Eebru 10

1 Mooyiisi marab kaa nìn baasii dàkà tiŋan tin Yeesu làá cáań-tee mbaamɔmin, an nìn pée sá kunaŋu ní. Di sá yii bi nìn pée ŋáań saraabi gbanti míǹ ní dibintil sá kamaa an kaa kúntí, ama ní an kaa ŋūǹ kí yàntī bí kpántí bimɔntiibi páaa kí sútí kí pìl̄ Unimbɔti. 2 Bin bin nìn ŋáań tiwaŋkuti saraabi ki tìì Unimbɔtee yaa nìn ŋá saraa míǹ diba pu bi-kpitii lēēyee, kɔnampu bi bàà nìn gbēeǹ disaraaŋal dooooyee, kun puee baa bàà gíti gbìl̀ bi-ban yii bi cáá ikpiti. 3 Ibaamɔnee, an saraabee sá kí nīn téetí binib dibindi kamaa bi-kpitii pu ní. 4 Kun puee inajaa nì iŋɔjaa fatikuu kaa ŋūǹ kí lēē ikpiti jaanjaan. 5 An pu ní ŋyunti ŋun Kriisitoo làá nīn dòoń duulinyanee, u bí Unimbɔti yii:

«Aa là kuwaŋkuluu saraabi àá tijimpin saraabi.

Man ní a tīī tiwun ḿ dū-tì kí ŋá saraa kí tīī-si.

6 Bisaraawɔkaabi nì ikpiti pɔ̄tam saraabi kaa fáatì-si.

7 An pu ní m bí yii: Unimbɔti, m sèé,

m làá cùú ŋá min làá fáatíǹ-see,

kii an nín pée ŋmàn̄ m-pu min ki yóoǹ a-gbɔŋkunee^a.»

8 Yeesu dá láá péé ki lī yii: «Aa fáatì tiwaŋkuti saraabi nì tijimpin saraabi nì bisaraawɔkaabi nì ikpiti pɔ̄tam saraabi.» U nìn lī míǹ, nì min kɔkɔ mara di pú nsan yii bí nīn ŋáań saraabi gbanti kɔkɔee. 9 Boonee ní ki dāa lī yii: «An pu ní man bí yii: M sèé, Unimbɔti, m làá cù kí ŋá min fáatì-see.» Ní u lafun dɔ́miń ki kpītì nsaŋkpiki ŋun binib nìn dī ki nóó Unimbɔtee ní ki náań mpɔɔn. 10 Yeesu Kriisitoo dɔ́miń ki ŋá min fáatiǹ Unimbɔtee. U dū u-ba ki ŋá saraa diba pu ki kúntì saraabi, ní u-saraauee fíntì ti-kpitii. 11 Baabadalee, usaraaŋal yú u-tundi laŋki ní, ní ki ŋáań bisaraabaantiibi múlmul, ama ní an saraabee kaa ŋūǹ kí lēē unil kpitii^b. 12 Ní Kriisitoo úǹ dū u-ba ki ŋá saraa un bí kí nīn cá jaanjaanee diba pu timbi kpitii pu. Boonee ní ki cūtìi kāl̀ Unimbɔti ŋaŋgiil pú. 13 U kā niin ki cí ŋyunti ŋun Unimbɔti làá dāá dū u-nannanliibi kí ŋá u-taaŋi taapu ú tāāyee^c. 14 Di sá yii saraabambaanti ní u ŋá ní an fíntì binib kpitii ní saraa gbantee cáá mpɔn kí nīn cá, kí gàntī-bi kí yóoń bí nīn ŋān̄ Unimbɔti nimbiin.

15 Unimbɔti Fam lī yii míǹ ní an lafun sá. Mpeekaamee, mì bí yii:

16 «Ti-Dindaan bí yii dipoondi din m làá dāá líí-bi

mpèé ń nīn bí man nì bi kansikin ŋyunti gbantee sèé:

M làá dāá dū m-marab kí ŋá bi-pɔbiliŋin

ní bí ŋmā kí nīn nyí min m lèe,

ní kí tí ŋmà marab gbanti bi-landɔkɔyin

bí ŋmā kí nīn ŋúb́-bi kí taa súntí.»

17 Ní nliliitiimee mì gíti bí yii:

«Maa làá dāá gíti téetí bi-kpitii nì bi-yìntitam pu dalba dalba^d.»

