Eebru 11

Fookii nì u-tuuŋŋi

1 Á nīn cáá fookiiyee taapu sá yii: á nīn cɔ́tí tiwan tin pu a mákée, ama aa wāĺ-tì ní ki nyí yii tì bí. 2 Fookii un Unimbɔti nib dooooyee yab nìn cááyee pu ní bi ká disíndi Unimbɔti cee.

3 Fookii un ti cáá Unimbɔti puee di yì-tì ní ti nyí yii an sá nì u-nyɔɔbundi ní u dū ki náań duulinya, di sá duulinya wanti tin kɔkɔ ti wāĺ nee nyánní dinyɔɔbundi din taa wāĺee poon ní^a.

4 An sá fookii un Abeel nìn cáá Unimbɔti puee di yì-tì saraa un u nìn ŋá ki tīī-uee nìn ŋān̄ ki jítiǹ Kayeen yɔu. U-fookiiu gbanti pu ní u kpántì deedeedaan Unimbɔti cee, kun puee Unimbɔti nìn fōō u-saraau. U-fookiiu puee, nì min kɔkɔ u kpíìyee, u-bɔti bí bi sòoǹ díǹ^b.

5 Eenɔki fookiiu un u nìn cáá Unimbɔti puee di yì-tì ní waa kpíì. Unimbɔti nìn yōoǹ-u ki cáá-u ki jɔ́miǹ u-cee ubɔ kaa ti ká-u. Unimbɔti gbɔŋku poon lī yii Eenɔki nìn pée fáatì Unimbɔti dooooyee ní ki wāatì u dāa nín yōoǹ-u^c. 6 Unil yaa kaa fōō Unimbɔti ki kííyee, udaan kpá kí fáatí-u. Di sá yii un là kí sútiń kí pìl̄ Unimbɔtee máaǹ kí nīn nyí yii Unimbɔti bí, ki tìì bin nyàab̀-u nì dipɔbil dibee tipaal. 7 Fookii un Noowa nìn cáá Unimbɔti puee di yì-tì ní Unimbɔti nín nìn kpáafì-u yii nnyiŋgbeen dòońee, u nìn fōō ki kíí kaa láá ká-mì, ní ki nìn kíĺ ki bíi kpáà meela un poon u nì u-dicaŋku làá kɔ́ kí ŋmátée. U-fookiiu un u nìn cáá Unimbɔti puee di dàkā duulinya yab bɔkpil ní úǹ kpántì deedeedaan Unimbɔti nimbiin^d.

8 Fookii un Abraam nìn cáá Unimbɔti puee di yì-tì ní ŋyunti ŋun Unimbɔti nìn yíiń-u ki bí ú yīkì u-tiŋkin kí nīn cá kitiŋ kin u làá pòon̄ kí tīī-uee nee, u lafun nìn yíkì míǹ kaa nyí laakin pú ní u nìn túĺ ki cée. 9 Nì fookii un u nìn cáá Unimbɔti puee ní u bàn̄ kitimpooŋkaayin ki gāā tanti ki kóò kii unicaanee. Míǹ ní Isaaki nì Jaakɔb bin mun nìn yíkì ki tɔ́kɔǹ dipoondi gbanti puee nìn gāā tantib ki kóò. 10 Di sá Abraam nìn kā ki cí kitiŋkpaaŋŋi kin diiŋŋi Unimbɔti u-ba kítì ki máń, ŋi yú ki pɔ̄ɔ̄yee ní.

11 Fookii un Saara nìn cáá Unimbɔti puee di yì-tì ní nì min kɔkɔ u nìn púĺ ki jítì mmaal puee, u ŋúń ki màl̄ ki kpántì ditimbundi na, kun puee u nìn fōō ki kíí yii Unimbɔti nín pōoǹ miŋyee, u làá ŋá míǹ^e. 12 Míǹ ní Abraam unibaanti un púĺ ki jítì mmaal puee màl̄, u-naantiibi būtì ki wīikí kii iŋmalbijaayee, baa ŋūǹ kí kàaǹ-bi, a lì kii bi nín kaa ŋūǹ kí kàaǹ dibul din dɔ̄ tiŋku gbandee puee^f.

