1 Kɔlɛŋ 5

Bə́ fwoo mbɛɛ kiwaali yo ə bəne bə Kleto mə

Bə kichɛɛŋ, bə́ yɔɔla mi lə mbɛɛ ju ə bəŋ mə ma gbee bənfə kiwaali. Ə duŋ bəne bbəŋ bə́ dùŋ kə kələ Chu kə, kə hlaa lə mɔŋ dɨŋ kɨhŋ kiwaali dəŋ kə. Ŋ'woo lə mbɛɛ ju ə bəŋ mə yu nɔ̄ŋ bə kpɛɛ tili. 2 Bə wè bu wenə, dɨŋ fɨhŋ fieŋ kah ə bəŋ mə ləhəŋ lə, duŋ ə bə nakə yee bə dē bu denə lə? Bə kənə bənfwoo dɨŋ mbini yo mbɛɛ nnu i mɔŋna yo dɨŋ fɨhŋ fieŋ ə bəŋ mə.

3 Maa ye bə duŋ lə ə mi go kə ŋəŋ nə, n'yo bə bəŋ ə fiana mə. Ŋkaala nhlaa dəŋ bə mbɛɛ nnu i mɔ̀ŋ yo dɨŋ fimbini fie fieŋ. 4 Ə yii li Baba Jisho bəŋ bwɔɔ nnu bə shìi ə shiinə kieeŋ mə, ndùŋ bə bəŋ ə fiana mə, muŋga mu Baba Jisho duŋ dəŋ həmə, 5 bə jə nə mbɛɛ yo ə kwáŋ ŋə Hlaata mə, fo mə lə bihi mbili wi, ə fiana wi yá hlə fukwoo butuu bbuŋ Baba Jisho yá fiimə bwo. 6 Bə wè nəni fi kə nwaa lə kə. Bə kə kələ lə, bwɔɔ nnu bə́ jə̀ jɔ nəni chɛɛ bwo fuhuŋ ə luu mə, i hlə fə luu le linhliŋ biŋ lə? 7 Bə fwoo jɔ ye ə bəŋ mə, ə bə hlə yee bə dūŋ bəne bəfwɔ. Bə kichɛɛŋ bə bie ye luu llɨŋ bə́ kə yii lə jɔ mə kə. Bə kələ lə, Chu mà jəə Kleto fə ntofi mu dəŋ yəəŋ ye ŋwa nshɔŋ nnu bə́ ba lə bəntofi bwɔɔ nnu bə dì Chɔnɔ ki Ŋkabəŋ. 8 Nəni, kkə kənə bəndi Chɔnɔ ki Ŋkabəŋ ə duŋ bə kibele kkɨŋ bə́ kə yii lə jɔ mə kə kkɨŋ ki dùŋ fwɔ wiwaha bə bifənə biwaha, yee kkə dûŋ bəne bə biwɛɛ binwaa bə bi kichɛɛŋ.^ª

9 Kiŋwaati kkɨŋ mmà mbieŋ kie bə bəŋ, mmà mbieŋ lə, bə kə buhuŋ go bə bəne bbəŋ bə́ wàali kiwaali kə. 10 Mmà ŋkə n'yɔ̄ɔ lə ə duŋ ki bəne bə mbiŋ nu bbəŋ bə́ wàali kiwaali kə, bə́ gè díi bə bieŋ, bə́ kpèe bidɔhɔ, bə́ jə̀ bieŋ bi bəne, ləkə bə́ chèe bə bəcheh bənya. Ə bə kiɛɛ lə bə she bə mbini bie bəne, kəə bə kənə bənshe mbiŋ nu. 11 Mmàa n'yɔ̄ɔ ə duŋ lə, bə kə buhuŋ gbo bə mbɛɛ nnu i chèe gbo wiih lə i duŋ ŋgwoŋ ya ə Kleto mə, i baa i wàali, i gè díi bə bieŋ, i chèe bə bəcheh bənya, i tò bəne, i ŋwì mbihŋ mə kwò wu, ləkə i kpèe bidɔhɔ i jə̀ bieŋ bi bəne. Mbɛɛ kə mɔŋ nə lə yee i dī bə dɨŋ mbini yo mbɛɛ kə. 12 Ə kə duŋ nə dɔhɔ kiaa bənhlaa bəne bbəŋ bə́ dùŋ kə duŋ nə ə kimbumə ki bəne bə kimbemi mə kə. Bəne bbəŋ dùŋ ə yee kkə hlâa duŋ bbəŋ bə́ dùŋ bie ə kimbumə mə. 13 Ə Chu nnu i yá hlaa bəne bbəŋ bə́ dùŋ kə duŋ nə ə kimbumə mə.

“Ə duŋ bə wə bənfwoo mbɛɛ nnu i dùŋ bə fwɔ wiwaha ə bəŋ mə.”