə lə? 5 Gbo bee bəŋ. Ə chu duŋ lə mbɛɛ ju hləŋ ə bəŋ mə nnu i kə̀nə bufe bu kaalənə nhlaa bə ŋwuŋ bə maani ju lə? 6 Mbɛɛ bwò i kaka jə ŋwa mahni gəŋ hlɔmɔ, i hlɔmɔ ə duŋ bə bəne bbəŋ bə́ dùŋ kə kənə kimbemi. 7 Bə bəŋ bənduŋ bə baa bə kə̀nə bənhlaa ə bəŋ mə, nyìi lə bə gbee ba. Duŋ ə bə nakə tookwaŋ lə bəne bədi yee bə fə̄ bieŋ biwaha bə bəŋ lə? Duŋ dəŋ ə bə nakə tookwaŋ lə bəne bədi yee bə́ fīhi bəŋ lə? 8 Kwaalə, ə kaka ja chuu bəŋ yee bə fə̄ bieŋ biwaha baa fihi fihinə, bələh mbɛɛ yee i fə̄ dɨŋ bieŋ bɨhŋ ə duŋ maa bə maani. 9 Bə kə kələ lə bəne bbəŋ bə́ dùŋ kə fəə bieŋ ntiiŋ yá kənə dɔhɔ ə muŋkɨŋ mu Chu mə kə lə? Bə kə yee bə fîhi go ŋieeŋ kə. Bəne bbəŋ bə́ wàali kiwaali, bbəŋ bə́ chèe bə bəcheh bənya, nɔŋ kinɔŋ bə bəkwɛɛ bə bəne bədi, bənəə bbəŋ bə́ jə̀ bənəə, 10 bəbuyi, bəne bbəŋ bə́ gè díi bə bieŋ, bbəŋ bə́ ŋwì mbihŋ mə kwò bə́, bbəŋ bə́ tò bəne, ləkə bbəŋ bə́ kpèe bidɔhɔ bə́ jə̀ bieŋ bi bəne, yá kənə dɔhɔ ə muŋkɨŋ mu Chu mə kə. 11 Bieŋ bɨhŋ duŋ bbɨŋ bəŋ bədi màa bə fə̄ fwii. Kwaalə, Chu wii bəŋ, shaa fwoo chi bəŋ bənduŋ chili ə wu dí. I mà fə bieŋ bɨhŋ nəni kah ə yii li Baba Jisho Kleto bə Fiana Chu ya mə.

Gbo wi mbɛɛ kə duŋ nə bənfə kiwaali kə, wi duŋ yu nə kiŋkohi bə Baba

12 Duŋ ə mbɛɛ yɔɔ lə fieŋ hləŋ ffɨŋ duŋ ə fi baŋ wu bənfə fieŋ finhliŋ ffɨŋ i kìɛɛ. Kwaalə, n'yee n'yɔ̄ɔ lə, ə fieŋ finhliŋ ffɨŋ duŋ ə fi chɨnə mbɛɛ kə. Mbɛɛ duŋ ə i yɔɔ lə, fieŋ hləŋ ffɨŋ duŋ ə fi baŋ wu bənfə fieŋ finhliŋ ffɨŋ i kìɛɛ. Kwaalə n'yee n'yɔ̄ɔ lə, duŋ ə ntukwaŋ lə fieŋ fidi chuu mi lə n'yee ndūŋ nfwa fi kə. 13 Duŋ ə mbɛɛ ju yɔɔ dəŋ lə, “Biləə dùŋ yu te, te dùŋ yu biləə.” Kwaalə yee bə kə̄lə lə Chu yá bihi bi binhliŋ. Gbo wi mbɛɛ kə duŋ nə lə mbɛɛ yo yee i wāali kiwaali bə wi kə. Gbo wi mbɛɛ duŋ lə yee i fə̄ bieŋ ə jé yyɨŋ duŋ ə Baba yee i tɨ̄ŋ bə wu, ə duŋ Baba nnu i kə̀nə gbo we. 14 Ye Chu mà fwoolə Baba ya ə kpe mə, ə dəŋ yəəŋ ye i yá fwoo li be ə kpe mə bə muŋga mwii mwe. 15 Bə kə kələ lə go ŋieeŋ lə bikəllə bi gbo wi Kleto kə lə? Ə duŋ ə mbɛɛ baa fə ləhəŋ hlə jə kəllə ki gbo wi Kleto gəŋ buhuŋ bə wi kpɛ kiwaali lə? Ə duŋ ə yee fi dūŋ lə kə. 16 Bə kə kələ lə ə mbɛɛ buhuŋ gbo wiih bə kpɛ kiwaali, kəə bəə wu bie mbili mwi lə? Ə fi ffɨŋ bə́ mà bieŋna fie lə, “Bwɔɔ nnu kpɛ bə nyo buhuŋ gbo, kəə bəə wu choo mbili mwi.” 17 Kwaalə, mbɛɛ nnu i bùhuŋ gbo bə Baba duŋ bəə wu bie fiana mwi. 18 Lɔ fwɔ wi kiwaali. Bieŋ biwaha bidi bbɨŋ mbɛɛ fə̀, i fə̀ lə bi ə duŋ bə gbo wiih kə. Kwaalə, mbɛɛ nnu i wàali fə̀ yiwaha ə duŋ bə gbo wiih. 19 Bə kə kələ lə go ŋieeŋ lə jwaŋ wi fiana wɛɛŋ nnu Chu nəə bə bbəŋ bə́ nɔ̀ŋ mu lə? Ə bəŋ bbəŋ bə kənə go ŋieeŋ kə. 20 Bə́ mà taŋ bəŋ bu taŋnə chuŋ ntakə. Nəni, yee bə kôhi Chu bə go ŋieeŋ.