Bəne bə Kleto yee bə́ dûŋ die mi
3
Bəŋgwoŋ, bwɔɔ nnu kkə mà duŋ, mmà ŋkə n'yee n'yɔ̄ɔ bə bəŋ ye bəne bbəŋ bə́ wò ə duŋ bə Fiana Wɛɛŋ kə. N'yɔ̄ɔ bə bəŋ ye bəne bbəŋ bə́ kaani bə bə̀lə ə duŋ bieŋ bbɨŋ mbili bə́ kìɛɛ, bə kaani ye muŋiaa muŋ'wɛ lə ə je Kleto mə. 2 Mmà nnə bəŋ ə duŋ biŋ. Mmà ŋkə nnəə bəŋ bieŋ bintaabə kə, yulahalə bə bie bə kāani kə taa kə. Bwii fidiɛɛ dəŋ bə kə taa dəŋ kə. 3 Bə kaani bə bə̀lə ə duŋ bieŋ bbɨŋ mbili weŋ kìɛɛ. Ye bə kaani lə bə kə̀nə biwɛɛ biwaha, bə kpə̀nə bə go ŋieeŋ, kəə fɨhŋ nyìi lə bə bə̀lə ə duŋ nyaŋ ni go lə? Fɨhŋ fieŋ kə nyìi lə lə bə kaani bə kə̀nə fwɔ wi bəne bə yaŋ kwe kə lə? 4 Mbɛɛ ja yee i yɔ̄ɔ lə, i bə̀lə wu fiih ə duŋ Pwɔɔ, mbɛɛ ju lə, i bə̀lə ə duŋ Apolo. Ə fɨhŋ nakə yee fi nyīi lə bə fə̀ ə duŋ fwɔ wi bəne bə yaŋ kwe kə lə? 5 Apolo duŋ nyəhə, Pwɔɔ duŋ nyəhə lə? Bee wu bənhliŋ duŋ kwaa bəne bə nimi bə Baba Jisho, kkə mà fəə bə hlə yii tɔŋ ə wu mə, mbɛɛ nɨ̀ŋ liih nimi ye Baba nə lə bə wu. 6 Lɨŋŋ nimi mà duŋ bəndɔ, li Apolo duŋ bənshoo ŋgwiŋ, kwaalə ə fə̀ Chu ŋgɔ yo hlə yee i kō. 7 Nəni, maa mbɛɛ nnu i dɔ̀ bə mbɛɛ nnu i shòo ŋgwiŋ kə bwii lə fieŋ kə. Ə Chu kwaa nnu i fə̀ i hlə yee i kō. 8 Mbɛɛ nnu i dɔ̀ bə nnu i shòo ŋgwiŋ duŋ dəŋ yəəŋ, Chu yá yi hluŋ mbɛɛ mənhliŋ i bə̀lə nimi li mbɛɛ yo. 9 Kkə buma yee kkə nɨ̄ŋ nimi li Chu. Bə duŋ wɛɛh ki Chu kie baa duŋ chəŋ yi ye. 10 Mmà nchi kichili ki chəŋ kie ye mbɛɛ wɛɛnə nnu i kə̀lə ba nimi liih, bələ kinchɨnə ki Chu kkɨŋ i mà nə bə mi. Ye mmà nchi lə nəni mbɛɛ ju hlə yee i wɛ̄ɛ chəŋ ye. Bwɔɔ nnu mbɛɛ wɛ̀ɛ ə kichili kɨhŋ bəŋ, yee i kə̂lə ye i wɛ̀ɛ lə. 11 Yee bə kə̂lə lə kichili kɨhŋ ba ba kkɨŋ ki dùŋ kie lə ə Jisho Kleto, duŋ ə mbɛɛ baa fə kidi kə. 12 Bəne hlə yee bə́ wɛ̄ɛ ə ki bəŋ bə bieŋ chili chili. Mbɛɛ ju ja jə ə duŋ choo kinwaa kige, mbɛɛ ju jə kiwu, mbɛɛ ju jə tə́ ŋəntachuŋ hlə yee i wɛ̄ɛ bəŋ. Mbɛɛ ju jə ə duŋ bite, ju nyóŋ, ju jə wú hlə yee i wɛ̄ɛ mu. 13 Maa ə bə́ wɛɛ dəŋ ləhəŋ, kəə butuu bwe bu bwō bbuŋ bə́ yá yi ŋəŋ ye nimi li mbɛɛ dùŋ lə. Li yá fu bweenə butuu bbuŋ Kleto yáa i bwō bə bwii. Bwii we yá yi mɔŋ nimi li mbɛɛ, bəŋəŋ ye li duŋ lə. 14 Ə duŋ lə fieŋ ffɨŋ mbɛɛ wɛ̀ɛ ə kichili kie bəŋ lə ba kə fiee, ə mbɛɛ yo bənə bikoonə. 15 Ə fi lə fi, ə mbɛɛ yo la ə bikoonə biih go, kwaalə ə wu kibɛɛ fukwoo ye mbɛɛ nnu i kaah ə bwii mə.Bəne bə Kleto duŋ jwaŋ wi Chu
16 Bə kə kələ lə bə duŋ jwaŋ wi Chu, Fiana Chu dūŋ ə bəŋ mə lə? 17 Ə mbɛɛ lə bihi jwaŋ we, ə Chu ya laa wu bu laanə dəŋ, yulahalə jwaŋ wi Chu wuhŋ duŋ wɛɛŋ, ə duŋ bəŋ jwaŋ we. 18 Mbɛɛ kə fihi gbo wiih kə. Ə mbɛɛ ju ə bəŋ mə lə hle lə i yo bə bufe ə mbiŋ nu mə, i jə gbo wiih ye nfili fo mə lə kənə bufe. 19 N'yɔ̄ɔ nəni yulahalə bieŋ bbɨŋ bəne bə yaŋ kwe ŋə̀ŋ lə ə bufe, duŋ bbɨŋ Chu ŋə̀ŋ lə ə jɨkənə. Ə duŋ fi ffɨŋ bə́ mà bieŋna lə,
“Chu jə̀ ə duŋ bufe bu bəne bəŋkələ bieŋ
i kwò bə́ mu.”
20 Fi baa duŋ bə́ bieŋna lə,
“Baba kələ lə bieŋ bbɨŋ bəne bə bufe hlè
duŋ kwaa binya.”