Eebru 9

Taapu doo saraaŋátam nì yilpu yam

1 Ŋyunti ŋun Unimbɔti nìn pōoǹ dipoompeepeekaalee, u nìn yóoǹ marab bin binib làá dī kí jāam̀-uee nì tanti un poon bi làá nīn jáaḿ-uee. 2 Bi nìn gāā tanti ní, ní ki dū sata ki pītì poon adiin ali, ní ki yíì kudipeepeekaauee circir laŋki. Niin ní fitilab tɔ́kɔŋkaati nìn bí, ní teebil yú ní bi cāabìń kpɔnɔb bin bi ŋáań Unimbɔti saraayee ki pāantí. 3 Sataliliiti boonee, kudii kubɔ mun dee, niin ní bi yíì circir páaa laŋki. 4 Niin ní sindaariya saraafaŋŋu nìn yú ní bi tùutī talaalub an pu, ní dipoondi dakaau yú bi dū sindaariya ki nyūntì u-kɔkɔ. Dakaayee poonee, kibaŋŋi kiba yú ki sá sindaariya ŋma. Ki-poon ní tijin tin bi yíì maanee nìn kā. Dakaa ubaantee poon ní Aarɔn kpandɔŋu ŋun nìn púkuḿ nsupumpukumee nì ataŋkpee ŋin pu Unimbɔti nìn ŋmàn̄ dipoondi marabee kā. 5 Ní bi dū sindaariya ki mɔ́ɔ́ keerubimbi bin sá Unimbɔti nyootee bili ki tɔ́kɔǹ dakaayee pu kí dàkà yii Unimbɔti u-ba bí niin. Keerubimbee nìn kpátì bi-feeŋyi ki bīiǹ laakin bi yaa ŋá ikpiti saraau bi cáá fatiku ki yàantée pu. Taa ŋūǹ kí sòoǹ dakaa gbanti bɔti nì u-tuuŋŋi nín sá puee kɔŋkɔnnee^a.

6 Bi nìn ŋá míǹ kɔkɔ ki dóòyee, kudipeepeekaauee poon ní bisaraaŋaliibi kóò baabadal ki ŋáań bi-saraatuuŋŋi. 7 Ama poon diiku laakin bi yíì yii circir páaa laŋkee, usaraaŋakpil baba di kóò niin dibindi poonee diba ja kí cáá tiwaŋkuti tin u kūū úǹ u-ba kpitii puee fatikuu nì tin bi kūū samaa kɔkɔ nín ŋá ikpiti in kaa nyée fatikuu kí kɔ́ǹ kí ŋá Unimbɔti saraa^b. 8 Circir Fam nìn dàkà yii, ŋyunti ŋun ní nsan pú diiku dáá bée, nsan nìn kpá unil ń jītí kí kɔ́ circir páaa laŋki. 9 An saraabee cántí tibɔti taapu ní ki dàkà timbi díǹ: an dàkà yii saraabi bin binib nìn ŋáań ki jáaḿ Unimbɔti nì bin bi nìn ŋáań bi-kpitii puee kɔkɔ kaa nìn ŋūǹ kí lēē bin ŋáań saraabi gbantee pɔbiliŋin ikpiti bí kpántí deedeedambi Unimbɔti nimbiin. 10 An sá marab bin bi yóoǹ bi sá tijin nì tinyɔkaal nì tiwun difíntilee bɔti ní. An marabee kɔkɔ sá tiwun pu marab ní kí tin sāā ŋyunti ŋun Unimbɔti làá dāá cáań tipɔnee.

11 Kriisitoo dɔ́miń ki sá-ti usaraaŋakpil un cáań-ti tiŋan tin poon ti bí nee. Úǹ di kɔ́ kusaraadimɔntiiu kun sá kukpaaŋŋu kaa sá binib di máńee, an dàkà yii kuaa sá duulinya doo diiku. 12 U kɔ́ diba ja Circir páaa laŋki Unimbɔti nimbiin. An kaa sá nì iŋɔjaa nì anabil fatikuu ní u cáa kɔ́ǹ, ama úǹ u-ba fatikuu. Míǹ ní u ŋá ní ki cáań-ti difiil din kaa cáá dikúntilee. 13 Dikoobil di nìn sá puee di sá bi nìn dū iŋɔjaa nì inajaa fatikuu nì unasal un bi nìn wù ŋŋmi^c kɔkɔee fantam kí yàaǹ bin ŋá ikpitee pu ní. Bi yaa nìn ŋá mimmee, an lēē ikpiti bi-wunti pu bi kpántì circirdambi dee. 14 An yaa nìn ŋūǹ kí ŋá míǹ, kin ataa aŋa pu ní Kriisitoo un Circir Fam tútúǹ u dū u-ba ki ŋá saraamɔnti ki tīī Unimbɔtee fatikuu kaa ŋūǹ kí fíntí atuŋkpiti ti-pɔbiliŋ poon tí ŋmā kí nóó Unimbɔti un bí dimaŋfalinee.

