Eebru 12

Unimbɔti ti-Baa

1 Kii kunipaau kun nìn cáá fookii Unimbɔti puee nín māntì ki tú-ti pu, ki kpèé-ti puee, ní yàntī tí fámaan atuŋkpiti ŋin cāabìń-ti digìńdee nì ikpiti in kaa pɔ̄ɔ̄-ti dicuulee, kí sāǹ nì dipɔ́ɔǹdi ditaatandi din Unimbɔti náká ki yóoǹ-ti tí sāǹee. 2 Ti-nimbikpeeŋu ń nīn pée cɔ́ Yeesu pu. Úǹ di nāantí fookii ti-ni kí tin cáá kátí-ku. U kíí ki kpíì ndɔpuntikaa kúm min sá icoo nì kpeefamee, kun puee u nìn nyí dipɔɔpindi din dɔ̄ ki cí-uee. Kɔŋkɔnnee u cūtìi kāl̀ Unimbɔti ŋaŋgiiliŋu pú dibeelin.

3 Ní dàkafì u nín kaa mɔ́tì u-ba pu ki gīī digìńdi din binikpitib ŋaanee, an di ŋūǹ kí yàntī ní taa pɔ̄ nsan diwuŋyɔtil ń kɔ́-ni. 4 Doooo nee, naa láá jáń nì ikpiti áli fatiku nyáń. 5 Ni súntì isaŋki in Unimbɔti nìn sáŋkì-ni kii ubaati nín sáŋkí u-jipɔmbi pueeee? U nìn bí-ni yii:

«M-jipɔɔn, ti-Dindaan yaa bíi dàkà-see,

á taa dūú kpèè fám.

U yaa dáaĺ a-tafalee,

á taa yɔ̀tī a-wunti.

6 Kun puee un ti-Dindaan néeńee

ní u dàkà,

ní ki dátí bin kɔkɔ

u fōō ki ŋá u-jipɔmbee tafal^a.»

7 An puee, Unimbɔti yaa bíi sáŋkí-nee, ní pɔ́ɔǹ ni-ba. Ni nín sá u-biyaamuee pu ní u ŋáań-ni míǹ, kun puee kibiki kpá ki-baa kaa sáŋkí-kì. 8 Ubaati yaa bíi dàkà u-biyaamu ní kaa bíi dàkà nimbee, mimmee waa yì nimbi dee, naa sá u-bimaalkaamu. 9 Tí kpèè ti-baabi bin màl̄-tee nín dàkà-ti ti tɔ́-bi miŋyee, kin ataa aŋa pu ní taa máaǹ kí nīn tɔ́ Ubaati un yì ŋfamee kí ká dimaŋfal! 10 Ti-baabee, bíǹ dàkà-ti ŋyunti ŋubɔ ní kí tin sāā min bi lèe ní kí gbèen̄, ama Unimbɔti úǹ nín dàkà-tee, an sá ti-ŋanti ní, kun puee u là tí nīn bí circir kii úŋ̀wuee ní. 11 Ibaamɔn didàkal kaa mɔ̄, ŋyunti ŋun a bí di-poonee. An wù ní, ama boonee, bin bi dàkēe kpántí binimɔntiibi ní kí páatí dipɔɔsɔŋkil nì deedeebítam.

Ní ká kunyannyaau

12 An puee, nimbi bin ŋalii nì ni-taaŋi yɔ̄tèe, pɔ́ɔm̀maan ni-ba kí ká kunyannyaau, 13 kí nìkī ni-taatandi kí dī nsan ŋun tèen̄ee^b pu án nín làá ŋá pu ditaal din wùee ń taa gíí ama dí pɔ̄ɔkèe.

