Kugbɔŋu kun Pɔɔl ŋmàn̄ ki tīī
Fiileemɔŋyee
Tibɔkilkaal
Fiileemɔn nìn sá unikpaan ubɔ ní. U nìn fōō Kriisitoo ki kíí ní ki máaǹ ki nìn bí Kooloosi nikitilin. U nìn sá Pɔɔl bɔɔ ní (b. 1). U nìn cáá uyumbu ubɔ, bi yíì-u Ooneesiim. U-yumbuu gbanti nìn sáǹ-u. Taa nyí an nín dī pu ní Ooneesiim dāa nyàab̄ ki ká Pɔɔl un nìn bí sarkee. Kun ti nyée di sá yii u mun dāa fōō Kriisitoo ki kíí. Pɔɔl nìn lēē yii u làá gíiǹ-u u-kpiliu cee. An pu ní u ŋmàn̄ u-kpiliu gbanti kugbɔŋu nee ki gbāam̀-u ú fōō-u kii kinabikee fookii poon, an taa nín̄ sá kii uyumbuee. Di sá yii uyumbu yaa nìn sáǹ ní bi cúú-uee, bi nìn dátí u-tafal ŋkpitim pu ní.
Pɔɔl nín jáam̀ Fiileemɔn nì bin kóò u-dumpuee ki dóòyee (-1-3), ní u jáam̀ Unimbɔti u-fookiiu nì u-faŋgiil pu (-4-7). Míǹ boonee ní u gbāam̀-u Ooneesiim un làá fàtīí gítí u-dindaan Fiileemɔn ceeyee pu (-8-22). Ijaam in kúntì kugbɔŋu neeyee poonee, ti kāntí Pɔɔl yíiń binib biba yiŋŋi. Ti gíti kāntí ayin gbanti Kooloosi gbɔŋkun ( 10, 12, 14, ti ŋūǹ kí gíti sòoǹ Aarsiipee un ti kāntí biyakatikaabi 2 nì Kool 4.17). An ŋūǹ kí nīn sá yii Ooneesiim nín cáá tigbɔnliitil ki cūnnì, an dàkà yii Kooloosi nì Fiileemɔn gbɔnti.
Ti kāntí Pɔɔl nín ŋmàn̄ u-bɔɔ Fiileemɔn kugbɔŋu nee nì iciin poon puee. Waa bíi tìì-u mara, kaa ti bíi páb̀-u tiba poon. Waa tí bíi lì mun yii Fiileemɔn kaa cáá Ooneesiim pu nsan kí ŋá-u u nín là puee. Ama u bíi téetí-u ki kpáaǹ bin kɔkɔ làá kàaǹ kugbɔŋu nee min ní Kriisitoo neendi ŋmíntí tiwan kɔkɔ pu tí kpántí tipɔn ní ki yàntī binib kansikin bítam mun kpántí puee ní.