Eebru i

Kugbɔŋu kun bi ŋmàn̄ ki tīī

Eebru

yabee

Tibɔkilkaal

Unil un kamaa di yaa bíi kàaǹ kugbɔŋu neeyee, án làá nīn bí-u kii ubɔ di bíi sòoǹ nì u Unimbɔti bɔtee, kaa sá kugbɔŋu ní u bíi kàaǹee. Biyakatikaabi bin lúŋkèe kúntì nì ijaam ní ki ŋūǹ kí yàntī unil ń dàkafì kí lì yii an sá kugbɔŋu ní bi ŋmàn̄. Ama ku nín kíĺ puee kaa lī tiba tí ŋmā kí béé un ŋmàn̄-kuee àá un ní bi ŋmàn̄-ku ki tīīyee. An ŋūǹ kí nīn sá yii Italii tiŋkin ní bi ŋmàn̄ kugbɔŋu gbanti (13.24). An yaa pée sá puee, bi ŋmàn̄-ku ki tīī Kriisitoo yab bin bi nìn bíi jáà nì kaa dū-bi ki yíiń tibee ní. An puee bi nìn bíi màkà kí dū Kriisitoo kí fá. Un ŋmàn̄ kugbɔŋu nee bíi tìì-bi kunyannyaau bí nīn ŋúb́ fookii an píkí. U nìn lēē ki dàkā-bi yii tin tɔ́kɔ́ tikɔkɔ puee di sá Kriisitoo nì u-tundi din u túń ki cáań-ti difiilee.

Kugbɔŋu nee kíĺ ki sòon̄ yii Unimbɔti dī u-Jipɔɔn Yeesu Kriisitoo pu ní ki lēē u-ba ki dàkā-ti (1.1-3). Tibɔti gbanti yākatì ajancukukpaan ali ní:

- Dijampeepeekaal (1.4–10.18) lēē ki dàkā yii Kriisitoo di tɔ́kɔ́ tikɔkɔ pu. U sá ukpaan ki jítiǹ Unimbɔti bɔnaatiliibi (1.1-3), ki sá ukpaan ki jítiǹ ituun (1.4–2.18), ki sá ukpaan ki jítiǹ Mooyiisi nì Joosuwa (3.1–4.13). Úǹ baba di sá dipoompɔndi saraaŋakpiliu, ní ki sá ukpaan ki jítiǹ dipooŋkpikil saraaŋakpilib (4.14–7.28). Saraa un u ŋá dibaba jee jítiǹ saraabi kupaau bin bi nìn ŋá Isirayeel yab yuntiŋu Dipooŋkpikil poonee (8.1–10.18).

Dijanliliitiil (10.19–13.19) tìì bin u ŋmàn̄ kugbɔŋu nee kunyannyaau bí pɔ́ɔǹ fookii poon (10.19-39). Dijandi gbanti poon ní ti kāntí Dipooŋkpikil poon fookiidambi ŋabikau (11), nì ti nín máaǹ kí dū ti-nimbikpeeŋu kí báań Yeesu Kriisitoo pu kí ŋmèè falaa kii úŋ̀wuee (12.1-11). Tibɔkpaafikaal nì abɔkpaa boonee (12.12–13.19), un ŋmàn̄ kugbɔŋu nee mēē ki bīiǹ bin u ŋmàn̄-ku ki tīīyee ki jáam̀-bi (13.20-25).

Kí ŋmā kí tūtuǹ bin làá kàaǹ kugbɔŋu nee ń já kí pɔ̄ɔkiǹ diwuŋyɔtilee, un ŋmàn̄-kuee kaa sòon̄ anyɔɔbummɔɔn ŋmaniŋma. U sòon̄ Kriisitoo yab nín bí agìń ŋin poon duulinya poonee, ní ki cántì Kriisitoo tundi taapu. Di sá yii Kriisitoo kúm puee, u ŋá tin ní saraa ubɔ kaa bàà pée ŋūǹ kí ŋée. U yíiń bin làá kàaǹ kugbɔŋu nee bí dū bi-ba kí kūtì Yeesu Kriisitoo yab bin sá biseeradambi ki dūu ŋá dikitikpaandee pu. Yeesu gbanti di tìì bin kɔkɔ tɔ́-uee difiil din kaa cáá dikúntilee.