Yakubu 3

Dilimbil nín ŋáań ikpiti iŋyee

1 M-nabiyaamu, ni-kɔkɔ ń taa yīkì bìliku yii ni là kí nīn dàkà Unimbɔti bɔti, kun puee ni nyí yii timbi bidakaliibee bɔsooŋyi dāa pɔ̄ɔ̄ ki jítiǹ bin kíǹee yai. 2 Ti-kɔkɔ yìntī ajan tikpil poon, ama sii un yaa kaa yìntī a-bɔsooŋyi poonee di sá uniŋman ki ŋūǹ kí cúú a-ba kɔkɔ. 3 Ti kpàl̀ itaamu nyɔmmu tikúti í nīn tɔ́-ti ní ki kpáàa kpòotī i-wunti kɔkɔ. 4 Kpèèmaan, meelab mun nín sá bikpaambi miŋyee, ama báà kubuŋu yaa yāntì ki téekí-bi min kamaa, kipimbiwaŋwaai ní un ŋàal̀ee cáa kpòotī-bi ki cáǹ laakin u lèe. 5 Míǹ mbaantiim ní unil wunti puee, dilimbil sá kijaŋwaai ní, ní ki ŋáań tibɔkpaandi.

Kéè, ni nyí yii kiŋmibilii fiii yéè di gbátí kí wà kupɔɔuaa! 6 Dilimbil sá kii ŋŋmee ní. Duulinya bɔkpitii kɔkɔ bí dilimbilin ní dì kā ti-wunti pu ki bíiĺ tiwun kɔkɔ, ní kí cáań Sitaan ŋmiŋu kí tɔ̄ ti-pu. 7 Unil ŋūǹ kí kpàà ipeel nì inoon nì tin fù ti-pooŋi puee, nì ijɔm kɔkɔ, í ŋá u nín là puee, ní binib lafun ŋúb̀-i míǹ. 8 Ama doooo nee, ubɔ kaa láá ŋúń ki ŋúb́ dilimbil: dì sá kuwaŋkpitiu kun baa ŋūǹ kí cúúyee, ki gbí tilool tin cáá ŋkúmee ŋmaniŋma. 9 Díǹ ní ti cáa jáaḿ ti-Baa Unimbɔti, díǹ ní ti tí cáa bíiĺ binib bin Unimbɔti náań ki nántiǹ u-bee^a. 10 Kinyɔkɔn ní ijaam nyēē, kíǹ kibaantii poon ní mbusu tí nyēē. M-nabiyaamu, an kaa máaǹ kí nīn bí míǹ. 11 Nnyimbul ŋubɔ kaa bí ki nyēē inyiŋfi ili: min tūee nì min mɔ̄ee dicilpu. 12 M-nabiyaamu, kɔŋki subu kaa lòoǹ tikpasampiil, ní nunufi mun kaa lòoǹ kɔŋki. Míǹ mbaantiim, nnyimbul ŋun nyēē nnyim min tūee kaa nyēē min mɔ̄ee.

Iciin in nyánní yilpuee

13 Ni-kansikin ubɔ bí ki cáá iciin ki nyáaa? Ú nīn sìntīǹ u-ba taapu kí nīn tūǹ atummɔnti ŋin làá dàkà yii u lafun cáá iciinee. 14 Ama a yaa ná a-jutiibi, a-poon tū, ki sá unil un mɔ̀ kí nīn jítiǹ báà ŋmee, á taa nín̄ gà a-bindi yii a tɔ́kɔ́ ibaamɔn pu, kí taa mɔ̄ntì a-ba. 15 An ciiŋyee kaa nyēeń yilpu, i sá taapu doo ní, nniyaamin, i nyēeń Sitaan cee ní. 16 Kun puee laakin ní binib ná tɔb ní ki mɔ̀ kí nīn jítiǹ tɔbee, niin ní ni kāntí tin kaa kítèe nì tibɔkpiil kɔkɔ nì ti-bulifi. 17 Ama iciin in nyēeń yilpuee, mpeepeekaamee i bí circir, ní boonee i cāabìń ŋgbansɔŋfi binib kansikin, ní ki mɔ̄, ki bí soooo, ní ki cáá tiniti tikpil, ki tūǹ atummɔnti, ní kaa gàntī binib, kaa cáá mpoonnyoon. 18 Bin cāabìń ŋgbansɔŋfi bi-jutiibi kansikinee būul̀ nsɔŋfin dee, ní kí dāá kìtī abil ŋin sá yii bi bí deedee Unimbɔti nimbiinee.