18 Di sá bi yaa dū unil kpitii ki pú-uee, an kaa ti cáá saraa ubɔ ú gíti ŋá ikpitee pu.

Tí sútiń kí pìl̄ Unimbɔti

19 An puee nnabiyaamu, Yeesu nín kpíì u-fatikuu nyáńee ní nsan dōoǹ tí jītí kí kɔ́ circir páaa laŋki laakin Unimbɔti bée. 20 An sá nsampɔɔn ŋun tìì dimaŋfalee ní Yeesu pīitì-ti ki dī ŋŋaabu ŋun nìn pītì circir laŋki nì circir páaa laŋkee. Ŋŋaabuee di sá u-wunti. 21 Ti nín cáá usaraaŋakpil un Unimbɔti kāaǹ u-dicaŋku puee, 22 tí sútí kí pìl̄ Unimbɔti nì dipɔbil diba nì dimákabaamɔndi, kí fíntí ti-pɔbiliŋ poon ilandɔkɔkpiti án nyā dándan, kí dū nnyim min ŋān̄ circiree kí fàl̀ ti-wunti ń nyā^e. 23 Tí nīn gbíntì ki ŋúb́ ti-mákal din ti lì yii ti cááyee gbīŋgbim, kun puee u nín pōoǹ yii u làá ŋá miŋyee, u làá lafun ŋá míǹ ní. 24 Tí nīn ŋúb́maan tɔb tiŋan kí nīn nyàatī tɔb, ti-neendi ń mɔ̀tīí nīn wīintí, kí nīn tūǹ atummɔnti, 25 kí taa fàtī ti-boon kí tīī Kriisitoo nikitiŋ kooŋyi kii an nín kpántì biba bimbim baa ti dòoń puee. Ama nín̄ tììmaan tɔb kunyannyaau, kun puee nimbi ni-ba nyí yii ti-Dindaan wiiŋŋu tóobiń.

26 Ti yaa béè ibaamɔn ní ki fōō-i, ní boonee ti gbíntì ki nìkì ki ŋáań ikpiti ti nín là puee, tí béé yii saraa ubɔ gíti kpá bí ŋá án lēē ti-kpitii. 27 Ama tin kíǹ tí nīn cée di sá ditafadaakpaandi din sá ŋŋmi ki gà lìblib ki làá wà Unimbɔti nannanliibee^f. 28 Un yaa nìn yīntiǹ Mooyiisi marab, ní binib bili kii bita yaa lēē seera yii bi ká u nín yīntì puee, bi nìn kù-u ní baa sūǹ u-saai^g. 29 Ní kpèè ditafadaaldi dilal ní un kpēē Unimbɔti Jipɔɔn fám kaa dū fatiku un Unimbɔti dū ki líì-ti dipoondee ki yíiń tibee máaǹ? Ama fatikuee ní bi dūu fíntì u-kpitii, ní boonee u kíǹ ki kɔ̄ntí Unimbɔti Fam min min pú-u an yimɔɔlee diŋuul. 30 Ti nyí Unimbɔti un di lī yii: «An sá man Unimbɔti di làá dāá tɔ̀ ipɔntoon, man di làá dāá pà tipaal,» ní ki gíti bí yii: «Man di làá dāá sòoǹ m-samaau bɔti^h.» 31 Sii un yaa kɔ́ Unimbɔti un bí nee bɔtinee, an dóò sii pu dee!

32 Téetímaan ŋkpikim ni nín nìn fōō Kriisitoo ki kíí ki ká ŋwalifi ŋuŋyee, nì falaabi bin ní ni nìn jíń tikpil kaa fātìi tɔ́ee. 33 Iyunti ibee, bi sìí-ni, iyunti ibee, bi cáǹ-ni diniwul nimbiin ki sàantí, iyunti ibee, ni bí ki sūǹ bin bi sàantée saai. 34 Míǹ ní ni nì bisarkadambi yākatì bi-falaau. Bi yaa nìn cúú ni-wanti ki fōōyee, an kaa nìn páb́-ni, ni-pɔbiliŋ nìn sɔ̀m̀, kun puee ni nyí yii ni cáá tigaajamɔntiil tin làá nīn bí jaanjaanee an dɔ̄ yilpu. 35 An puee ní taa páatí ni-mákal, ipaatikpaan dɔ̄ ki cí-ni. 36 An máaǹ ní nīn cáá dipɔ́ɔǹdi ní kí ŋmā kí ŋá min Unimbɔti lèe kí wàatī ní kí nín ká tin u pōoǹee. 37 An bí kii an nín ŋmàn̄ Unimbɔti gbɔŋku poon puee yii:

«An kíǹ ŋyunti fiii nàanyɔkɔ ní un làá dāan̄ee ń bàń,

an kaa làá ti yúntí.

38 Un bí deedee m-nimbiinee fookiiu pu

ní u làá ŋmátí,

ama u yaa gítì u-boonee,

ubɔti kaa dāa gíti fáatiǹ-miⁱ.»

39 Timbee, taa sá bin gítí bi-boon ki wáŋkée, ama ti sá bin fōō ki kíí ki cáá dimaŋfalee ní.