Yakubu 4

Ní taa nín̄ néeń duulinya

1 Ba di cāabìń kunikpɔŋkpɔkɔu nì kujaau ni-kansikin ní? An sá ni-kpɔkɔsib bin bí ni-wuntin ki jáà baabadalee di cāabìń tíǹ kɔkɔ. 2 Ni cáá nnimbitaataam tiba pu, ní kaa ŋūǹ kí ká kudɔŋu, míǹ puee ní ni yaa ká unilee, ní ní kpɔ̀. Ni-nimbiliŋ máǹ tiba pu ní naa ŋūǹ kí ká kudɔŋu, ní kujaau nì kunikpɔŋkpɔkɔu kóò. Kun di yì-tì ní naa kāntí kun ní ni nyàab̀ee di sá naa mèé Unimbɔti un tìì kudɔŋu gbantee. 3 Míǹ ní ni yaa tí mēē Unimbɔti, naa kāntí, kun puee ni dàkafī ilandɔkɔkpiti ní. Kun ni mèé ki nyàab̀ee, ni là kí dūú ŋá min fáatì-nee ní. 4 Nimbi bin fá Unimbɔti kii kinimpulaakpaai nín féeń u-cal puee, naa nyí yii un néeń duulinyee sá Unimbɔti pulincɔnti níii? Sii un píí duulinya kubɔɔtiiuee kpántì Unimbɔti pulincɔnti dee. 5 Ni nyí fám ní Unimbɔti gbɔŋku poon sòon̄ yii: «Unimbɔti kaa mɔ̄ ŋfam min u dūu ŋá ti-nee pu.» ^a 6 Ama u ŋáań-ti tiŋan tin wīikí ki lákatèe, kii an nín ŋmàn̄ u-gbɔŋku poon puee, yii: «Unimbɔti kaa gèetíǹ bilambidambi, ama ní ki ŋáań bin sìntīǹ bi-ba taapuee tiŋan^b.» 7 Míǹ puee, sìntīmaan ni-ba taapu kí tīī Unimbɔti, kí já nì Sitaan, see ú sāǹ kí wàatī-ni. 8 Sútímaan kí pìl̄ Unimbɔti, ní u mun ń sútiń kí pìl̄-ni^c. Ikpitidambi, fíntímaan ni-ŋalii ikpiti ń nyā, milimilidambi, fíntímaan ni-pɔbiliŋ poon ń nyā circir. 9 Ni-kpitii puee, nín̄ bímaan kunimbaaun kí nīn sūǹ ki yáliŋkí, ni-laati ń kpántí nsiim, ni-pɔɔpindi ń kpántí-ni kunimbaau. 10 Sìntīmaan ni-ba kí tīī Unimbɔti, ní ú yòon̄-ni yilpu.

Ní taa nín̄ sòom̀maan ki bíiĺ ni-nabiyaamu

11 Nnabiyaamu, ní taa nín̄ sòoǹ ki bíiĺmaan tɔb. Sii un di yaa sòon̄ ki bíil̀ a-nabikee, àá a sòon̄ ki kūū u-bɔtee, mara ní a sòon̄ ki bíil̀ ki kūū. A yaa sòon̄ ki bíil̀ maree, aa ti tɔ́-u dee, a sòon̄ ki kūū-u dee. 12 Unimbɔti baba di tìì marab ní ki sá ubɔsoonli. Úǹ baba di ŋūǹ kí fīī binib, úǹ di tí ŋūǹ kí kpɔ̀-bi. Sii yíì a-ba ŋma ní ki sòoǹ a-juti bɔti ní?

Ní taa nín̄ cáá dilambil

13 Ní pīlifìmaan kɔŋkɔnnee, nimbi bin lì yii: «Díǹ àá fool, ti làá yīkì kí cù kitiŋ kinee ni, kí tin ŋá niin dibindi diba, kí bàntì kí ká animbilee.» 14 Ni nyí kun làá fu bàń ni-pu fooleeee^d? Ni pée bí kii dipɔ̀ńdi nín nyēē kí páań pu, án kūtì fiii, dí wāŋkèe ní. 15 An nín bàà máaǹ ní lì puee sèé: «Unimbɔti yaa là ní ti yaa bí ki pɔ̄ɔ̄yee, ti làá ŋá tinee nì tinee.» 16 Ama nimbee, ni sá bilambidambi ní ki dàkà ni-ba, an nì an lambiliŋee kaa ŋān̄. 17 Sii un di nyí tiŋan tin bàà sá á ŋá ní kaa ŋée, ŋá ikpiti.