13 Nì fookii poon ní an nibee kɔkɔ dūu kpíì kaa kpáàa fōō tin Unimbɔti nìn pōoǹee. Bi nìn ká tì nín páaǹní ndan ki dòońee, ní bi jáam̀-tì, ní ki bí yii bíǹ sá binicambi ní ki kóò duulinyan^g. 14 Bi nín sòoǹ miŋyee dàkà ki cántí-ti yii bi bíi nyàab̀ kitiŋ ní kí nīn kóò. 15 An yaa nìn sá kitiŋ kin poon bi nìn yíkèe pu ní bi yaa nìn bíi yáliŋkée, bi bàà nìn ŋūǹ kí fàtīí nīn gítí niinaa! 16 Ama ibaamɔnee, bi nìn baasii nyàab̀ kitimmɔntii ní, an dàkà yii yilpu tiŋki. An pu ní bi nín yíì Unimbɔti yii bi-Nimbɔtiuee, an kaa cáá-u icoo, kun puee u bɔ́ntì-bi kitiŋ ki yóoǹ yilpu.

17 Fookii un Abraam nìn cáá Unimbɔti puee di yì-tì ŋyunti ŋun Unimbɔti nìn cɔ́ŋkì-u ki bí yii ú dū u-jipɔmbaabil Isaaki kí ŋá-u saraayee, waa nìn ŋmɔ́ mmɔ́ɔn, nì min kɔkɔ Unimbɔti nìn líì-u dipoondee. 18 Unimbɔti nìn pōoǹ-u yii: «Isaaki di làá bùtī a-maaliŋu ŋun làá dāá fōō a-yindee^h.» 19 Ama Abraam nìn fōō ki kíí yii u yaa dū u-biki ki ŋá saraa ki tīī Unimbɔtee, Unimbɔti làá fàtīí fìkitī-kì, míǹ ní an lafun ŋá kii u fīkitì-kèe. Unimbɔti gíiǹ u-biki ki tīī-u, kun puee Abraam ŋman nìn pée kūū-kì ní.

20 Fookii un Isaaki nìn cáá Unimbɔti puee di yì-tì ní u nìn mēē ki bīiǹ Jaakɔb nì Eesayuu pu tin làá dāá bàń bi-pu foolboonee.

21 Fookii un Jaakɔb nìn cáá Unimbɔti puee di yì-tì u nín púĺ ki cīkiǹ ŋkúmee, u nìn mēē Unimbɔti ki bīiǹ Jooseefi biyaamu liitil pu ki nyīī u-kpandɔŋu pu ki nyɔ́ŋkí Unimbɔtiⁱ.

22 Jooseefi nìn fōō Unimbɔti ki kíí. An di yì-tì ní ŋyunti ŋun u tóob́ ŋkúmee, u nìn sòon̄ Unimbɔti nín làá dāá nyāntí Isirayeel yab Eejipiti tiŋkinee. An puee ní u nìn tīī-bi mara ki dàkā-bi bi nín làá dāá ŋá u-kpabiŋ puee^j.

23 Fookii un Mooyiisi baa nì u-na nìn cáá Unimbɔti puee di yì-tì ní bi nín màl̄ Mooyiisee, bi dū-u ki bál̀ áli iŋmal ita. Bi nín ká kibiki nín ŋān̄ miŋyee, baa ti fāŋkì ubɔti marau un u yóoǹ yii bí kpɔ̀ mbiyaamuee.

24 Fookii un Mooyiisi nìn cáá Unimbɔti puee di yì-tì ní u nín wíiǹee, u nìn yíì yii waa là kí nīn sá ubɔti Faaroo bisal jipɔɔn^k, 25 ki là kí nīn bí Unimbɔti nikitilin bí kpāfì bi-kɔkɔ kí sàaǹ. Míǹ nìn mɔ̄ǹ-u ki jítiǹ ú nīn bí ikpitin ki jīǹ mmɔn ŋun kaa làá yúntée. 26 U nìn ká yii, ú jī falaa kii Meesiya nín làá dāá jī uŋyee ŋān̄ ki jítiǹ Eejipiti gaajawanti kɔkɔ, kun puee u nìn wāĺ tipaal tin bí nyɔkɔpuee ní.

27 Fookii un Mooyiisi nìn cáá Unimbɔti puee di yì-tì ní u nìn yíkì Eejipiti tiŋkin, kaa fāŋkì diŋuul din ubɔti fōōyee pu, ní ki ŋúb́ Unimbɔti un baa wāĺee bɔti an píkí gbīŋgbim kii u wāĺ-uee. 28 Fookii un u nìn cáá Unimbɔti puee di yì-tì u nìn fōō Unimbɔti nyɔkɔ ki jíń Dilákatil jiŋaaliu, ki nìn yāntì bi dū ipiiyee fatikuu ki ŋmītì mpunyɔmu pu, án nín làá ŋá pu ntuun ŋun làá kpɔ̀ Eejipiti yab jipɔŋkpilibee ń taa gbēē Isirayeel yab báà ubɔee.

