Eebru 13

Min unil máaǹ kí ŋá kí fáatí Unimbɔtee

1 Ní nīn néeḿmaan tɔb kii nnabiyaamu nín néeń tɔb puee án taa gbèen̄. 2 Ní téetí yii ni máaǹ kí nīn fòol̄ binicambi, kun puee biba nìn fōol̀ binicambi míǹ ní ki dāa kpáàa fōō Unimbɔti tuuŋyi kaa béè^a. 3 Ní nīn téetímaan bisarkadambi pu kí jī bi-falaau kii ni nì bi kɔkɔ di kpáfì ki bí sarkanee, kí nīn téetí bin bi sàantée pu kii ni nì bi kɔkɔ ní bi kpáfì ki sàantée.

4 Ní tīīmaan dinimpucaal àá dicamɔndi tinyool, ní unimpu nì u-cal ń yūlíǹ tɔb deedee, di sá yii Unimbɔti làá dāá dáaĺ bilaakpaadambi nì bijɔkɔndambi tafal.

5 Ní taa yàntī nnimbineel ń jī ni-pɔbiliŋ poon mpaan, ama ní yàntī án nīn mɔ̄ǹ-ni fiii un ni cááyee pu, kun puee Unimbɔti lī yii: «M kpá kí yàntī-si fám, maa làá dū-si kí fá míǹ jaanjaan^b.» 6 An pu ní ti cáá dimákal kí lì kí tɔ́kɔń dinyɔɔbundi nee pu yii:

«Unimbɔti di jòoń-mi,

an puee maa fàŋkí tiba,

Ba ní unil làá ŋmā kí ŋá-mi^c?»

7 Téetímaan ni-kpilib bin nìn dàkā-ni Unimbɔti bɔtee pu, kí dàkafì kí kpèè min ní bi nìn nóó Unimbɔti ki dāa kpíìyee, ki mun ń bīfì bi-fookiiu un bi cáá Unimbɔti puee. 8 Kun puee Yeesu Kriisitoo kaa kpántí. U nín nìn pée bí puee, míǹ ní u gbíntì ki bí díǹ, ki làá nīn pée bí míǹ kí nīn cá jaanjaan. 9 Binib nyántì tibɔpɔn tin nyáń ti-bee ki dàkà, ní taa yàntī bí dū an bɔtee kí dàkà-ni ní gáatí. An ŋān̄ yii diyimɔɔl din Unimbɔti pú-tee pu ní tí nīn kāntí mpɔn, án taa nín̄ sá marab bin binib ŋúb̀ ki kòó tijin tibee pu. Bin ŋúb̀ an marab gbantee kaa ká ipaati iba poon^d.

10 Timbi saraafaŋŋu ŋun ti cááyee, Juuda yab saraaŋaliibi kaa ŋūǹ kí jī nsaraafan gbanti pu jinti. 11 Di sá Juuda yab saraaŋakpiliu nìn kù tiwaŋkuti ní kí lēē fatiku kí kɔ́ǹ circir páaa laŋki kí ŋá saraa binib kpitii pu, ní kí yòon̄ tiwaŋkutee kí nyāntí kitiŋ kpaanceetiŋu kí dūú wà ŋŋmi^e. 12 Míǹ mbaantiim ní bi ŋá Yeesu, bi nyántì-u kitiŋ kpaanceetiŋu^f ní ki kūū-u. An ŋá míǹ u-fatikuu ń fíntí binib kpitii. 13 An puee ti mun ń nyā kitiŋ kpaanceetiŋu kí cù u-cee bí bèel̀-ti kii bi nín bēel̀-u puee. 14 Kun puee duulinya kaa sá-ti kitiŋ kin làá nīn bí ki cá jaanjaanee, an pu ní ti bí ki nyàab̀ yilpu tiŋki kin làá nīn bí jaanjaanee. 15 Yeesu puee ti-nyɔŋkii ń nīn sá saraa ti tìì Unimbɔti múlmul, an dàkà yii tí nīn pàkà u-yindi kí taa gbèen̄. 16 Ní taa súntí tiŋan diŋál pu, kí nīn tútúǹ tɔb, míǹ di sá saraabi bin ŋān̄ Unimbɔti ceeyee.

17 Ní nīn tɔ́ bin kpòotī-nee kí sìntī ni-ba taapu kí tīī-bi. Bíǹ di mɔ́tí ni-nammu pu, kun puee bi dāa cáá kí sòoǹ bi-nyɔkɔpu yai Unimbɔti nimbiin. An puee, ni yaa tɔ́-bee, bi mun tūǹ bi-tundi nín sá puee nì dipɔɔpindi ní, ama bi yaa tūǹ ni-pu ditundi bi-pɔbiliŋ kaa sɔ̀m̀ee, nimbi ní an gīintí boon.

18 Ní nīn gbíntì ki mèé ti-pu. Ti nyí ti-pɔbiliŋ poon yii ti ŋá tin máaǹ tí ŋée. Ti là ŋyunti kɔkɔ poonee tí nīn ŋáań min bí deedeeyee ní. 19 M là ní baasii mèè m-pu, Unimbɔti ń pɔ̄-mi nsan ḿ ŋmā kí gítiń ni-cee malaa.

Ŋwimmeem

20 Unimbɔti di tìì-ti ŋgbansɔŋfi. U fīkitì ti-Dindaan Yeesu un di sá upikpaakpilee ditaŋkpiilin. U-saraau fatikuu di náań dipoompɔndi din kaa kúntée ki tīī-ti. 21 Unimbɔti gbanti ń tīī-ni ŋŋmam ní nīn pée ŋáań tin ŋān̄ee nì tin u lèe. Yeesu Kriisitoo puee, ú dī ti-pu kí ŋá min fáatiǹ-uee. Úǹ Yeesu Kriisitoo ní bí nīn pée tìì tinyool kí nīn cáa cá jaanjaan! Ameeni.

Tibɔjoolkaal nì ijaam

22 Nnabiyaamu, tibɔti tin m ŋmàn̄-ni nee kaa fɔ̀kɔ̀, m mèé-ni ní jī kimɔtii kí pīlifì m-saŋkii gbanti. 23 M là ní kpáàa béé yii bi líì ti-nabiki Tiimootee^g sarkan. U yaa bāań ti-cee malaayee, man nì u di làá táá kí dāá màntì ni-pu.

24 Ní jāam̀ ni-kpootiliibi bin kpòotī-ni nnimbɔtisan poonee nì bin kɔkɔ nóó Unimbɔtee. Ti-nabiyaamu mun bí Italii tiŋkinee jáaḿ-ni.

25 Unimbɔti ŋanti ń nīn bí ni-kɔkɔ pu!