Kugbɔŋu kun
Yakubu
ŋmàn̄ee
Tibɔkilkaal
Yakubu gbɔŋku poonee, ti kāntí adaka ŋin sá ki tīī Unimbɔti nibul din yàl̄ ki kɔ́ duulinya jaŋŋi kɔkɔnee (1.1). Nì tininjati nì tibɔŋmantikaal ní Yakubu (un ni binib wāĺ ti-Dindaanee) dūu ŋmàn̄ kugbɔŋu nee ki tīī Kriisitoo yab kí wòoǹ-bi mbimbim min bi cáá tɔb pu nì bin kaa sá Kriisitoo yabee pu.
Tibɔti tin u ŋmàn̄ee dī dī tɔb ní an pɔ̄ɔ̄ tí ŋmā kí kpāfì-tì abɔtaa abɔtaa. Yakubu péé péé ki sòon̄ iciin pu. Unimbɔti dí tìì iciin ní un là-iee máaǹ kí bàlifì-u nì fookii ní (1.2-8). Míǹ boonee ní u sòon̄ disool nì tigaajati pu, ní ki sòon̄ dinimbinaamandi nì icɔŋki pu, ní ki sòon̄ dinimbɔtinoobaamɔndi din sá yii unil ń tɔ̄ ditundi ní bí kée (1.9-27). Míǹ boonee ní Yakubu nyáń imaaganti pu, imaaganti in kɔkɔ bí Unimbɔti nikitil kansikinee pu (2.1-13). Boonee ní u nín kíĺ tibɔti tin pu kugbɔŋu nee tɔ́kɔ́ee: mpèé ŋun bí fookii nì atuun kansikinee (2.14-26). U dū tibɔŋmantikaal ní ki sòon̄ dilimbil nín ŋáań ikpiti iŋyee (3.1-12). Míǹ boonee ní u fātìi sòon̄ kun di sá iciin tiŋman pu yalee pu (3.13-18). U kpīiǹ binib bin cāabìń diyakatilee ŋkpitim pu. Bidambi sá duulinya bɔɔbi bin dàkafī yii bi cáá nsan kí sòoǹ bi-nabiyaamu bɔtee ní. U kpīiǹ bíǹ ki dóòyee ní ki nyáń bigaajab bin mùul̄ bi-tɔntɔnliibee pu (4.1–5.6). Kí kúntée, u tīī bin làá kàaǹ kugbɔŋu nee kunyannyaau bí nīn cáá kimɔtii, kí nīn pɔ̄ɔntí ŋwimmeemin ní kí nīn tútúǹ tɔb nnimbɔtisanni (5.7-20).
Kugbɔŋu kun bi ŋmà kí tīī Kriisitoo yab kii kuneeyee bɔti cántì ní: an kaa sá unil ń lì kinyɔkɔn ŋmaniŋma yii u fōō Yeesu Bɔmɔntiiti ki kíí, ama unil un fōō ki kííyee máaǹ kí yàntī bí ká míǹ u-bimbim poon, di sá yii «unil yaa fōō ki kíí ní kaa tūǹ atummɔntee, u-fookiiu kúù ní.»