Tiiti i

Kugbɔŋu kun Pɔɔl ŋmàn̄ ki tīī

Tiitee

Tibɔkilkaal

Tiiti kaa sá ujuudaja ní ki nìn fōō Kriisitoo ki kíí (Gala 2.1-3). U nìn sá Pɔɔl tɔntɔnjuti ubɔ ní ki nìn tútúǹ ki yāntì Kɔranti yab nì Pɔɔl kansikin mɔ́ɔkì (2 Kɔra 7.6-16). Ŋyunti ŋun Pɔɔl ŋmàn̄-u kugbɔŋu neeyee, u nìn bí Kreeti tiŋkin ní. Pɔɔl nìn dū Kriisitoo nikitil din nìn bí kitiŋ gbantinee bɔ́ntitam nì di-kpòotitam ki ŋúbiǹ-u (1.5).

Kugbɔŋu nee bɔkilkaati kúlifí Pɔɔl bɔti tin u cáá kí sòoǹee (1.1-4). Dibɔyipeepeekaal nìkī ki sòon̄ Kriisitoo nikitil kpilib nín máaǹ kí nīn bí puee (1.5-16). Abɔyil 2 poonee, Pɔɔl sáŋkì Tiiti u nín máaǹ kí nīn ŋúb́ anicil nín bí bí pu Kriisitoo nikitilin a-ba a-ba puee, an dàkà yii bitikpilib nì binimpucikitikaabi (bin mun máaǹ kí nīn dàkà binimpupɔmbee), nì binipɔmbi àá iyumbu (2.1-15). Abɔyil 3 téetí Kriisitoo yab nín cáá ditundi din kí tɔ̄ee, bi nín máaǹ kí nīn bí pu ní ŋgbansɔŋfi ń nīn bí bi-kansikinee, ní bi nín máaǹ kí ŋá pu kí taa yàntī diyakatil ń nīn bí bi-kansikinee (3.1-11). Míǹ boonee ní u dū tibɔkpaafikaal nì ijaam ki kúntì kugbɔŋu nee (3.12-15).

A yaa bíi kàaǹ kugbɔŋu nee, a kāntí yii tin pu ku sòoǹee kaa sá Tiiti nín máaǹ kí nīn bí puee nì u nín máaǹ kí tɔ̄ u-tundi puee ŋmaniŋma. Míǹ mbaantiim ní an sá ki tīī tigbɔn tili tin Pɔɔl ŋmàn̄ ki tīī Tiimooteeyee. Di sá yii tibɔti tin tigbɔn gbanti sòoǹee sá tin ní ti kāntí Kriisitoo nikitiŋ poonee. Cilinjee Kriisitoo nikitiŋ bɔ́ntitam nì ŋi-kpootiliibi nì ŋi-nib nín máaǹ kí nīn cáá mbimbim miŋyee.