15 Kriisitoo di cáań-ti dipoompɔndi, án nín làá ŋá pu ní bin Unimbɔti fīīyee ń ŋmā kí fōō tigaajawan tin Unimbɔti pōoǹ tàa cáá dikúntilee. Kun pu bi làá ŋmā kí fōō tigaajawan gbantee di sá Kriisitoo kpíì ki nyántì-bi bi nín nìn bí dipooŋkpikil poon ki ŋáań ikpiti iŋyee ni.

16 Unil yaa bí yii a làá jī u-fakalee, u yaa kaa láá kpíì, saa yòontí tiba. 17 Daliŋkin u sòon̄ ki tùkū-si yii sii di làá jī u-fakalee, tibɔtee kaa láá tūǹ ditundi, see u yaa láa kpíìyee ní á nín yīkì kí tɔ́kɔń difakalee pu kii u nín nìn pée tùkū-si puee. 18 An pu ní tiwaŋkuti fatikuu nìn nyáń ki wāatì ní dipoompeepeekaal nín ŋúń ki túń ditundi. 19 Di sá Mooyiisi nín kàan̄ marab bin kɔkɔ Unimbɔti ŋmàn̄ee ki tùkū samaa kɔkɔ ki dóòyee, ní u yōoǹ anabil, nì iŋɔjaa fatikuu ki dū nnyim ki ŋmālim̀ ní ki dū tipikuti tin bi mántèe nì isɔpi faapibiti ki cáa sèetī fatiku poon ki yàantí kugbɔŋu kun poon bi ŋmàn̄ marabee nì samaa kɔkɔ pu. 20 U nìn lī yii: «Fatiku nee di sá dipoondi din Unimbɔti líì-nee daaŋku^d.» 21 U ŋá mimmee ní ki yāaǹ Unimbɔti tantiu un bi gāāyee nì tiwan tin bi cáa ŋáań saraabee kɔkɔ pu. 22 Kii mara nín lī puee, fatiku ní bi ŋman nìn pée cáa yàantí tiwan kɔkɔ pu ní tí kpántí circir. An puee fatiku yaa kaa nyáńee, unil kaa kāntí u-kpitii pɔ̄tam^e.

Yeesu fatikuu di lèekī ikpiti

23 Bi yaa nìn máaǹ kí ŋá tiwan tin sá yilpu wanti naŋku circir mimmee, an bàlifī yii bí ŋá saraabi bin jítiǹ míǹ kpataaayee yilpu wanti pu. 24 Kun puee an kaa sá yii Kriisitoo kɔ́ kudii kun binib máń ki nántiǹ yilpu yɔkɔee poon ní ki ŋá saraa. Ama yilpu, Unimbɔti cee ní u kɔ́, ki bí Unimbɔti nimbiin kɔŋkɔnnee ki gbàam̄ ti-pu. 25 Kí kūtèe, dibindi sá kamaayee, usaraaŋakpil nìn kóò circir páaa laŋki nì tiwaŋkuti fatikuu ní kí ŋá saraabi. Ama Kriisitoo úǹ kaa kɔ́ ŋfunyɔm kupaau kí dū u-ba kí ŋá saraa. 26 An yaa sá mimmee, doooo duulinya nín kíĺ ki dāa sāā díǹee, u bàà làá jī falaabi ŋfunyɔm kupaau ní. Ama duulinya nín tóob́ dikúntil pu nee ní u dɔ́miń ki dū u-ba ki ŋá saraa diba pu kí kúntí ikpiti. 27 An pée sá yii báà ŋma ń kpú diba ja ní, ní ŋkúm boonee, Unimbɔti ń sòoǹ báà ŋma bɔti. 28 Míǹ mbaantiim ní Kriisitoo mun dū u-ba ki ŋá saraa diba ja ki nyántì binib tikpil ikpiti poon^f. U làá dāan̄ nliliitiim, kaa sá kí dāá nyāntí binib ikpiti poon, ama u dāa dòoń kí fīī bin kíǹ ki kā ki cí-uee ní.