14 Ní pɔ́ɔǹ ni-ba ŋgbansɔŋfi ń nīn bí ni nì báà ŋma kansikin, kí nīn bímaan circir. Kun puee un yaa kaa bí circiree kpá kí ká ti-Dindaan. 15 Ní nīn nyíǹ ni-ba ubɔ ń taa fá diyimɔɔl din Unimbɔti tīī-tee, kí nīn nyíǹ ni-ba ubɔ ń taa kpántí kii kisubiki kin cáá tiloolee kí dū u-lootee kí bīil̀ kunipaau^c. 16 Ní nīn nyíǹ ni-ba ubɔ ń taa ŋá tilaakpaal, kí taa kpèè Unimbɔti fám, kii Eesayuu nín nìn ŋá pu, tijin puee u dū u-kpiti ki nyáfèe. 17 Kéè, ni nyí yii boonee, u nín dāa nyàab̄ kí fōō difakal din ujipɔŋkpil fòol̄ee, waa ti káa! Nì min kɔkɔ u dū nnyinnyim ki nyàab̄ u nín làá dī pu kí kpántí min u nìn lēe, waa ká^d.

18 An kaa sá dijool kii Siinaayi joolee ní ni sútìń ki pìl̄: laakin ŋŋmi wù, dibɔmbɔndi dɔ́miń, kubuŋkpaaŋŋu jítì, 19 ní dikantándi búń ki pɔ̄ɔ̄ kpaŋkpam, ní nneen ŋubɔ sòon̄ee. Isirayeel yab nín gbìl̄ nneenee puee ní bi gbāam̀ yii ŋú taa ti sòoǹ^e. 20 Di sá yii bi nìn fāŋkì Unimbɔti nín sòon̄ yii: «Un yaa gbēē dijool neeyee, báà an yaa sá kuwaŋkuluuaaa, bí yāŋkì-ku ataŋkpee kí kpɔ̀ee.» 21 An nìn cáá dipɔɔbiildi kaa bí ŋkpèé, áli Mooyiisi u-ba bí yii: «M fāŋkì yɔ́kɔ́ yɔkɔ.»

22 Ama nimbi dɔ́miń Siiyɔn jool taapu nì Unimbɔti un bí dimaŋfalinee dumpu Jeerusaleem un bí yilpuee, laakin ituun cutimaanyi kpátì ki bí mmɔnnee ní. 23 Nimbi dɔ́miń laakin bin sá Unimbɔti biyaamu mun u péé péé ki màl̄ bi-yiŋŋi ŋmàn̄ yilpuee kpáfée ní. Ni dɔ́miń Unimbɔti u-ba cee ní, úǹ di sòoǹ binib kɔkɔ bɔti nì binib bin bí deedee Unimbɔti yāntì bi-nammu kpántì mmɔntiimu baa kāntí mu-pu tikpitil tibee. 24 Nimbi dɔ́miń Yeesu un cáań-ti dipoompɔndi ki dū u-ba ki tīī u-fatikuu fíntì-tee cee ní, u-fatikuuee sòoǹ tiŋan ki jítiǹ Abeel^f yɔu.

25 An puee ní nīn nyíǹ ni-ba kí taa yíí un bí ki sòoǹ nì ni nee nyɔkɔ^g. Bin nìn yíì kaa fōō un nìn bí bi-cee taapu doo ki sòoǹ nì bee nyɔkɔee, bi nìn dáaĺ bi-tafal ní, kin ataa aŋa ní ti yaa yíì kaa fōō un nyánní yilpu ki sòon̄ nì tee nyɔkɔee, taa kāntí ditafadaaldi! 26 U nín nìn sòon̄ dijool puee, kitiŋ nìn cīŋkì ní, ama kɔŋkɔnnee u pōoǹ yii u làá dāá gíti cìŋkì kitiŋ. Niinee an kaa dāa sá kitiŋ ŋmaniŋma, u làá dāá cìŋkì kí kpáaǹ yilpu mun^h. 27 Anyɔɔbun ŋin sá yii «u làá gíti cìŋkèe» dàkà yii tin kɔkɔ u náańee, ní tin kaa bá ki pɔ̄ɔ̄yee ń lítí kí wāŋkì kí kíń tin bá ki pɔ̄ɔ̄yee.

28 Kii Unimbɔti nín kāaǹ-ti Dibeel din bá ki pɔ̄ɔ̄yee poon puee, tí jāam̀-u u-ŋanti gbanti pu kí nīn ŋáań min fáatì-uee kí nīn tɔ́-u nì tifaandi poon kí dàkà-u yii ti nyí tiŋan tin u ŋá ki tīī-tee. 29 Di sá yii ti-Nimbɔtiu sá ŋŋmi ŋun wù ki céetée níⁱ.