Eebru 3

Yeesu jítiǹ Mooyiisi

1 An puee m-nabiyaamu, nimbi bin Unimbɔti yíiń ni sá u-yabee, ní nīn kpèé Yeesu. Úǹ ní Unimbɔti túnní ú nīn sá ti-saraaŋakpiliu, ní u-pu ní ti fōō ki kíí. 2 Di sá yii u yúliǹ Unimbɔti un lēē-u ú tɔ̄ an tundee deedee, kii Mooyiisi nín nìn túń Unimbɔti dicaŋkun ditundi deedee puee^a. 3 Bi pàkà un máń kudiiyee ki jítiǹ kudii ku-ba. Míǹ mbaantiim ní Yeesu nyooti jítiǹ Mooyiisi yati. 4 Kudii kamaa cáá un máń-kuee ní, ní un di māā tikɔkɔee di sá Unimbɔti. 5 Mooyiisi úŋ̀wuee, u sá utɔntɔnli ní ki túń ditundi nì deedee Unimbɔti dicaŋkun. U-tundee nìn sá kí dàkà tin tin Unimbɔti làá dāá sòoǹ foolboonee ní. 6 Ama Kriisitoo úǹ sá Unimbɔti Jipɔɔn ní ki yì Unimbɔti dicaŋku. Timbi di sá Unimbɔti dicaŋkuee, ti yaa gbíntì ki máká u-pu, ki cɔ́tí u-pu ki tin kátì-kuee.

Diŋuŋfil din dɔ̄ ki cí Unimbɔti yabee

7 An puee, kii Circir Fam nín lī puee, yii:

«Ni yaa gbìl̄ Unimbɔti bɔti díǹ,

8 ní taa ŋá mpɔɔgbifin, a lì kii ni-naanjab nín nìn ŋá mpɔɔgbifin

ki cɔ́ŋkì Unimbɔti kuteeun puee.

9 Kuteeun niin ní ni-naanjab nìn cɔ́ŋkì-mi

kí kpèè m nín sá uŋyee,

ní m dàkā-bi m nín sá uŋyee, áli abin imuŋku ili.

10 An pu ní m gíí binib gbanti pu diŋuul, ki bí yii:

11 An di yì-tì ní m nìn gíí diŋuul ki pūtì yii

baa làá ti kɔ́ mpaan ŋun m bɔ́ntì bí bàà kɔ́ kí kàl̄ kí ŋùŋfèe ni^b!»

12 An puee m-nabiyaamu, ní nīn nyíǹ ni-ba, ubɔ ń taa nín̄ cáá dipɔɔkpitil din kaa cáá fookiiyee kí cúú u-ba kí nákatíǹ Unimbɔti un bí dimaŋfalinee. 13 Ama ní nīn tììmaan tɔb kunyannyaau baabadal ŋyunti nín dáá bí pu nee, án nín làá ŋá pu ikpiti ń taa kīil̀ ubɔ ni-kansikin udaan ń pɔ̄ɔkì u-pɔbilee. 14 Ti nín kíĺ ki cáá dimákal din Kriisitoo puee, ti yaa gbíntì ki ŋúb́ míǹ ki tin kátì-kuee di dàkà yii ti sá Kriisitoo yab. 15 A lì kii Unimbɔti gbɔŋku poon nín lī puee yii:

«Ni yaa gbìl̄ Unimbɔti bɔti díǹ,

ní taa ŋá mpɔɔgbifin

a lì kii ni-naanjab nín nìn ŋá mpɔɔgbifin puee^c.»

16 Bilab di nìn gbìl̄ Unimbɔti bɔti ní ki pɔ́ɔkì bi-pɔbiliŋ ní? An sá bin kɔkɔ Mooyiisi nìn nyántìń Eejipiti tiŋkinee. 17 Bilab pu ní Unimbɔti nìn gíí diŋuul áli abin imuŋku ili? An sá bin nìn ŋá ikpiti ki kpíì kuteeunee. 18 Bilab pu ní Unimbɔti nìn pūtì yii: «Bi kpá kí kɔ́ mpaan ŋun m bɔ́ntì bí bàà kɔ́ kí kàl̄ kí ŋùŋfèe ni ní?» An sá bin nìn ŋá mpɔɔgbifinee ní u nìn lī míǹ^d. 19 Ti lafun ká yii baa nìn ŋúń ki kɔ́ diŋuŋfil laŋki, kun puee baa nìn fōō Unimbɔti ki kíí.