Yakubu 2

Ní taa nín̄ gàntī binib

1 M-nabiyaamu, kii ni nín bí ti-Dindaan Yeesu Kriisitoo tinyooldaan saŋŋun puee, an kaa máaǹ ní nīn cáá dinigàntil^a. 2 Tí lì yii ni-kpafil poon ní ugaaja ubɔ yaa kóoń ki fúuń sindaariya bɔmbiki ki pēē dibɔkutinyaandi, ní usoodaan ubɔ mun kóoń ki pēē ikpalcati, 3 ní ni yaa tīī ugaaja un pēē tiwammɔntiilee jilma ki bí-u yii: «Sii dāá kàl̄ mpaammɔnti nee pu.» Ama ní ki bí usoodaanee yii: «Sii nín̄ yú, a yaa tí làaa, dāá kàl̄ kitiŋ m-taaŋi caŋin yéè.» 4 Mimmee, naa gāntì-bi deeee? Ilandɔkɔkpiti ní ni dākafì ní ki ŋá míǹ.

5 M-nabineeŋkaamu, ní pīlifìmaan: Unimbɔti lútì duulinya nee poon bisoodambi bí fōō Yeesu Kriisitoo kí kíí, ní kí ká tigaajamɔntiil kí kɔ́ Unimbɔti Beel din u pōoǹ ki yóoǹ bin néeń-uee ni. 6 Ama ní nimbi kpèé bisoodambi fám. An kaa sá bigaajab di sàantí-ni ki cútí-ni ki cáǹ ibɔsoonaaa? 7 Bíǹ di kaa bíiĺ Yeesu Kriisitoo yinnyaandi din u pú-neeee?

8 Tiŋman, ni yaa nóó Unimbɔti Beel marau kii an nín ŋmàn̄ puee, yii: «Á nīn néeń a-juti kii sii a-bee,» mimmee, ni ŋáań min ŋān̄ee dee. 9 Ama ni yaa kpèé ki gàntī binibee, an sá ikpiti ní ni ŋáań, maree cúú-ni, kun puee ni yīntiǹ-u. 10 Di sá yii, a yaa ŋúb́ marab kɔkɔ ní ki yaa yīntiǹ ubambaanti bi-kansikinee, a yīntì bi-kɔkɔ dee, 11 kun puee Unimbɔti un lī yii: «Á taa ŋá tilaakpaalee», úǹ ubaantee di tí lī yii: «Á taa kpɔ̀ unil^b.» Míǹ puee, a yaa kaa ŋá tilaakpaal, ama ní ki yaa kūū unilee, a yīntì mara dee. 12 Míǹ puee, ni-bɔsooŋyi nì ni-ŋáaǹtam kɔkɔnee, ní nīn ŋáań ki nyí yii ni sá binib bin Unimbɔti làá dū mara un cāabìń dibatɔlee ní kí sòoǹ ni-bɔtee. 13 Sii un kaa súń a-jutiibi saayee, ibɔsoon dalee, Unimbɔti kaa làá dāá sɔ̄ si mun a-saai. A nín súń binib saayee di làá yàntī Unimbɔti ń dāá sɔ̄ si mun saai.

Fookii nì atuun

14 M-nabiyaamu, an kaa ŋān̄ unil ń bí yii úǹ fōō Yeesu ki kíí, ama ní kaa bíi tūǹ atummɔnti, an fookiiuee ŋūǹ kí fīī-uaaa? 15 Kii ti-nabiki kiba, uninja àá unimpu, di yaa bí, kaa cáá tiwampeeŋkaalaaa, kaa cáá tijikaal baabadal kí jī, 16 ní ni-kansikin ubɔ yaa tùkū udaan yii: «Án ŋá kí kūtì, á nīn bí tiŋan! Taa yàntī tiwool ń cúú-si, á nīn jīǹ tijin ki díkì!», ama ní kaa tīī-u ú jī, kaa tīī-u ú pèen̄ kí ŋmátée, an ŋān̄ lapu? 17 Míǹ mbaantiim ní un yaa fōō Yeesu ki kíí ŋmaniŋma, ní kaa ŋáań fookii tundi nín sá puee, mimmee udaan fookiiu kpíì dee.

18 Ubɔ ŋūǹ kí lì yii: «Sii cáá fookii, ama ní man tūǹ atummɔnti. Too, dàkà-mi a nín fōō ki kíí min min, kaa tūǹ atummɔntee, ní ma mun ń dàkà-si m-tummɔntiŋ a béé yii m fōō ki kíí. 19 A nín fōō ki kíí yii Unimbɔtibaanti di bée, an ŋān̄: ama míǹ ní arasiniibi mun fōō ki kíí, ní ki fàŋkí yɔ́kɔ́ yɔkɔ^c. 20 Ugbaan, aa là kí béé yii a yaa fōō ki kíí ní kaa tūǹ atummɔntee, a-fookiiu sá fámaaa? 21 An ŋá mana ní ti-naanja Abraam dāa kpántì deedeedaan Unimbɔti nimbiin ní? An sá ditundi din u túńee pu, an dàkà yii u nín nìn dū u-jipɔɔn Isaaki ki páaǹ nsaraafan pu ki làá ŋá saraa kí tīī Unimbɔtee^d. 22 A káa! U fōō ki kíí ní ki túń ditundi mun, u-fookiiu nì u-tuuŋŋi nín kpáfì mbaantiim ki táá tɔb puee ní u-fookiiu kpántì umɔnti. 23 An ŋá kii Unimbɔti gbɔŋku poon nín lī puee dee, yii: «Abraam fōō Unimbɔti ki kíí, ní Unimbɔti ká u-fookiiu un u cáá u-puee ní ki yíiń-u deedeedaan,» ní ki kíǹ ki yíì-u u-bɔɔ mun^e. 24 Ni káa! Unil tuuŋŋi pu ní u kpántí deedeedaan Unimbɔti cee, an kaa sá fookii un u cááyee ŋmaniŋma pu. 25 Míǹ mbaantiim ní an nìn tí jítì Raab kinimpulaakpaayee cee. U mun nín nìn túń atuun ŋin ki kpántì deedeedaan Unimbɔti ceeyee di sá u nín fōō binib bin Juuda yab nìn túee ki dàkā-bi nsan ŋubɔ bi dī ki ŋmátèe^f. 26 Kii ŋfam yaa nyáń tiwun nín kpántí utaŋkpiil puee, míǹ ní unil yaa fōō ki kíí ní kaa tūǹ atummɔntee, u-fookiiu kúù.