1 Kɔlɛŋ 1

Kiŋwaati ki fwii kkɨŋ Pwɔɔ mà bieŋ bə kimbumə ki

Kɔlɛŋ

Ə mi Pwɔɔ, nnu Chu mà diila ye i mà kiɛɛlə lə, n'yee ndūŋ mbɛɛ hlɨŋ Kleto Jisho. Kkə bie bee Shɔshteni ŋgwoŋ ya. 2 Kiŋwaati kɨhŋ gəŋ ə kimbumə ki bəne bə kimbemi bə Chu bə Kɔlɛŋ, bbəŋ i fwoola bə́ buhuŋ chi chili bə Kleto Jisho. Chu mà diila bəŋ lə yee bə dûŋ bəne bbəŋ bə́ dùŋ biih, ye bəne bənhliŋ bbəŋ bə́ chèe yii li Baba Jisho Kleto ə bidɔhɔ binhliŋ mə duŋ lə. I duŋ Baba bə́ dəŋ yəəŋ ye i duŋ lə ya. 3 Chu Tah ya bə Baba Jisho Kleto nyii bəŋ tɔŋ linwaa, baa nə bəŋ tɔ́ŋ ŋəndə.

Pwɔɔ nə kimbaafɛɛ ye Chu hləmə bəne bə Kɔlɛŋ

4 Mbà bənnə kimbaafɛɛ bə Chu bwɔɔ mənhliŋ yu bəŋ yu kinchɨnə kkɨŋ Chu nəə bəŋ ye bə duŋ lə mbuhuŋ bə Kleto Jisho. 5 Ye bə duŋ lə mbuhuŋ bə Jisho Kleto nəni, Chu mà hləma bəŋ bə bieŋ ə jé mə kiŋaaŋkə, bə fɨhŋ nini lə, bə kələ fieŋ finhliŋ, baa kələ dəŋ bən'yɔɔ fieŋ finhliŋ gbaaŋ. 6 Kinhləmə kiih kɨhŋ nyìi lə bə tɨŋna jə hlɨŋ nni bə mà woo ye ki Kleto, 7 nəni ye fi duŋ lə fidiɛɛ, bə jɨnə lə nnə lidi llɨŋ fiana Chu nə̀, ye bə kè lə bwɔɔ nnu Baba ya Jisho Kleto yá fu bwo ə bə yá ŋəŋ ə wu go. 8 Wu Baba ya Jisho Kleto yá fə ə yee bə lēmi ntakə gəŋ kpee həŋgbɔŋ, kə kənə dəŋ yiwaha ə butuu bbuŋ i yá baa bwo chuu kə. 9 Chu duŋ Chu kichɛɛŋ. Ə wu nnu i mà dii bəŋ lə yee bə dūŋ mbuhuŋ bə Ŋiaani Jisho Kleto nnu i dùŋ yo Baba ya.

Keehnə ki kiŋga

10 Bəŋgwoŋ, ŋkɔ̄nɔ bəŋ ə yii li Baba Jisho Kleto bəŋ lə, bəŋ bənhliŋ bumə yee bə dūŋ die mi. Kiŋga kə duŋ nə ə bəŋ mə kə. Yee bə dûŋ ye mbɛɛ mwi lə, bə kə̀nə kinhle mwe, bə nɨ̀ŋ ə fieŋ bəŋ fimwi. 11 Bəŋgwoŋ n'yɔ̄ɔ nəni, yulahalə bəne bə Kloy chəŋ hə yɔɔla bə mi lə, kpənənə kie ə bəŋ mə. 12 Fieŋ ffɨŋ n'yɔ̄ɔ duŋ lə, mbɛɛ bwò i yɔ̀ɔ lə, i bə̀lə ŋkwo wi ə duŋ Pwɔɔ, ju yɔ̀ɔ lə i bə̀lə ŋkwo wi ə duŋ Apolo, ju lə i bə̀lə Shefa,^ª ju lə i bə̀lə ŋkwo wi ə duŋ Kleto. 13 Ə chu duŋ lə bə́ gaah Kleto ə bikəllə mə lə? Ye! Ə Pwɔɔ nnu bə́ mà bweeni ə kiŋgwa go yu bəŋ lə? Lii lə bə́ mà yii bəŋ ə njɔ ə yii li Pwɔɔ bəŋ lə? 14 Nnə̀ kimbaafɛɛ bə Chu lə mmà ŋkə yii lə mbɛɛ ju ə njɔ ə bəŋ mə kahiŋ Klishpu bə Gayu, 15 nəni mbɛɛ kə yɔɔ lə lə, bə́ mà yii wu njɔ ə yii lɨŋŋ bəŋ kə. 16 Eee, mmà n'yiila dəŋ Shtefana bə bəne bə wu chəŋ ə njɔ. Kahiŋ nəni, ŋkə mbaa lə kələ mbɛɛ ju nnu mmà n'yiila wu ə njɔ kə. 17 Yee bə kə̂lə kwaa lə Kleto mà kə faŋ nə mi lə mbwo yii bəne ə njɔ. I mà faŋ mi lə mbwo n'yee ndōntə ə duŋ hlɨŋ nwaa yi. N'yɔ̄ɔ lə ə duŋ bə biwu binjənjə kə, fo kpe nni Kleto mà kpe ye ə kiŋgwa go lə chu fieŋ finya.