29 Fookii un Isirayeel yab nìn cáá Unimbɔti puee di yì-tì ní bi nìn dūtì Tikati mɔɔl kii kitiŋkuliŋŋee, ama Eejipiti yab mun nìn mākaǹ kí dùtī ní dimɔɔl dū-bi ki náĺ^l.

30 Fookii un Isirayeel yab nìn cáá Unimbɔti puee di yì-tì bi nìn cūtì ki cōom̀ ki māntì Jeeriikoo tiŋki. Iwiin iluli dalee, agun nìn cúu kpīkitì ki lítì. 31 Fookii un Raab kinimpulaakpaayee nìn cáá Unimbɔti puee di yì-tì ní baa nìn kūū-u ki kpáaǹ binikpitib, kun puee u nìn ŋá tiniti ki fōō binib bin bi nìn tú bí cù kí cɔ̄ŋkì kitiŋee^m.

32 M làá gíti lì yii ba? Mpaan kaa bí-mi ḿ sòoǹ Geedeeyɔn nì Baraaki nì Samsɔn nì Jeefita nì Daafiidi nì Samiyeel nì Unimbɔti bɔnaatiliibi puⁿ. 33 Bi fookiiu un bi nìn cáá Unimbɔti puee di yì-tì ní bi nìn jáà ki pɔ́ɔkiǹ bibɔtiibi bin kíǹee nì bi-timmu. Biba mun fookiiu pu ní bi nìn yāntì binib ŋáań tin bí deedeeyee, ní biba mun fookiiu pu ní bi nìn fōō tin Unimbɔti pōoǹ-bee. Bi nìn cúú biba ki tɔ́ laakin bi kpàá gbikintibee ní baa nìn ŋúń ki tábitì bi-nyɔmmu ní kaa nín ŋúń ki ŋá-bi tiba bi-fookiiu pu. 34 Ŋŋmi gà lìblib bi téé biba ki tɔ́ poon, an kaa ŋá-bi tiba bi-fookiiu pu. An bàà nìn sá bí kpɔ̀ biba nì ntàataajimu, ama fookii un bi nìn cáá Unimbɔti puee puee, bi nìn ŋmátì. Biba nìn būǹ ki pɔ́ɔkì. Biba nìn sá ŋwɔsɔfimu, bi-fookiiu puee, bi kpántì bibaatandambi. Biba fookiiu puee, bi nìn cúú bi-nannanliibi. 35 Binimpoobi fookiiu un bi nìn cáá Unimbɔti puee di yì-tì bi fīkitì bi-yab bin kpíìyee ki tīī-bi^o.

Biba fookiiu puee, bi nìn sāaǹ-bi kí kpɔ̀-bi, ama bi nìn yíì yii bí taa fīī-bi, kun puee bi nyí yii bi làá dāá fìkitī kí nīn kíǹ ki bí dimaŋfal din kaa cáá dikúntilee ni. 36 Bi nìn bēel̀ biba ki gbáń-bi anaalab, ki nìn gúĺ biba nì ikusaka ki cáa tɔ́ sarka. 37 Biba fookiiu un bi nìn cáá Unimbɔti puee, bi nìn yáŋkì-bi ataŋkpee ki kūū, ki nìn sēekìi nābitì biba agin ali, ki nìn dū ntàataajimu ki kūū biba. Biba kaa nìn cáá tiba kí pèen̄, see ipii nì iŋoobu gbaŋyi ní bi nìn pèentí. Biba mun nìn sá bisoodambi, ní bi nìn páb́ biba ki sàantí-bi ní bi sáń ki póotí ajan kɔkɔ^p. 38 Binib gbanti circiriu puee, baa bàà nìn máaǹ kí kàl̄ duulinyan doo. Bi nìn yíkí ní ki cá kuteeun nì ajoon pu, ki kóò itaŋkpalɔkɔn nì afaginni.

39 Unimbɔti u-ba ká yii an nibee kɔkɔ nìn lafun fōō-u ki kíí, ama nì míǹ kɔkɔee, baa nìn fōō tin Unimbɔti nìn pōoǹee. 40 Kun puee Unimbɔti bɔ́ntì tin sá timɔntiilee ki yóoǹ, kaa dá láá dūu tīī-bi ki cíitì ti-kɔkɔ yaa kpáfèe, ú dūú yàkatī-ti.