1 Kɔlɛŋ 4

Bəŋkah fwi bə kimbumə lə bəne bə nimi bə Kleto

Fi hə nwaa lə yee bə jə̂ lə kkə dùŋ bəne bə nimi bə Kleto, Chu nəə nimi liih li hlɨŋ llɨŋ li mà duŋ ə nələ mə ə bə́ kwáŋ. 2 Fi duŋ lə, mbɛɛ nnu bə́ nə nimi ə kwáŋ ŋiih mə kənə bənfə ye che kwoo wi kìɛɛ lə. 3 Ə wə hlaah mi yu nimi lɨŋŋ ləkə chəŋ nhlaah ji nni i hlaah mi, bə mi ŋə̀ŋ lə ə fieŋ fitənə. Nhlaah lə dəŋ gbo wuŋŋ kə. 4 Fieŋ hləŋkə ə tɔŋ lɨŋŋ mə ffɨŋ fi hlàah mi. Kwaalə, fimbini fie nyìi lə lə ndùŋ wɛɛŋ kə. Ə kwaa dəŋ Baba Jisho nnu i hlàah mi. 5 Nəni, bə kə yee bə hlâah bəne bwɔɔ yo kaani kə wunə kə. Bə ke Baba bwo. Ə wu nnu i yá fwoo bieŋ bweenə bbɨŋ bi dùŋ fidiɛɛ bbɨŋ bə́ nəla ə jɨbə mə, tɔhi bieŋ bbɨŋ bəne kə̀nə ə tɔ́ŋ ŋəbə mə. Nəni, ə Chu hlə kohi mbɛɛ mənhliŋ nnu i dùŋ lə bə́ kohi wu.

6 Bəŋgwoŋ, bieŋ bbɨŋ n'yɔ̄ɔ bɨhŋ kiaa bee Apolo duŋ bənchɨnə bəŋ, fo bə lə laanə bə be bənfə bieŋ kə kahiŋ bieŋ bbɨŋ bə́ bieŋna kə. Nəni, ə bə nakə baa lə we bə mbɛɛ ju kə, nyɛhiŋ mbɛɛ ju kə. 7 Wə nnu wə yu wē yo, ə fə nyəhə wə lə wə ko kah bəne bədi lə? Ə laha ffɨŋ wə kə̀nə ffɨŋ fi dùŋ lə bə́ mà kə nəə wə fi bunənə lə? Ye fɨhŋ duŋ lə nəni, ə fə laha lə yee wə wē ə waalə bə́ kə nəə wə fieŋ fie bunənə lə? 8 Ə chu duŋ lə bə yɔ̀ɔ lə bə kə̀nə bieŋ binhliŋ bbɨŋ bə kìɛɛ, lə bə choo bəche bieŋ, lə bə choo bəŋkɨŋ lə? Ŋkiɛɛ lə yee bə dûŋ bəŋkɨŋ fo bee bəŋ lə yee kkə hlāah bənhliŋ. 9 Ŋŋəŋ lə Chu chiee be bbəŋ kkə dùŋ bie bəne bə faŋnə bə Jisho dɔhɔ ki dɨŋ. Kkə dùŋ ye bəne bbəŋ hlaa kwoo bə́ nnu bə́ lə jə gəŋ bə bə́ ə ŋwinte, nnu bəne maa bənchinda bə Chu lə yee bə́ kēe ye bə́ jīi bə́. 10 Kkə choo ye bənfili yu Kleto, kwaalə bə dùŋ bəne bə Kleto bəŋkələ bieŋ. Kkə dùŋ bəne bbəŋ bə́ dùŋ bəmbiaŋ, bə duŋ bəntaabə. Bəne bwɔ̀kwe bə bəŋ, bə́ jə̀ be kwe. 11 Gbe jə həmɛɛ bwo bwii fidiɛɛ, kkə bie bə jəbulə, ntɔntɔ ŋɨ̀ŋ be. Kkə lèe ə duŋ bindu binhlaki, bəne fə̀ bə be, kkə kə kə̀nə dɔhɔ ki nɔŋ nə kə. 12 Kkə jù, kkə nɨ̀ŋ bə kwáŋ ŋiaa kkə hlə di fieŋ. Bəne tò be, bələh kkə nòŋ kinhləmə ə bə́ kwáŋ. Bə́ hlɔ̀ɔ wuh ə be dɨŋ, kkə kwàa ə duŋ kwaa tɔ́ŋ. 13 Bwɔɔ nnu bə́ yɔ̀ɔ kiaa, kkə hləmə bə́. Hləŋ hləŋ bwo bwii fidiɛɛ, kkə dùŋ ye bieŋ bbɨŋ bə́ lɛɛla lə tələ. Kkə choo bieŋ binfwɔ ə mbiŋ nu mə.

14 Mbīeŋ nə bieŋ bɨhŋ bə bəŋ nəni lə ŋkiɛɛ lə bə kənə giaali kə. Ŋkeeh bəŋ ye bwɔni bəŋŋ bbəŋ bə́ dùŋ tɔŋ lɨŋŋ. 15 Ə bə kənə dəŋ bəne kiŋaaŋkə bbəŋ bə́ kèeh bəŋ ki Kleto, ə nakə yee ə dūŋ lə bə kənə bəchwa kiŋaaŋkə kə. Ə mi chwa weŋ, yu ə màa mi nnu mmà fə lə bə duŋ buhuŋ bə Jisho Kleto bwɔɔ nnu mmàa ndōntə hlɨŋ nwaa yi bə bəŋ. 16 Nəni, nhlə yee nnōŋ lə yee bə bə̂lə wuh ŋəŋŋ. 17 Fiee fieŋ ffɨŋ mmà nfaŋ fie Timɔti bə bəŋ, i dùŋ ŋgwoŋ ə Baba mə. I dùŋ tɔŋ lɨŋŋ, i lèmi dəŋ ə hlɨŋ nih bəŋ bə tɔŋ mwe. I yá yi bwo baa ŋoo bəŋ fwɔ wuŋŋ ye mbɛɛ Kleto lə. Fieŋ ffɨŋ i yɔ̀ɔ ə fi kibɛɛ ffɨŋ njàa fie nlàanə bimbumə bi bəne bə kimbemi bənhliŋ, ə bidɔhɔ binhliŋ mə. 18 Bəne bədi chɔɔla bəŋ'we yu bə́ hlè lə nduŋ ə mbaa mbwo ə bəŋ mə kə. 19 Kwaalə, ə Baba lə bemi, kəə ə shee chɛɛ ə mbaa mbwo ə bəŋ go. Ə nlə mbwo, ə ŋŋəŋ ləə bəne bbəŋ bə́ wè bie chɔɔ bə́ kə̀h kijə lii bə́ kə̀nə muŋga mwɛhɛŋ lə, 20 yu muŋkɨŋ mu Chu dùŋ nə fieŋ fi kəh nə kijə kə. Ə fieŋ fi muŋga mmuŋ mu bwò ə Chu kwáŋ. 21 Bə kìɛɛ lə n'yá n'yee mbwō ləhəŋ lə? Bə kìɛɛ lə n'yá n'yee mbwō bə fitələ lii bə tɔŋ li kinleki maa kindunshiiŋ lə?