Kleto duŋ muŋgeni bə bufe bu Chu

18 Fi duŋ lə hlɨŋ nih lə Kleto mà kpe ə kiŋgwa go lə nfili bə bəne bbəŋ bə́ lā bu lanə. Kwaalə, hlɨŋ nih duŋ ə muŋga mu Chu mə yu be bbəŋ kkə bie kkə fū bie kwoo. 19 Fi duŋ bə́ bieŋna lə,

“N'yá ŋgɔhɔ laa bufe bu bəne bbəŋ bə́ nyìi bufe,

hlahi munhlenə mu bəne bbəŋ bə́ kə̀lə bieŋ.”

20 Ye fi duŋ lə nəni, bəne bə bufe bəhŋ lèmi fəhəŋ lə? Bəne bbəŋ bə́ kèeh bəŋkɨnə bə Chu lə fəhəŋ lə? Bəne bbəŋ bə́ nòo bie noonə lèmi fəhəŋ lə? Chu kə nyii lə ba lə bufe bu yaŋ kwe lə bu nfili lə? 21 Ə bufe bu Chu mə bieŋ binhliŋ gbaaŋ mà fəə lə duŋ ə bəne bə mbiŋ nu mə kələ wu bə bufe bubə kə. Fi nwaa wu lə mə jə fieŋ ffɨŋ kkə dòntə bəne ŋə̀ŋ lə ə nfili chuu fwoo bəne bbəŋ bə́ bèmi mu. 22 Bəjuu yee bə́ kīɛɛ bəŋəŋ fieŋ ffɨŋ fi nyìi muŋgeni mu Chu fo bə́ hlə bemi, Bəglik kiɛɛ bufe bu fieŋ fidi fo bə́ hlə bemi. 23 Kwaalə, kkə dòntə ŋkwo ya ə duŋ ye bə́ mà bweeni Kleto ə kiŋgwa go. Bəjuu yee bə́ nyɔ̄kɔ. Bəne bbəŋ bə́ dùŋ kə duŋ nə Bəjuu yee bə́ ŋə̄ŋ lə ə nfili. 24 Kwaalə, bə bəne bbəŋ Chu shaala, ləkə ə Bəjuu, ləkə Bəglik, hlɨŋ nih ki Kleto duŋ muŋga mu Chu bə bufe bu Chu buŋkuntaŋ. 25 Yee fi dûŋ nəni, yulahalə fɨhŋ nini nyìi lə nfili Chu duŋ ə duŋ bufe bbuŋ bu kàh bufe bu mbɛɛ ŋkee mənhliŋ. Fieŋ ffɨŋ fi nyìi ye biaŋnə ki Chu duŋ muŋga mmuŋ mu kàh ba mu mbɛɛ ŋkee mənhliŋ.

26 Bəŋgwoŋ, bə baa hle ye bə mà duŋ lə bwɔɔ nnu Chu mà shaa bəŋ. Bəŋ kiŋaaŋkə mà kə duŋ nə bəne bə bufe ye bəne bə yaŋ kwe kìɛɛ lə kə. Bəŋ kiŋaaŋkə mà kə duŋ nə bənta gbo kə. Bəŋ kiŋaaŋkə mà kə fwoo ə bichəŋ bi bəne bəŋkuntaŋ bəŋkuntaŋ mə kə. 27 Kwaalə, Chu shaa kwaa bənfili bə yaŋ kwe bənfə lə gbo bee bə bufe, shaa bəmbiaŋ bə yaŋ kwe bənfə lə gbo bee bəntaabə bie. 28 Chu mà shaala bieŋ bbɨŋ bəne jə̀ kwe ə mbiŋ nu mə, maa bieŋ bbɨŋ bəne nyɛ̀hiŋ, shaa dəŋ maa bieŋ bbɨŋ bi dùŋ kə duŋ nə bieŋ kə, bənfə lə bieŋ bbɨŋ bəne ŋə̀ŋ lə ə bieŋ, bi chù binya. 29 I mà fə nəni, fo mbɛɛ ŋkee lə nakə wee ə wu dí kə. 30 Ə wu Chu nnu i mà buhuŋ bəŋ bə Kleto Jisho. I fə Kleto yee i dūŋ je bufe buŋkuntaŋ ə be mə, kənə fwɔ wi wɛɛŋ ye Chu, yah be ə kwáŋ ŋə ŋgə mə. 31 Fi hlə yee fi dūŋ ye bə́ bieŋna lə lə,

“Bwɔɔ nnu mbɛɛ kiɛɛ lə yee i wê,

yee i wê bə fieŋ ffɨŋ fi dùŋ nfə Baba.”