1 Kɔlɛŋ 2

Pwɔɔ mà kə dontə Hlɨŋ nwaa bə bufe bu mbɛɛ ŋkee kə

Bəŋgwoŋ, bə hle bwɔɔ nnu mmà mbwo yo ə bəŋ mə bəndontə hlɨŋ Chu nih bə bəŋ nni i mà hlaala duŋ ye ə nələ mə. Mmà ŋkə mbwoo fɨŋŋ lə n'yee ndōntə bə bəŋ bə linini li njənjə ləkə bə bufe buŋŋ kə, 2 yu mmà nchiee lə nduŋ ə njə fieŋ fidi ə fieŋ mə kə, kahiŋ bəndontə ə duŋ ki kpe nni Jisho Kleto mà kpe ye ə kiŋgwa go. 3 Ye mmàa ndūŋ lə bə bəŋ, mmàa ndūŋ bɛɛɛ, nlɔ̀, nnə̀nə. 4 Bwɔɔ nnu mmàa n'yɔ̄ɔ, ndòntə bəŋ hlɨŋ nwaa, mmà ŋkə n'yee n'yɔ̄ɔ ə duŋ bə díe yí bufe yí njənjə kə. Mmàa n'yɔ̄ɔ ə duŋ bə muŋga mu Fiana Wɛɛŋ. 5 Mmàa fə̄ nəni, fo bə lə nakə yii lə tɔŋ ə Jisho mə yu bufe bu mbɛɛ ŋkee kə, kwaalə bə yii tɔŋ yu muŋga mu Chu.

Bufe bu Chu

6 Maa ye fi duŋ lə nəni, kkə dòntə bufe bə bəne bbəŋ bə́ mɛɛhla. Bufe buhŋ lə bu yaŋ kwe kə, ləkə bu bəne bbəŋ bə́ hlàah fidiɛɛ kə. Muŋgeni mubə yá yi bwo la nya. 7 Bufe bbuŋ kkə dòntə buhŋ lə bufe bu Chu, bu mà hlaa duŋ ə nələ mə bəne kə kələ kə. Bufe bwe mà bwɛɛ Chu ə kaani ye mbiŋ mà chɔɔ, bəmbwo fə fo kkə lə kənə kinduŋh ə kiŋkuntaŋ kiih mə. 8 Bufe buhŋ duŋ mbɛɛ hləŋ ə kintu ki bəne bbəŋ bə́ hlàa bie ə bwɔɔ nu bəŋ mà kə kələ kinuu ki bwi kə, yulahalə ə bə́ màa kələ, ə bə́ màa nakə bweeni Baba nnu i dùŋ yo ŋkuntaŋ ə kiŋgwa go kə. 9 Kwaalə bə be, fi duŋ ye bə́ bieŋna lə lə,

“Fieŋ ffɨŋ díi kə hlaa lə ŋəŋ,

bituŋ kə hlaa lə wo,

ləkə biwɛɛ kə hlaa lə hle,

ə bi bbɨŋ Chu mà bwɛɛla bə bəne bbəŋ bə́ lèki wu.”

10 Chu fəə Fiana wi nyii bieŋ bɨhŋ bə be. Fiana Chu ba bəmbwo fwiilə bieŋ binhliŋ, i bwò i fwìilə maa binələnə bi Chu, 11 yulahalə duŋ ə mbɛɛ ŋkee kələ fieŋ ffɨŋ mbɛɛ ŋkee ju hlè ə tɔŋ liih mə kə, kahiŋ fiana mbɛɛ yo nnu i dùŋ ə wu mə. Ə dəŋ yəəŋ ye duŋ ə mbɛɛ nakə kələ fieŋ ffɨŋ Chu hlè kahiŋ Fiana Chu. 12 Fiana Chu mà kə nəə be ə duŋ dɨŋ nnə li yaŋ ə mbiŋ nu mə kə. Fiana nu mà fu ə Chu kwáŋ bənfə lə yee kkə kə̄lə nnə́ ŋənhliŋ ŋŋəŋ Chu mà joŋna be mu.

13 Kkə hlə yee kkə dōntə bieŋ bɨhŋ ə kə duŋ nə bə die nni bə́ kèeh bə bufe bu mbɛɛ ŋkee kə. Kkə dòntə ə duŋ bə díe yyɨŋ Fiana Wɛɛŋ kèeh be mu, kkə hlə nachɛ bieŋ bintiiŋ bi Fiana Wɛɛŋ bə bəne bbəŋ bə́ kə̀nə Fiana Wɛɛŋ. 14 Mbɛɛ nnu i dùŋ kə kənə Fiana Wɛɛŋ ə wu mə, i jə̀ lə bieŋ bi Fiana Chu kə. I ŋə̀ŋ ŋkwo wi lə ə bieŋ binfili. I kə kə̀lə ye bi duŋ lə kə, yulahalə ə bieŋ bbɨŋ bi dùŋ nfə Fiana Chu mbɛɛ hlə kələ. 15 Kwaalə, mbɛɛ nnu Fiana Wɛɛŋ dùŋ ə wu mə, duŋ ə i fwiilə bieŋ binhliŋ kinwaakə kələ kinuu ki mu, mbɛɛ hləŋ həmə nnu duŋ ə i taalə bieŋ bi mbini yo mbɛɛ. 16 Fi duŋ bə́ bieŋna lə,

“Mbɛɛ hləŋ həmə nnu i kə̀lə fieŋ ffɨŋ Baba hlè

fo mə lə keeh Chu.”

Kwaalə, kkə kənə munhlenə ə duŋ mmuŋ Kleto kənə.